કહ્યું કે ઇન્ટરનેટનો એક્સેસ અને ઉપયોગ બાળકોનો પણ મૂળભૂત અધિકાર છે જ
પ્રતીકાત્મક તસવીર
સુપ્રીમ કોર્ટે બાળકો માટે વય-આધારિત ઇન્ટરનેટ પ્રતિબંધોને ફગાવી દીધા છે તથા મજબૂત ઑનલાઇન સલામતી-પગલાં લેવાની, ચાઇલ્ડ સેક્સ્યુઅલ અબ્યુઝને લગતી સામગ્રીને ઝડપથી દૂર કરવાની અને મૂળભૂત અધિકારોનું રક્ષણ કરતા જાગૃતિ કાર્યક્રમો યોજવાની હાકલ કરી છે. શનિવારે એક મહત્ત્વપૂર્ણ અવલોકનમાં સુપ્રીમ કોર્ટે બંધારણના અનુચ્છેદ 21 અને 19(1)(a) હેઠળ બાળકો સહિત દરેક વ્યક્તિ માટે ઇન્ટરનેટના ઍક્સેસ અને ઉપયોગને મૂળભૂત અધિકાર જાહેર કર્યો હતો. કોર્ટે કહ્યું કે આપણાં બાળકોની સુરક્ષા અને તેમની સ્વતંત્રતા એકબીજાથી વિરોધાભાસી નથી.
ન્યાયાધીશ જે.બી. પારડીવાલા અને કે. વિનોદ ચંદ્રનની બેન્ચે સૂચન કર્યું હતું કે ‘બાળકોને ઇન્ટરનેટનો ઉપયોગ કરવાથી સંપૂર્ણપણે પ્રતિબંધિત કરવાને બદલે સોશ્યલ મીડિયા અકાઉન્ટ્સ માટે ‘ચાઇલ્ડ મોડ’ જેવાં પગલાં દાખલ કરીને તેમની ઑનલાઇન સલામતીને મજબૂત બનાવવી જોઈએ.’
બેન્ચે સ્વીકાર્યું કે એના વર્તમાન સ્વરૂપમાં ઇન્ટરનેટ બાળકોની સલામતી માટે જોખમ ઊભું કરે છે. જોકે કોર્ટે નોંધ્યું હતું કે બાળકો માટે હાનિકારક મનાતી સામગ્રી શોધીને દૂર કરવામાં ઑનલાઇન પ્લૅટફૉર્મ નિષ્ફળ જાય તો આ કારણસર બાળકોને ઇન્ટરનેટથી દૂર રાખવામાં ન આવવાં જોઈએ.
