મુંબઈના વાર્તાકારો કેટલીક નવી વાર્તાઓ રજૂ કરશે મુંબઈની સાહિત્યિક સાંજ ' ઝરૂખો 'માં અવનવા પ્રયોગો થતા રહે છે. ૧ ફેબ્રુઆરી શનિવારે સાંજે ૭.૨૦ વાગ્યે યોજાયેલા કાર્યક્રમમાં જાણીતા નાટ્યલેખક, વાર્તાકાર તથા નવલકથાકાર મધુ રાયની સંગત હશે.
' એક વાર નાટકમાં, આઈ ટેલ યુ ' તથા ' મેં કોઈને કીધું નથી, ડીયર ' એમ બે વાક્યો સર્જક મધુ રાયે આપ્યાં છે જેને સાંકળીને વાર્તાકારો પોતાની ટૂંકી વાર્તાનું સર્જન કરી કાર્યક્રમમાં પઠન કરશે. શ્રોતાઓ પણ સર્જક સાથે સંવાદ કરી શકશે.
મધુ રાય આપણી ભાષાનાં ટોચના સર્જક છે.એમનો પ્રથમ વાર્તાસંગ્રહ હતો ' બાંશી નામે છોકરી ' અને ત્યારબાદ ' રૂપકથા ' ,'કાલસર્પ ' જેવા પ્રયોગશીલ વાર્તાસંગ્રહ એમણે આપ્યા. ' કોઈ પણ એક ફૂલનું નામ બોલો ' તથા ' કુમારની અગાશી ' એમનાં ખૂબ જાણીતાં નાટકો. એમની ' કિમ્બલ રેવન્સવુડ ' નવલકથા પરથી' મિ.યોગી' ટેલિસિરિયલ બની અને પછીથી 'વૉટ્સ યોર રાશિ!' એ નામે હિન્દી ફિલ્મ પણ બની હતી. વાર્તાકાર સંદીપ ભાટિયા, સમીરા પત્રાવાલા , રાજુલ ભાનુશાલી તથા અન્ય એક કે બે વાર્તાકારો પોતાની વાર્તા રજૂ કરશે.
સમગ્ર કાર્યક્રમનું સંચાલન સંજય પંડ્યા કરશે. આ કાર્યક્રમમાં સર્વ કોઈ હાજરી આપી શકે છે. સાઈબાબા મંદિર, બીજે માળે, સાઈબાબા નગર,બોરીવલી પશ્ચિમના સરનામે ૧ ફેબ્રુઆરીએ પહોંચી જશો!