૧૫ વર્ષની ટીનેજર પર અંબાજી ગબ્બર નજીક ગૅન્ગ-રેપ

ઓળખીતો યુવાન બાઇક પર બેસાડીને સગીરાને અવાવરું જગ્યાએ લઈ ગયો, ત્યાં યુવકોએ મોઢામાં ડૂચો મારીને બળાત્કાર કર્યો

અંબાજી પોલીસે આરોપીનું જાહેર કરેલું પોસ્ટર.

ઉત્તર ગુજરાતમાં આવેલા શક્તિપીઠ અંબાજી ગબ્બર નજીક ૧૫ વર્ષની સગીર છોકરીના મોઢામાં ડૂચો મારી ૬ યુવકો ગૅન્ગ-રેપ કરીને તેને અર્ધબેભાન હાલતમાં છોડીને ફરાર થઈ ગયા હતા. સોમવારે બનેલી આ ઘટનામાં આરોપીઓને ઝડપી લેવા અંબાજી પોલીસે કાર્યવાહી હાથ ધરી છે. એટલું જ નહીં, અંબાજી પોલીસે મુખ્ય આરોપી લાલા પરમારનાં ફોટો સાથેનાં પોસ્ટર બહાર પાડીને તેને મોસ્ટ વૉન્ટેડ જાહેર કર્યો છે.

૪ નવેમ્બરે સગીરા તેના રિલેટિવને ત્યાં જવા માટે ગબ્બર સર્કલ પાસે ઊભી હતી એ વખતે તેને ઓળખતો એક યુવાન આવ્યો હતો અને બાઇક પર બેસાડીને ગબ્બરથી બે ત્રણ કિલોમીટર દૂર છાપરી રોડ તરફ અવાવરું જગ્યાએ લઈ ગયો હતો. ત્યાં સગીરા પર ૬ યુવકોએ વારાફરતી બળાત્કાર કર્યો હતો. સગીરા બૂમો ન પાડે એ માટે તેના મોઢામાં ડૂચો મારી દેવાયો હતો. આ જઘન્ય ઘટના વિશે સગીરાની માતાએ અંબાજી પોલીસમાં ફરિયાદ કરતાં પોલીસે આરોપીઓને ઝડપી લેવા ચક્રો ગતિમાન કર્યાં છે.

ADVERTISEMENT

અંબાજી પોલીસે ‘મિડ-ડે’ને કહ્યું હતું કે ‘ઘોડાટાકણી ખાતે રહેતા આ કેસના મુખ્ય આરોપી લાલા નાના પરમારને મોસ્ટ વૉન્ટેડ જાહેર કરીને તેનાં પોસ્ટર બહાર પાડ્યાં છે અને કોઈને પણ આ ઇસમ દેખાય તો અંબાજી પોલીસને જાણ કરવા જણાવ્યું છે.’