વિમલા દેવી નામની મહિલા બાળકો માટે કપડાં ખરીદવા ગઈ હતી ત્યારે તેને નસીબ અજમાવવા માટે એક લૉટરી-સ્ટૉલ પરથી ટિકિટ ખરીદવાનું મન થયું. તેણે સિક્કિમ સરકાર દ્વારા બહાર પડેલી માત્ર ૭ રૂપિયાની લૉટરીની ટિકિટ ખરીદી હતી.
વિમલા દેવીને લાગી લૉટરી
કહેવાય છે કે શ્રદ્ધા હોય તો નસીબ આડેથી પાંદડું હટવામાં વાર નથી લાગતી. પંજાબના કોટકપુરામાં મજૂરીકામ કરતા એક પરિવારની કિસ્મત એક લૉટરીની ટિકિટે રાતોરાત પલટી નાખી હતી. વિમલા દેવી નામની મહિલા બાળકો માટે કપડાં ખરીદવા ગઈ હતી ત્યારે તેને નસીબ અજમાવવા માટે એક લૉટરી-સ્ટૉલ પરથી ટિકિટ ખરીદવાનું મન થયું. તેણે સિક્કિમ સરકાર દ્વારા બહાર પડેલી માત્ર ૭ રૂપિયાની લૉટરીની ટિકિટ ખરીદી હતી. એ વખતે તેને કદાચ અંદાજ પણ નહોતો કે અચાનક થયેલું આ મન તેની જિંદગી પલટી નાખશે. બીજા દિવસે સાંજે જ્યારે લૉટરીનું રિઝલ્ટ જાહેર થયું ત્યારે તેની ટિકિટ પર ૧ કરોડ રૂપિયાનો જૅકપૉટ જાહેર થયો હતો. લૉટરી-સ્ટૉલના સંચાલકે વિમલા દેવીને એની જાણ કરતાં ખુશીનો માહોલ છવાઈ ગયો હતો. આખો પરિવાર દુકાને પહોંચ્યો હતો અને મીઠાઈ વહેંચીને અને ભાંગડા કરીને બધાએ સેલિબ્રેટ કર્યું હતું. અચાનક આટલી મોટી રકમ હાથમાં આવતાં એનું શું કરવું છે એ વિમલા દેવીને સમજાઈ નથી રહ્યું. જોકે તેનું કહેવું છે કે પરિવારના સભ્યો સાથે વાતચીત કરીને તે એક નાનો ધંધો શરૂ કરવાનો પ્લાન કરશે જેથી આ રૂપિયાથી તે વધુ રૂપિયા કમાઈ શકે.
