શારીરિક સંબંધોમાં સ્વાર્થી બનવાથી લાઇફમાં સ્ટ્રેસ વધે છે

ત્રણ-ચાર વર્ષ પહેલાં એક ટીવી-ચૅનલે આ બાબતનો સર્વે પણ કર્યો હતો. એ સર્વેમાં જે આંકડાઓ આવ્યા હતા એ વાંચો તો તમને ધ્રુજારી આવી જાય.

પ્રતીકાત્મક તસવીર

વાતની શરૂઆત કરતાં પહેલાં એક ગુજરાતી શબ્દનો ભાવાર્થ સમજવો જરૂરી છે. એ શબ્દ છે સંભોગ. સેક્સ માટે ગુજરાતીમાં આ શબ્દ છે જેનો ભાવાર્થ ખૂબ જ સરસ છે. સમાન સ્તર પર જે ભોગ માણવામાં આવે એ સંભોગ. હવે મૂળ વાત પર આવીએ.

હમણાં એક કપલને મળવાનું થયું. કાઉન્સેલિંગ માટે આવેલા એ કપલના મૅરેજને હજી માંડ એકાદ વર્ષ થયું હતું અને હવે એ કપલને ડિવૉર્સ જોઈતા હતા. કાઉન્સેલિંગ દરમ્યાન વાઇફના મૂડ-સ્વિંગ્સ વિશે ખબર પડી અને એ મૂડ-સ્વિંગ્સના મૂળમાં જતાં ખબર પડી કે વાંક તે બન્નેના સ્વભાવનો નહીં, તેમની ઇન્ટિમેટ રિલેશનશિપનો છે અને ઇન્ટિમેટ રિલેશનશિપમાં બન્ને મોટા ભાગે સ્વાર્થી થઈને રહી જાય છે, જેને લીધે સંબંધોમાં તનાવ ઊભો થયો છે.

ADVERTISEMENT

સાંભળવામાં થોડું વિચિત્ર લાગી શકે, પણ આ હકીકત છે. જો ઇન્ટિમેટ રિલેશનશિપ દરમ્યાન પાર્ટનરને શું જોઈએ છે એ જાણવાની કે સમજવાની દરકાર કરવામાં ન આવે તો એની સીધી અસર પર્સનલ લાઇફ પર પડતી હોય છે. સંતુષ્ટિ. ગુજરાતી ભાષાનો આ બહુ સરસ શબ્દ છે. જો અંગત સંબંધોમાં સંતુષ્ટિ ન હોય તો ચોક્કસપણે એ અસંતોષ વ્યવહારમાં બહાર આવે અને અસંતોષની લાગણી અન્ય કોઈ જગ્યાએ ઉગ્રતા સાથે બહાર આવે. અફસોસની વાત એ છે કે આજે જ્યારે મૉડર્ન સાયન્સનો જમાનો છે ત્યારે પણ આ વાત પુરુષો સમજી નથી શક્યા. પર્સનલ કે પ્રાઇવેટ લાઇફમાં પહેલાં પણ પુરવાર થયું હતું અને આજે પણ એ જ સાબિત થતું રહ્યું છે કે ઇન્ટિમેટ રિલેશનશિપમાં પુરુષો સેલ્ફિશ રહ્યા છે અને પરિણામે વાઇફના ભાગમાં અસંતોષ જ રહે છે. ત્રણ-ચાર વર્ષ પહેલાં એક ટીવી-ચૅનલે આ બાબતનો સર્વે પણ કર્યો હતો. એ સર્વેમાં જે આંકડાઓ આવ્યા હતા એ વાંચો તો તમને ધ્રુજારી આવી જાય.

ઇન્ટિમેટ રિલેશનશિપમાં પુરુષોના સ્વાર્થીપણાને લીધે એક્સ્ટ્રામૅરિટલ રિલેશનશિપની પહેલ વાઇફ દ્વારા શરૂ થઈ ગઈ છે. સેક્સોલૉજિસ્ટની કરીઅર દરમ્યાન આ વાત અનેક કિસ્સાઓમાં જોઈ પણ છે. ઇન્ટિમેટ રિલેશન એકપક્ષીય આનંદના સંબંધો નથી. એ બન્ને પક્ષે સરખો આનંદ આપે તો જ પૂર્ણતાનો અનુભવ થાય. સમાન સ્તર પર ભોગ આપો અને સમાન સ્તર પર ભોગ પામો એનું નામ સંભોગ. જોકે અફસોસ છે કે પુરુષોમાં આ સમજણ ઓછી જોવા મળે છે અને એને લીધે મૅરેજ-લાઇફમાં સ્ટ્રેસ વધી રહ્યું છે, કારણ કે આજની વાઇફ પોતાની ડિમાન્ડ માટે ક્લિયર છે. તે ચૂપ બેસી રહેવાને બદલે મોટા અવાજે છણકો કરી જાણે છે.