પાણીપૂરીની રેંકડી પર આવીને ગાયે ઠેલાવાળાને શિંગડાં મારી ગોલગપ્પાની ડિમાન્ડ કરી. દુકાનદારે પાણીપૂરી ખવડાવતાં ગાયે ચટકારો લઈને એક પછી એક વધુ પાણીપૂરી માગી હોવાનો મજેદાર વિડિયો વાઇરલ થયો છે.
બોલો, આ ગાયમાતાને પાણીપૂરી બહુ ભાવે છે
મહિલાઓને તીખી-મીઠી અને ચટપટી ચાટ આઇટમો અને પાણીપૂરી બહુ ભાવે છે એવું કહેવાય છે. જોકે હવે તો ગાયને પણ ચાટ ભાવવા લાગી હોય એવું લાગે છે. સોશ્યલ મીડિયામાં એક પાણીપૂરીની રેંકડીવાળાએ વિડિયો શૅર કર્યો છે. એમાં એક ગાય પાછળથી ઠેલાવાળાને શિંગડાં મારે છે. ઠેલાવાળા માટે આ રોજનું હોય એમ લાગે છે એટલે તે ગાયને પોતાની પાછળથી સાઇડમાં દોરે છે. ઠેલાવાળો બોલતો દેખાય છે, ‘આપું છું મારી મા, ગોલગપ્પા આપું છું.’ દુકાનદાર પાણીપૂરી તૈયાર કરે ત્યાં સુધી ગાય ધીરજ રાખે છે અને ચટપટી પાણીપુરી દુકાનદાર એના મોંમાં નાખે છે ત્યારે જીભ બહાર કાઢીને ચટકારા લઈને એનો સ્વાદ લે છે. માથું હલાવીને વન બાય વન હજી વધુ પાણીપૂરી માગતી ગાયનો વિડિયો બહુ મજાનો છે.
