હું મારું ડ્રીમ ગર્લનું ટાઇટલ ઐશ્વર્યાને આપવા માગું છું

ઐશ્વર્યાએ એક વાર કઈ રીતે તેમની કાળજી રાખી હતી એ પ્રસંગ બયાન કર્યો હેમા માલિનીએ

ઐશ્વર્યા રાય બચ્ચન અને હેમા માલિની

હેમા માલિની અને ઐશ્વર્યા રાય બચ્ચન બન્નેએ પોતપોતાના સમયમાં ઍક્ટિંગ અને પડદા પરની હાજરીથી ફૅન્સને ખૂબ પ્રભાવિત કર્યા છે. હેમાએ પોતાની સુંદરતા માટે ‘ડ્રીમ ગર્લ’નો ખિતાબ મેળવ્યો હતો. જોકે થોડા સમય પહેલાં હેમાએ એક ઇન્ટરવ્યુમાં ઐશ્વર્યાને પોતાની ‘ડ્રીમ ગર્લ’ ગણાવી હતી.

આ ઇન્ટરવ્યુમાં હેમાએ કહ્યું હતું, ‘આજની દરેક અભિનેત્રી કોઈ ડ્રીમ ગર્લથી કમ નથી. દરેક યુવતી સુંદર છે. દરેકે પોતાનું આગવું સ્થાન બનાવ્યું છે, ખાસ કરીને ઐશ્વર્યાએ. હું મારું આ ‘ડ્રીમ ગર્લ’નું ટાઇટલ ઐશ્વર્યાને આપવા માગું છું.’

ADVERTISEMENT

પોતાના ઇન્ટરવ્યુમાં હેમાએ ઐશ્વર્યા સાથેના પોતાના અનુભવ વિશે જણાવતાં કહ્યું હતું કે ‘૨૦૧૭માં મુંબઈમાં દાદાસાહેબ ફાળકે અવૉર્ડ્સનું આયોજન થયું હતું, જ્યાં ઐશ્વર્યા પણ હાજર હતી. સમારોહ પૂરો થયા પછી હું મારી કારની રાહ જોઈ રહી હતી. ડ્રાઇવરે મારી કારને થોડી દૂર પાર્ક કરી હતી એટલે તેને આવવામાં સમય લાગી રહ્યો હતો. મારો ડ્રાઇવર ન આવ્યો ત્યાં સુધી ઐશ્વર્યા મારી સાથે ઊભી રહી અને મને કહ્યું કે તમારી કાર આવી જાય ત્યાર પછી જ હું જઈશ. એ સમયે સેલ્ફી લેવા માટે મોટી સંખ્યામાં ફૅન્સ મારી નજીક ધસી આવ્યા હતા ત્યારે મને કોઈ ઈજા ન થાય એ માટે ઐશ્વર્યાએ મારી બહુ કાળજી લીધી. તે બહુ સારી વ્યક્તિ છે.’