મસ્કની સંપત્તિમાં એક જ દિવસમાં ૧૫૨ અબજ ડૉલરનું ધોવાણ

શૅરબજારમાં સ્પેસઍક્સના શૅરમાં ૧૬.૪ ટકાના કડાકા બાદ અફરાતફરી, ૧૬ જૂનની પીકથી કંપનીની માર્કેટવૅલ્યુ ૯૨૮ અબજ ડૉલર ઘટી

ઇલોન મસ્ક

અમેરિકાના શૅરબજારમાં ઈલૉન મસ્કની સ્પેસઍક્સ કંપનીના શૅરમાં સોમવારે ૧૬.૪ ટકાનો મોટો કડાકો બોલાયો હતો. આ ઘટાડા સાથે શૅરની કિંમત ૧૫૫ ડૉલરની નીચે આવી ગઈ હતી, જે એના લિસ્ટિંગના પ્રથમ દિવસના બંધ ભાવ કરતાં પણ ઓછી હતી. ફૉર્બ્સના અહેવાલ મુજબ આ કડાકાને કારણે વિશ્વના સૌથી અમીર બિઝનેસમૅન ઈલૉન મસ્કની નેટવર્થમાંથી માત્ર એક જ દિવસમાં ૧૫૨ અબજ ડૉલર ધોવાઈ ગયા હતા. ૧૬ જૂને મસ્કની સંપત્તિ ૧.૪૫ ટ્રિલ્યન ડૉલરના ઑલટાઇમ હાઈ પર હતી જે ઘટીને ૧.૧ ટ્રિલ્યન ડૉલરની અંદર પહોંચી ગઈ હતી. મસ્ક કંપનીમાં આશરે ૩૮ ટકા હિસ્સો ધરાવે છે.

કંપનીના શૅરમાં આ મોટો ઘટાડો વૈશ્વિક સ્ટૉક માર્કેટ ઇન્ડેક્સ પ્રોવાઇડર MSCI દ્વારા સ્પેસઍક્સને CCC રેટિંગ આપ્યા બાદ આવ્યો હતો. સંસ્થાએ કંપનીના નબળા ગવર્નન્સ અને પર્યાવરણીય જોખમોના નબળા સંચાલનને કારણે આ સૌથી નીચું રેટિંગ આપ્યું છે. આ કડાકા સાથે કંપનીની માર્કેટવૅલ્યુ ૨.૯૯ ટ્રિલ્યન ડૉલરથી ઘટીને બે ટ્રિલ્યન ડૉલર થઈ ગઈ હતી. આ જ કારણે સ્પેસઍક્સ વિશ્વની ચોથી સૌથી મોટી કંપનીમાંથી સરકીને હવે ઍમૅઝૉન અને માઇક્રોસૉફ્ટથી પાછળ સાતમા સ્થાને આવી ગઈ હતી.