નૉર્થ ઍટલાન્ટિક ટ્રીટી ઑર્ગેનાઇઝેશન (NATO)ના સભ્ય એવા ૩૨ દેશોની તાજેતરમાં ટર્કીના અંકારામાં સમિટ મળી હતી
૧૯૯૦ના દાયકાની આ રિવૉલ્વરનું હવે ઉત્પાદન નથી થતું અને એ કલેક્ટર્સ આઇટમ ગણાય છે.
નૉર્થ ઍટલાન્ટિક ટ્રીટી ઑર્ગેનાઇઝેશન (NATO)ના સભ્ય એવા ૩૨ દેશોની તાજેતરમાં ટર્કીના અંકારામાં સમિટ મળી હતી. સમિટ પછી ટર્કીના રાષ્ટ્રપતિ તૈયપ એર્દોગને ૩૨ દેશોના નેતાઓને રિટર્ન-ગિફ્ટ તરીકે એક દુર્લભ રિવૉલ્વર ૬ જીવંત કારતૂસો સાથે ભેટમાં આપી. ૧૯૯૦ના દાયકાની આ રિવૉલ્વરનું હવે ઉત્પાદન નથી થતું અને એ કલેક્ટર્સ આઇટમ ગણાય છે. એમ છતાં એ વર્કિંગ કન્ડિશનમાં છે જ. આ ગિફ્ટને માત્ર કૂટનીતિક ભેટ તરીકે જ નહીં, ટર્કીના સંરક્ષણ ઉદ્યોગનો પાવર દર્શાવવાનો વ્યૂહ હોવાનું ગણાવાઈ રહ્યું છે. ટર્કીના નેતાએ તો ભાવથી આ ભેટ આપી, પરંતુ સંરક્ષણના પોતાના આકરા નિયમોને કારણે આ ગિફ્ટનું શું કરવું એ બધા દેશોના નેતાઓ માટે માથાનો દુખાવો બની ગયો. બ્રિટન અને કૅનેડાના વડા પ્રધાન તો આ ભેટને ટર્કીમાં જ પોતાના અધિકારીઓને સોંપીને નીકળી ગયા હતા. એર્દોગને આ ગિફ્ટ સાથે લઈ જઈ શકાય એ માટે એક્સપોર્ટ કન્ટ્રોલમાં છૂટ આપતો પત્ર પણ સાથે આપ્યો હતો, પરંતુ જે દેશમાં એ લઈ જવાની હતી ત્યાંના કડક કાયદાઓને પગલે મોટા ભાગના નેતાઓમાં મૂંઝવણમાં મુકાઈ ગયા હતા. ફ્રાન્સ અને જર્મનીના નેતાઓને પણ આ ગિફ્ટ મળી હતી, પરંતુ મોટા ભાગના નેતાઓએ આ રિવૉલ્વર ટર્કીમાં રહેતા પોતપોતાના દેશના અધિકારીઓને ડીકમિશન કરાવવા માટે આપી દીધી હતી. જ્યારે આ રિવૉલ્વરમાંથી એક પણ ગોળી છોડી ન શકાય એવી રીતે એને ડીકમિશન કરવામાં આવશે પછી જ નેતાઓ એને પોતાના દેશમાં લાવશે. ટૂંકમાં ટર્કીના નેતાએ હોંશે-હોંશે એક્સક્લુઝિવ ગિફ્ટ તો આપી, પણ લેનારા નેતાઓના માથાનો દુખાવો વધી ગયો.
