° °

આજનું ઇ-પેપર
Monday, 25 October, 2021


વરાળથી સાબુદાણા પાકે એટલે એનો એકેક દાણો સ્વાદમાં સરખો લાગે

02 September, 2021 04:12 PM IST | Mumbai | Sanjay Goradia

ઇન્દોર સ્ટાઇલના પૌંઆ તો તમે ટેસ્ટ કર્યા હશે, પણ એ જ સ્ટાઇલની સાબુદાણાની ખીચડી ટેસ્ટ કરવી હોય તો ઓલ્ડ નાગરદાસ રોડ પરના શ્રી સાંવરિયામાં જવું પડે

વરાળથી સાબુદાણા પાકે એટલે એનો એકેક દાણો સ્વાદમાં સરખો લાગે

વરાળથી સાબુદાણા પાકે એટલે એનો એકેક દાણો સ્વાદમાં સરખો લાગે

ફ્રેન્ડ્સ ગયા અઠવાડિયે આપણે અંધેરી-ઈસ્ટના ઓલ્ડ નાગરદાસ રોડ પર સૅલડનો ટેસ્ટ કર્યો અને આ અઠ‌વાડિયે પણ આપણે એ જ એરિયામાં રહેવાનું છે. ઓલ્ડ નાગરદાસ રોડ પર જ તમને મજા પડી જાય એવી વરાઇટી મળી જવી એ યોગાનુયોગ માત્ર છે. એમાં બન્યું એવું કે મંગળવારે હું અને મારો રાઇટર-ફ્રેન્ડ રાહુલ પટેલ, અમે બન્ને શેમારુમાં મીટિંગ માટે ગયા. મારા હોમ પ્રોડક્શનમાં બનતી પહેલી વેબ સીરિઝનો રાઇટર આ રાહુલ જ છે. રાહુલે ઘણા ટીવી શો લખ્યા છે, ખૂબ ટેલન્ટેડ રાઇટર છે. એનીવેઝ, અમે મ‌ીટિંગ પૂરી કરીને બન્ને નીકળ્યા ત્યારે વાગી ગયો હતો બપોરના અઢી. મેં રાહુલને કહ્યું કે હવે લંચ-ટાઇમ જ છે તો ચાલ, ક્યાંક લંચ કરીએ...પણ રાહુલે ના પાડતાં કહ્યું કે ના, આજે તમે નહીં પણ હું તમને સરસ જગ્યાએ લઈ જઉં.
- અને રાહુલ મને ઓલ્ડ નાગરદાસ રોડ પર લઈ ગયો. 
આ વાત થઈ યોગાનુયોગની. હવે આવી જઈએ આપણે ફરીથી આપણી ફૂડ ડ્રાઇવ પર. ઓલ્ડ નાગરદાસ રોડ પર તમે જેવા દાખલ થાઓ કે તમારી રાઇટ સાઇડ પર ચિનાઈ કૉલેજ આવે. આ ચિનાઈ કૉલેજની સામે રસ્તા પર સાબુદાણાની ખીચડીવાળો બેસે છે. સાચું કહું, સાબુદાણાની ખીચડી જોઈને મારો મૂડ મરી ગયો હતો. મને થયું કે શું આવી ખીચડી-બીચડી ખાવાની, પણ મન મારીને મેં મનોમન નક્કી કર્યું કે અત્યારે ચૂપચાપ ખાઈ રવાના થઈ જાઓ, પછી આગળ ક્યાંક સરસ જગ્યાએ જમી લઈશ...પણ સાહેબ, આપણે ખોટા પડ્યા. ખીચડી અદ્ભુત એવી કે ન પૂછો વાત, બસ ખાઈને જ અનુભવ થઈ શકે એનો. સાબુદાણાની એક ખાસિયત છે, એનો એકેક દાણો સરખો પલળવો જોઈએ. જો અમુક દાણાઓ વધારે પલળી જાય અને અમુક બરાબર ન પલળ્યા હોય તો એ ખાવાની મજા ન આવે, પણ શ્રી સાંવરિયા સાબુદાણા ખીચડીને આ વાત લાગુ નથી પડતી.
એકદમ સૉફ્ટ, એકબીજામાં ઓતપ્રોત થઈ ગયા હોય એવા અને એ પછી પણ રીતસર એકબીજાથી છૂટા પડી જાય એવા સાબુદાણા. નામ પૂરતાં કહી શકાય એટલાં બટેટાં. આપણે ત્યાં કહે સાબુદાણાની ખીચડી, પણ એમાં એટલા બટાટા નાખ્યા હોય કે આપણને એવું લાગે કે બટાટાનું નામ પણ ન લો તો બટાટાને માઠું નહીં લાગતું હોય. રામજાણે, ના, બટાટા જાણે. શ્રી સાંવરિયાની ખીચડીમાં એવું નથી બન્યું એ સારી વાત છે. સાબુદાણાની આ ખીચડી પર ઇન્દોરથી ખાસ મગાવવામાં આવતો ફરાળી ચેવડો પણ નાખવામાં આવે છે. એકચ્યુઅલી આ જે ખીચડી છે એ પણ ઇન્દોરી સ્ટાઇલની છે.
ઇન્દોર જ નહીં, આખા મધ્ય પ્રદેશમાં સવારનો ફેવરિટ નાસ્તો જો કોઈ હોય તો એ પૌંઆ છે. આ પૌંઆને નીચેથી વરાળ આપી એને પકવવામાં આવે છે અને એવી જ રીતે સાબુદાણાની ખીચડીને પણ વરાળથી પકવવામાં આવે છે. આ એની પહેલી અને મોટી ખાસિયત. હવે વાત કરીએ બીજી ખાસિયતની. આ બીજી ખાસિયત એટલે ઇન્દોરી લાલ મસાલા. હા, લાલ રંગના આ મસાલામાં લવિંગ, કાળા મરી, સીંધાલૂણ, ઇલાયચી જેવી વરાઇટી નાખવામાં આવી હોય છે. એનો જે લાલ રંગ છે એ ખાંડેલા તજને આભારી છે. આ જે મસાલો છે એ મસાલો ખીચડીને ચાર ચાંદ લગાવે છે.
સૌથી સારી વાત કહું તમને. આ ખીચડી બનાવતી વખતે ક્યાંય પણ એવી બેદરકારી રાખવામાં નથી આવતી કે જેને લીધે ઉપવાસ રાખનારાઓનું વ્રત તૂટે. આ બધી બાબતમાં લોકો બેદરકારી દાખવતા હોય છે, પણ અહીં બેદરકારી દાખવવામાં નથી આવતી. 
ખીચડી સાથે છાશ અને લસ્સી પણ મળે છે. છાશના દસ રૂપિયા, લસ્સીના વીસ રૂપિયા અને સાબુદાણાની ખીચડી ત્રીસ રૂપિયાની. છેલ્લાં અઢાર વર્ષથી એક જ જગ્યા પર બેસીને ખીચડી બનાવતા આ મહારથીની ખીચડી છેક જુહુ અને બાંદરા સુધી જાય છે. અંધેરી-ઈસ્ટ જવાનું ક્યારેય બને તો આ ખીચડી ટેસ્ટ કરવાનું ચૂકતા નહીં.

02 September, 2021 04:12 PM IST | Mumbai | Sanjay Goradia

અન્ય લેખો

ફૂડ એન્ડ રેસિપીઝ

દાબેલી અને કચ્છી મિસળનો આ સ્વાદ માણવાનું ચૂકતા નહીં

મલાડની એન. એલ. હાઈ સ્કૂલ પાસે મળતી આપણી આ બન્ને ટ્રેડિશનલ વરાઇટીમાં મસાલા સિંગ એવો અદ્ભુત રોલ ભજવે છે કે એને શબ્દોમાં વર્ણવવો અઘરો પડે

21 October, 2021 10:26 IST | Mumbai | Sanjay Goradia
ફૂડ એન્ડ રેસિપીઝ

ટૂ ઇન વન

એક રોલમાં બે ફ્લેવર પીરસતું ક્લાઉડ કિચન ‘કુડો’ રોલ ઉપરાંત મેક્સિકન, જૅપનીઝ અને લેબનીઝ બાઉલ મીલ્સની એવી વરાઇટીઝ પીરસે છે જે તમને ઘેરબેઠાં ભાગ્યે જ ક્યાંય મળતી હોય. અમે એના શૅરેબલ રોલ્સ અને કેટલાક બોલ્સ ટ્રાય કર્યા એ કેવા લાગ્યા એ વાંચો

21 October, 2021 10:15 IST | Mumbai | Sejal Patel
ફૂડ એન્ડ રેસિપીઝ

અન્ન બચાવો, અન્ન તમને બચાવશે

પબ્લિક ઇવેન્ટ્સમાં થતા ફૂડના વેડફાટને અટકાવી, એને કલેક્ટ કરીને ગરીબોના પેટની આગ ઠારવાનું કાર્ય કરે છે. આજે વર્લ્ડ ફૂડ ડે પ્રસંગે તેમના ભગીરથ કાર્યને બિરદાવીએ

16 October, 2021 07:47 IST | Mumbai | Varsha Chitaliya

This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK