પિન્ક બૉલના બાદશાહોને પહેલા દિવસે જો રૂટ નડ્યો

 

બીજી ઍશિઝ ટેસ્ટ-મૅચમાં ઇંગ્લેન્ડ અને ઑસ્ટ્રેલિયા બન્ને ટીમના ખેલાડીઓ હાથ પર કાળી પટ્ટી પહેરીને આવ્યા છે. બન્ને ટીમે ઇંગ્લૅન્ડના ભૂતપૂર્વ બૅટ્સમૅન રૉબિન સ્મિથને શ્રદ્ધાંજલિ આપી હતી. ૧ ડિસેમ્બરે ૬૨ વર્ષની વયે આ મિડલ ઑર્ડર બૅટરનું અવસાન થયું હતું. તેના મોતનું કારણ હજી પણ સ્પષ્ટ થયું નથી. 

રૉબિન સ્મિથે ૧૯૮૮થી ૧૯૯૬ દરમ્યાન ઇંગ્લેન્ડ માટે ૭૧ વન-ડેમાં ૨૪૧૯ રન અને ૬૨ ટેસ્ટ-મૅચમાં ૪૨૩૬ રન કર્યા હતા. તેણે ૪ વન-ડે સદી અને ૯ ટેસ્ટ-સદી પણ ફટકારી હતી. બાળપણમાં તેના લાંબા અને કર્લી વાળ કોર્ટના જજ જેવા હોવાથી તેને જજ નિકનેમ મળ્યું હતું.

વસીમ અકરમને પછાડીને મિચલ સ્ટાર્ક ટેસ્ટમાં નંબર વન લેફ્ટ આર્મ ફાસ્ટ બોલર બન્યો

પાકિસ્તાનના સુલતાન ઑફ સ્વિંગ વસીમ અકરમને પાછળ છોડીને ટેસ્ટ ક્રિકેટમાં સૌથી વધુ વિકેટ લેનારો ડાબોડી ફાસ્ટ બોલર મિચલ સ્ટાર્ક બની ગયો છે. વસીમ અકરમે ૧૮૧ ઇનિંગ્સમાં ૪૧૪ વિકેટ લઈને આ રેકૉર્ડ બનાવ્યો હતો. ગઈ કાલે મિચલ સ્ટાર્કે ૧૯૫મી ટેસ્ટ-ઇનિંગ્સમાં ૪૧૮ વિકેટ સુધી પહોંચીને આ રેકૉર્ડ તોડ્યો હતો. 
વસીમ અકરમે તેને એક ઇન્ટરવ્યુમાં શુભેચ્છા પાઠવતાં કહ્યું હતું કે ‘સુપરસ્ટાર, તારા પર ગર્વ છે મિત્ર. તારું જબરદસ્ત કાર્ય તને અલગ પાડે છે. તારી શાનદાર કરીઅરમાં નવી ઊંચાઈઓ સુધી પહોંચતો રહે.’
આ સિદ્ધિ છતાં મિચલ સ્ટાર્કે વસીમ અકરમને ટોચનો ડાબોડી બોલર ગણાવ્યો હતો. વસીમ અકરમે ઇન્ટરનૅશનલ ક્રિકેટમાં ડાબોડી ફાસ્ટ બોલર તરીકે સૌથી વધુ ૯૧૬ વિકેટ લીધી છે.

રૂટે ઑસ્ટ્રેલિયન કૉમેન્ટેટર મૅથ્યુ હેડનની આબરૂ બચાવી

ઑસ્ટ્રેલિયાના ભૂતપૂર્વ ક્રિકેટર અને વર્તમાન કૉમેન્ટેટર મૅથ્યુ હેડને ઍશિઝ ટેસ્ટ-સિરીઝ પહેલાં મોટી શરત મૂકી હતી. તેણે કહ્યું હતું કે ઇંગ્લૅન્ડનો જો રૂટ સિરીઝ દરમ્યાન ઑસ્ટ્રેલિયામાં સદી નહીં ફટકારે તો હું મેલબર્ન ક્રિકેટ-ગ્રાઉન્ડમાં નગ્ન થઈને દોડીશ. જો રૂટની બીજી ટેસ્ટ-મૅચની સદી બાદ મૅથ્યુ હેડનની આબરૂ બચી હતી અને તેણે વિડિયો શૅર કરીને સદી માટે શુભેચ્છા પણ પાઠવી હતી. મૅથ્યુ હેડનની દીકરી ગ્રેસ હેડને સોશ્યલ મીડિયા પર રીઍક્શન આપ્યું હતું કે અમારી બધાની આંખો બચાવવા માટે જો રૂટ તારો આભાર.

૧૪ વર્ષની કરીઅરમાં માત્ર બીજી ઘરેલુ ટેસ્ટ-મૅચ ચૂક્યો નૅથન લાયન

૨૦૧૧થી ઑસ્ટ્રેલિયા માટે રમનાર અનુભવી સ્પિનર નૅથન લાયન સ્ક્વૉડમાં હોવા છતાં માત્ર બીજી વખત પ્લેઇંગ ઇલેવનમાં એન્ટ્રી મેળવી શક્યો નથી. તે ૨૦૧૨માં પહેલી વખત ભારત સામેની ઘરેલુ ટેસ્ટ-મૅચ રમવાનું ચૂક્યો હતો. ત્યાર બાદથી હમણાં સુધી તે ઘરઆંગણે રમાયેલી સતત ૬૯ ટેસ્ટ-મૅચ રમ્યો છે. 
પર્થમાં પહેલી ઍશિઝ મૅચ ૮ વિકેટથી જીતનાર પ્લેઇંગ ઇલેવનમાં યજમાન ટીમે બે ફેરફાર કર્યા હતા. 
ઑસ્ટ્રેલિયાએ ઑફ-સ્પિનર નૅથન લાયનના સ્થાને ફાસ્ટ બોલર માઇકલ નેસર અને ઇન્જર્ડ ઓપનર ઉસ્માન ખ્વાજાને બદલે જોશ ઇંગ્લિસને ટીમમાં સામેલ કર્યા હતા.