નવા શિખર સાથે હજારી જમ્પ મારીને શૅરબજાર ઑલટાઇમ હાઈના આરે

કર્ણાટક બૅન્ક સિવાયના ૪૦ બૅન્ક-શૅર વધ્યા, બૅન્ક નિફ્ટી વિક્રમી સપાટીએ : અદાણી એન્ટરપ્રાઇઝને બાદ કરતાં તમામ શૅરના સથવારે મેટલ ઇન્ડેક્સ બે ટકા મજબૂત : રિલાયન્સ, અદાણી પોર્ટ્‍સ, લાર્સન, શ્રીરામ ફાઇનૅન્સ, સ્ટેટ બૅન્ક, ઍક્સિસ બૅન્ક જેવી જાતોમાં નવાં શિખર

પ્રતીકાત્મક ફાઇલ તસવીર

ઑલટાઇમ હાઈની નજીક ગયા પછી ૩ દિવસની નરમાઈને એકસાથે સરભર કરવાના મૂડમાં શૅરબજાર બુધવારે તગડા જમ્પમાં ૧૪ મહિનાના નવી ટોચે પહોંચી ગયું છે. સેન્સેક્સ ૧૦૨૨ પૉઇન્ટના ઉછાળે ૮૫,૬૦૯ તથા નિફ્ટી ૩૨૦ પૉઇન્ટના જમ્પમાં ૨૬,૨૦૫ બંધ થયો છે. સેન્સેક્સ આગલા બંધથી ૮૪ પૉઇન્ટ ઢીલો, ૮૪,૫૦૪ ખૂલ્યા બાદ ૮૪,૪૭૮ થઈ તરત પૉઝિટિવ ઝોનમાં આવી ક્રમશઃ વધતો ગયો હતો. એમાં ઉપરમાં ૮૫,૬૪૪ની ટૉપ બની હતી, નિફ્ટીએ ૨૬,૨૧૫ની ૧૪ મહિનાની નવી ઊંચી સપાટી નોંધાવી હતી. ગઈ કાલનો રંગ જોતાં માર્કેટ આજ કાલમાં નવી લાઇફટાઇમ હાઈ બનાવશે એમ ફરી એક વાર લાગી રહ્યું છે. ખાસ્સી સ્ટ્રૉન્ગ માર્કેટ બ્રેડ્થમાં NSE ખાતે વધેલા ૨૧૩૭ શૅરની સામે ત્રીજા ભાગની ૭૦૬ જાતો નરમ હતી. બજારનું માર્કેટકૅપ ૫.૫૬ લાખ કરોડ વધીને ૪૭૪.૯૨ લાખ કરોડ થઈ ગયું છે.

સેન્સેક્સ નિફ્ટીની સવા ટકા જેવી મજબૂતી સામે મેટલ બેન્ચમાર્ક બે ટકા કે ૬૯૩ પૉઇન્ટ પ્લસ હતો. અહીં ૧૩માંથી ૧૨ જાતો વધી હતી, જે દોઢ ટકાથી માંડી પોણાપાંચ ટકા ઊંચકાઈ હતી. અદાણી એન્ટરપ્રાઇઝિસ પોણો ટકો ઘટી ૨૩૧૭ રહી છે. બૅન્ક નિફ્ટી ૫૯,૫૫૫ની સર્વોચ્ચ સપાટી બતાવી ૧.૨ ટકા કે ૭૦૮ પૉઇન્ટ વધી ૫૯,૫૨૮ રહ્યો છે. પીએસયુ બૅન્ક નિફ્ટી ૮૬૬૬ના શિખરે જઈ પોણો ટકો વધી ૮૫૫૨ હતો. બૅકિંગના ૪૧માંથી માત્ર કર્ણાટકા બૅન્ક પ્રૉફિટ બુકિંગમાં ૨.૨ ટકા નરમ હતી. અન્યથા બારેબાર સરકારી બૅન્કો તથા તમામ આનગી બ‌ૅન્કો વધેલી હતી. ફિનો પેમેન્ટ બૅન્ક ૭૨ ગણા વૉલ્યુમે ઉપરમાં ૩૦૫ થઈ દસ ટકાની તેજીમાં ૨૯૨ બંધ આપીને મોખરે હતી. રિલાયન્સના જોરમાં ઑઇલ-ગૅસ ઇન્ડેક્સ ૧.૮ ટકા તથા એનર્જી ઇન્ડેક્સ પોણા બે ટકા વધ્યો છે. કૅપિટલ ગુડ્સ ઇન્ડેક્સ ૧.૭ ટકા કે ૧૧૨૯ પૉઇન્ટ ઝળક્યો હતો. ફાઇનૅન્સ ઇન્ડેક્સ પોણો ટકા, કન્ઝ્યુમર ડ્યુરેબલ સવા ટકો, પાવર ૧.૬ ટકા, યુટિલિટીઝ ૧.૪ ટકા, આઇટી ઇન્ડેક્સ દોઢ ટકા, નિફ્ટી ડિફેન્સ ઇન્ડેક્સ સવા ટકો અપ હતો. ભારતીના ભારમાં ટેલિકૉમ બેન્ચમાર્ક નહીંવત્ ઘટ્યો છે.

ADVERTISEMENT

IT ઇન્ડેક્સના ૭૭માંથી ૬૪ શૅર વધ્યા છે. ઓનવર્ડ ટેક્નૉલૉજીઝ પોણાસાત ટકા, ૬૩ મૂન્સ પાંચ ટકા, ઇન્ફોબીન્સ-બ્લૅક બોક્સ–એએસએમ ટેક્નો પાંચ ટકા ઊંચકાઈને મોખરે હતી. કૅપિટલ ગુડ્સ ઇન્ડેક્સના ૩૬માંથી ૩૨ શૅર વધ્યા છે. કાર્બોરેન્ડમ યુનિવર્સલ પાંચ ટકા, સિમેન્સ ૪.૪ ટકા, એલજી ઇ​ક્વિપમેન્ટ્સ ૪ ટકા ઝળકી છે. AIએ એન્જિનિયરિંગ ૩૮૬૩ના શિખરે જઈ દોઢ ટકો ઘટી ૩૭૭૨ રહી છે. એનર્જી બેન્ચમાર્કના ૩૪માંથી ૨૭ શૅર પ્લસ હતા, પરંતુ ચેન્નઇ પેટ્રો ત્રણ ગણા કામકાજે નીચામાં ૮૯૧ થઈ પોણાબાર ટકા કે ૧૨૦ રૂપિયા લથડી ૮૯૭ રહી છે. હેલ્થકૅર ઇન્ડેક્સના ૧૧૯માંથી વધેલા ૯૧ શૅરમાં SME ફાર્મા સવા સત્તર ટકા, પેનેસિયા બાયોટેક ૧૧ ટકા અને નાટકો ફાર્મા ૧૦.૭ ટકા ઊંચકાઈ હતી. ગુજરાત સરકારની ૭૪ ટકા માલિકીની જીએમડીસી સાડાનવ ટકાની તેજીમાં ૫૩૩ વટાવી ગઈ છે. જ્વેલરી કંપની ગોલ્ડિયમ ઇન્ટરનૅશનલ દોઢા કામકાજે પોણા સાતેક ટકાના જોરમાં ૩૯૮ થઈ છે. 

આઠેક મહિનામાં ૧૩૨ ટકા તેજી સાથે MCX નવી ટૉપમાં ૧૦,૦૦૦ની પાર

MCX ગઈ કાલે ૩ ગણા કામકાજમાં ૧૦,૩૦૯ની નવી ઑલટાઇમ હાઈ બનાવી ૪ ટકા કે ૪૦૩ રૂપિયા વધીને ૧૦,૨૭૪ બંધ થઈ છે. ૧૧ માર્ચે ભાવ ૪૪૧૦ની વર્ષની નીચી સપાટીએ હતો. BSE લિમિટેડ ઉપરમાં ૨૯૦૭ બતાવી દોઢ ટકા વધી ૨૮૮૭ રહી છે. એની સબસિડિયરી CDSL ૧૬૨૬ની ઇન્ટ્રા-ડે હાઈ બાદ ૩ ટકા ઊંચકાઈ ૧૬૨૦ હતી. NSDL સવા ટકો સુધરીને ૧૧૩૨ થઈ છે. ઇન્ડિયન એનર્જી એક્સ. એક ટકો પ્લસ હતી. આગલા દિવસે જંગી કામકાજ સાથે ૨૦ ટકાની ઉપલી સર્કિટમાં ૨૦૦ ઉપર બંધ થયેલી ઓરિએન્ટ ઇલે. ગઈ કાલે અઢી ગણા કામકાજે ઉપરમાં ૨૦૪ બતાવી ૫.૨ ટકા ગગડી ૧૯૦ રહી છે.

છેલ્લા કેટલાક દિવસથી EDની ધાકમાં ખરડાયેલા અનિલ અંબાણીના શૅર ગઈ કાલે ડિમાન્ડમાં હતા. રિલાયન્સ ઇન્ફ્રા ૫ ટકાની ઉપલી સર્કિટમાં ૧૫૯ થઈને ત્યાં જ તથા રિલાયન્સ પાવર ઉપરમાં ૩૯.૭૮ બનાવી છ ટકાના ઉછાળે ૩૯.૫૦ રહી છે. તગડા વૉલ્યુમ સાથે ૩ દિવસની તેજીમાં ૧૧ મહિનાની ટોચે ગયા બાદ કર્ણાટકા બૅન્ક ગઈ કાલે દોઢા કામકાજે ઉપરમાં ૨૧૯ થઈ સવાબે ટકાની પીછેહઠમાં ૨૧૧ બંધ થઈ છે. ફેડરલ બૅન્ક ૨૫૯ નજીક નવી વિક્રમી સપાટી નોંધાવી નજીવી વધી ૨૫૬ હતી. એયુ બૅન્ક ૯૬૨ના બેસ્ટ લેવલે જઈને એક ટકાના સુધારામાં ૯૫૩ થઈ છે.

પીટીસી ઇન્ડસ્ટ્રીઝ બમણા કામકાજે ૧૮,૫૯૭ની સર્વોચ્ચ સપાટી હાંસલ કરીને દોઢ ટકા કે ૨૫૮ રૂપિયા સુધારામાં ૧૮૧૧૮ રહી છે. ડિશ ટીવી ૪ રૂપિયાની ૧લી એપ્રિલ ૨૦૨૦ પછીની વર્સ્ટ બૉટમ બનાવી સવા ટકો વધી ૪.૧૩ રહી છે. ત્યારે ૩.૯૦ની ઑલટાઇમ નીચી સપાટી બની હતી. રિલાયન્સ જેમાં ૫૧ ટકા હોલ્ડિંગ સાથે સહપ્રમોટર છે એ લોટસ ચૉકલેટ ૮૪૩ની ૧૬ મહિનાની બૉટમ બાદ પોણો ટકો ઘટીને ૮૪૯ હતી. ૨૦૨૪ની ૨૬ ઑગસ્ટે અહીં ૨૬૦૯ની વિક્રમી સપાટી બની હતી.

ઍક્સેલ સૉફ્ટનું સાધારણ તો ગૅલાર્ડ સ્ટીલનું દમદાર લિસ્ટિંગ

ગઈ કાલે મુંબઈના લોઅર પરેલની કે. કે. સિલ્ક મિલ્સનો ૧૦ના શૅરદીઠ ૩૮ની અપરબૅન્ડ સાથે ૨૮૫૦ લાખનો BSE SME IPO પ્રથમ દિવસે રીટેલમાં ૧.૩ ગણા સહિત કુલ ૮૦ ટકા તથા ગુજરાતના મહુવા ભાવનગર ખાતેની મધર ન્યુટ્રી ફૂડ્સનો ૧૦ના શૅરદીઠ ૧૧૭ની અપર બૅન્ડ સાથે ૩૯૫૯ લાખનો BSE SME ઇશ્યુ રીટેલમાં ૩૮ ટકા સહિત કુલ એક ગણો ભરાયો છે. ગ્રેમાર્કેટમાં કે.કે.સિલ્કમાં ૩નું પ્રીમિયમ બોલાય છે. નવી દિલ્હીની SSMD ઍગ્રોટેક ઇન્ડિયાનો ૧૦ના શૅરદીઠ ૧૨૧ની અપર બૅન્ડ સાથે ૩૪૦૯ લાખનો BSE SME ઇશ્યુ બીજા દિવસના અંતે રીટેલમાં ૧.૪ ગણા સહિત કુલ ૯૨ ટકા ભરાયો છે. પ્રીમિયમ નથી.

મેઇન બોર્ડમાં ઍક્સેલ સૉફ્ટ ટેક્નૉલૉજીઝ ૧૦ના શૅરદીઠ ૧૨૦ની ઇશ્યુ પ્રાઇસ તથા ગ્રેમાર્કેટ ખાતે ૩૦થી શરૂ થઈ છેલ્લે ૪ રૂપિયા થઈ ગયેલા પ્રીમિયમ સામે ગઈ કાલે ૧૩૫ ખૂલી ઉપરમાં ૧૪૨ વટાવી નીચામાં ૧૨૫ થયા બાદ ૧૨૬ બંધ રહેતાં એમાં પાંચ ટકા લિસ્ટિંગ ગેઇન મળ્યો છે. SME કંપની ગૅલાર્ડ સ્ટીલ ૧૦ના શૅરદીઠ ૧૫૦ની ઇશ્યુ પ્રાઇસ તેમ જ ગ્રેમાર્કેટમાં ૧૧થી શરૂ થઈ ઉપરમાં ૭૦ થયા બાદ છેલ્લે બોલાતા ૬૩ના પ્રીમિયમ સામે ૨૨૩ ખૂલી ઉપલી સર્કિટમાં ૨૩૪ વટાવી ત્યાં જ બંધ થતાં એમાં ૫૬ ટકા કે શૅરદીઠ ૮૪ રૂપિયાનો દમદાર લિસ્ટિંગ ગેઇન છૂટ્યો છે. બરોડાની સુદીપ ફાર્માનું લિસ્ટિંગ શુક્રવારે છે. પ્રીમિયમ ૮૬થી વધીને હાલ ૯૬ ચાલે છે.

સેન્સેક્સ, નિફ્ટીના સંખ્યાબંધ શૅરમાં નવા ઊંચા ભાવ દેખાયા

ગઈ કાલે સેન્સેક્સ, નિફ્ટીના ઘણા શૅરમાં નવાં બેસ્ટ લેવલ બન્યાં છે. રિલાયન્સ ૧૫૭૨ની ૧૪ મહિનાની નવી ટોચે જઈને બે ટકા વધીને ૧૫૭૦ બંધમાં બજારને ૧૭૬ પૉઇન્ટ ફળી છે. ઍક્સિસ બૅન્ક ૧૨૯૩ની વિક્રમી સપાટી બનાવી પોણાબે ટકા વધીને ૧૨૮૮ બંધ થતાં એનું માર્કેટકૅપ ૪ લાખ કરોડની સાવ નજીક ગયું છે. સ્ટેટ બૅન્ક ૪ આંકડે જવાની તૈયારીમાં છે. ભાવ ૯૯૯ ઉપર સર્વોચ્ચ સપાટીએ જઈ નજીવી વધીને ૯૮૪ હતો. બૅન્કિંગ સેક્ટરના અન્ય શૅરમાં બૅન્ક ઑફ ઇન્ડિયા, કૅનેરા બૅન્ક, ફેડરલ બૅન્ક, એયુ બૅન્ક જેવી જાતોમાં નવા ઊંચા ભાવ થયા છે. શ્રીરામ ફાઇનૅન્સ ૮૫૮ની નવી ઊંચી સપાટી નોંધાવી ૨.૩ ટકાની આગેકૂચમાં ૮૫૭ રહી છે. લાર્સન ૪૦૭૫ની લાઇફટાઇમ હાઈ બાદ દોઢ ટકો વધીને ૪૦૬૧ હતો. અદાણી પોર્ટ્સ ૧૫૨૩ની ઐતિહાસિક ટૉપ દેખાડી દોઢ ટકા વધી ૧૫૦૬ રહી છે.

નિફ્ટી ખાતે JSW સ્ટીલ ૩.૮ ટકાની તેજીમાં ૧૧૫૪ બંધ આપીને ઝળકી છે સેન્સેક્સમાં બજાજ ફિન સર્વ ૨.૬ ટકા વધીને ૨૦૮૩ તથા બજાજ ફાઇનૅન્સ અઢી ટકા વધીને ૧૦૧૧ હતી. HDFC બૅન્ક ૧.૪ ટકા વધીને ૧૦૦૪ બંધમાં બજારને સર્વાધિક ૧૮૧ પૉઇન્ટ લાભદાયી નીવડી છે. ICICI બૅન્ક સવા ટકા તો કોટક બૅન્ક ૧.૪ ટકા પ્લસ હતી. તાતા મોટર્સ પૅસેન્જર બમણા કામકાજે ૧.૯ ટકા વધી ૩૫૯ રહી છે, તાતા સ્ટીલ બે ટકાની મજબૂતીમાં ૧૭૦ હતી. મારુતિ સુઝુકી દોઢ ટકા કે ૨૩૫ રૂપિયા અને બજાજ ઑટો ૧૦૬ રૂપિયા કે ૧.૮ ટકા, અલ્ટ્રાટેક દોઢ ટકા, ટેક મહિન્દ્ર ૧.૭ ટકા, TCS ૧.૪ ટકા, HCL ટેક્નો ૧.૧ ટકા, વિપ્રો ૧.૮ ટકા ઍટર્નલ ૧.૪ ટકા, જિયો ફાઇનૅન્શિયલ ૨.૩ ટકા, ઇન્ડિગો સવાબે ટકા, ગ્રાસિમ બે ટકા, કોલ ઇન્ડિયા બે ટકા, હિન્દાલ્કો દોઢ ટકા વધી હતી. ભારતી ઍરટેલમાં પ્રમોટર્સ મિતલ ફૅમિલી તરફથી બ્લૉક ડીલ મારફત ૭૧૯૩ કરોડનો માલ વેચાવા આવતાં ભાવ નીચામાં ૨૧૦૦ થઈ ૧.૬ ટકાના ઘટાડામાં ૨૧૨૭ બંધ રહ્યો છે.

આગલા દિવસે તગડા જમ્પ બાદ કેપેલરી ટેક્નો. ગઈ કાલે ૭૯૯ની નવી ઊંચી સપાટી નોંધાવી ૬.૫ ટકા ગગડી ૬૮૮ રહી છે. ફ્યુજિયામા પાવર ૪.૪ ટકા ઘટીને ૨૧૦, ફિઝિક્સવાલા ૨.૭ ટકા ઘટી ૧૩૨, પાઇન લૅબ્સ ૨.૨ ટકા ઘટી ૨૪૦, ગ્રોફેમ બિલિયન બ્રેઇન્સ એક ટકો સુધરીને ૧૬૩ બંધ હતી. વર્કમેટ્સ પાંચ ટકાની ઉપલી સર્કિટમાં ૪૦૫ની નજીક જઈ ત્યાં જ બંધ આવી છે. 

મૅજેલૅનિક ક્લાઉડ : સપ્તાહમાં ૧૭૫૦ કરોડની મૂડી સાફ થઈ ગઈ

અગાઉ સાઉથ ઇન્ડિયા પ્રોજેક્ટ્સ તરીકે ઓળખાતી હૈદરાબાદી કંપની મૅજેલૅનિક ક્લાઉડ સતત ધોવાણમાં છે. શૅર ગઈ કાલે ૪ ગણા કામકાજે ૩૭ના વર્સ્ટ લેવલે ૨૦ ટકાની નીચલી સર્કિટમાં દેખાયો છે. આ સાથે સપ્તાહમાં ભાવ ૪૫ ટકા સાફ થઈ ગયો છે. બેની ફ્રેશ વૅલ્યુવાળો આ શૅર ૧૭ જુલાઈના રોજ ૧૦૫ના શિખરે હતો. ભાવ જે રીતે વૉલ્યુમ સાથે લથડ્યો છે એ જોતાં કંપનીમાં ક્યાંક કશુંક ખરાબ થયું હોવાની શંકા વધી રહી છે, પરંતુ મૅનેજમેન્ટ હજી સુધી મૌન છે. શૅર ટૂંકમાં ઍડિશનલ સર્વિવિયન્સ મેકૅનિઝમ હેઠળ જાય તો નવાઈ નહીં. કંપનીમાં પ્રમોટર્સ હોલ્ડિંગ ૫૭.૮ ટકા છે એમાંથી ૧૯ ટકા માલ ગિરવી છે. અન્ય કંપની હિપોલિનમાં ગઈ કાલે ૬૪ની ૩૫ મહિનાની બૉટમ બનાવી ૫ ટકા તૂટી ૬૪ ઉપર રહી છે. ૭૦ ટકા પ્લસનું પ્રમોટર્સ હોલ્ડિંગ ધરાવતી આ અમદાવાદી કંપની ૧૨ ડિસેમ્બરે ૨૨૭ની સર્વોચ્ચ સપાટીએ ગઈ હતી. કંપની બે વર્ષથી ખોટમાં ચાલે છે.

HDFC ઍસેટ મૅનેજમેન્ટ શૅરદીઠ એક બોનસમાં ઍક્સ બોનસ થતાં ગઈ કાલે ઉપરમાં ૨૭૦૦ નજીક જઈને સાધારણ વધી ૨૬૮૧ રહી છે. થાઇરોકૅર ટેક્નૉ. એક શૅરદીઠ બે બોનસમાં શુક્રવારે એક્સ બોનસ થવાની છે. ભાવ ગઈ કાલે ઉપરમાં ૧૫૨૧ બનાવી સામાન્ય સુધારે ૧૪૯૩ હતો. હીરોમોટોકૉર્પ ૬૧૪૪ની લગભગ ૧૪ મહિનાની નવી ટૉપ નોંધાવી પોણો ટકો વધીને ૬૧૪૬નું બેસ્ટ લેવલ બન્યું હતું. જ્યારે ૨૦૨૫ની ૭ એપ્રિલે ભાવ નવેમ્બર ૨૦૨૩ પછીના તળિયે ૩૩૨૨ દેખાયો હતો.

રાવલગાંવ સુગર પાંખા કામકાજે ૯૯૯ની વર્ષની બૉટમ બતાવી પોણો ટકો સુધરી ૧૦૧૦ થઈ છે. ૪ ડિસેમ્બરના રોજ ભાવ ૧૮૦૦ની ટોચે હતો. સમ્રાટ ફાર્મા બમણા વૉલ્યુમે ૨૫૧ની વર્ષની નીચી સપાટી નોંધાવી બાઉન્સ બૅકમાં ૨૭૨ થઈને ૩.૮ ટકા ઘટી ૨૫૫ રહી છે. આઇઆઇએફએલ ફાઇનૅન્સ દોઢા કામકાજે ૫૭૭ના શિખરે જઈને ૨.૭ ટકા વધીને ૫૭૨ બંધ થઈ છે.