ધરમજી નહોતા ઇચ્છતા કે હું રાજકારણમાં આવું

હેમા માલિનીએ વર્ષો બાદ કર્યો ખુલાસો

હેમા માલિની

ઍક્ટ્રેસ અને ભારતીય જનતા પાર્ટીનાં સંસદસભ્ય હેમા માલિની છેલ્લાં ૧૨ વર્ષથી લોકસભામાં મથુરાનું પ્રતિનિધિત્વ કરી રહ્યાં છે. હાલમાં તેમણે ખુલાસો કર્યો કે જ્યારે તેમણે રાજકારણમાં આવવાનો નિર્ણય લીધો હતો ત્યારે તેમના પતિ અને અભિનેતા ધર્મેન્દ્ર આ નિર્ણયના સમર્થનમાં નહોતા. હેમા માલિનીએ જણાવ્યું કે રાજકારણમાં આવવા માટે તેમને તેમનાં માતાએ પ્રોત્સાહિત કર્યાં હતાં અને વિનોદ ખન્નાએ તેમને માર્ગદર્શન આપ્યું હતું. જોકે ધર્મેન્દ્ર પત્ની હેમાના આ નિર્ણયથી ખુશ નહોતા અને એનું મુખ્ય કારણ રાજકારણમાં તેમનો પોતાનો અનુભવ હતો.
હેમા માલિનીએ પોતાનો અનુભવ જણાવતાં કહ્યું હતું કે ‘રાજકારણમાં પ્રવેશ કર્યા બાદ BJP મને ચૂંટણીપ્રચાર માટે દેશના વિવિધ ભાગોમાં મોકલતી હતી. હું જ્યારે પ્રચાર માટે જતી ત્યારે ધરમજીને મારી સુરક્ષાની સતત ચિંતા રહેતી હતી. એ સમયે તેઓ વારંવાર પૂછતા કે તને વિશ્વાસ છેને કે આટલી ભીડમાં તું સુરક્ષિત રહેશે? હેલિકૉપ્ટરમાં મુસાફરી કરતી વખતે પણ તેમને ચિંતા થતી હતી.’