ત્રણ-ત્રણ કલાક સુધી પોતાનાં સગાં ક્યાં છે એની કોઈ માહિતી નહીં મળતાં સ્વજનો બેબાકળાં બની ગયાં :સ્વજનોના કરુણ આક્રંદથી હૉસ્પિટલ પણ આક્રંદિત થઈ ઊઠી: ઍમ્બ્યુલન્સની સાયરનોથી આખા વિસ્તારમાં ગમગીનીનો માહોલ: પ્લેનનો કાટમાળ દૂર સુધી ફંગોળાયો
સિવિલ હૉસ્પિટલમાં સ્વજનો એકઠા થયા હતા.
પ્લેન-ક્રૅશની કરુણાંતિકા બાદ સ્વજનોને શોધવા માટે સિવિલ હૉસ્પિટલમાં આવેલાં સગાંઓને શરૂઆતના સમયમાં પ્રૉપર માહિતી ન મળતાં આક્રોશ ફેલાયો હતો. એટલું જ નહીં, સ્વજનોના આક્રંદથી હૉસ્પિટલ પણ આક્રંદિત થઈ ઊઠી હતી.
પ્લેન-દુર્ઘટનામાં જેમનાં મોત થયાં તેમનાં સગાંઓને જેમ-જેમ ખબર પડતી ગઈ તેમ-તેમ સગાંસંબંધીઓ સિવિલ હૉસ્પિટલમાં દોડી આવ્યાં હતાં. સિવિલ હૉસ્પિટલમાં બેથી ત્રણ કલાકનો રઝળપાટ કરવા છતાં પણ પોતાના સ્વજનોની કોઈ ભાળ ન મળતાં બેબાકળા થઈ ઊઠ્યાં હતાં. કેટલાક સ્વજનો આક્રોશ સાથે કહેતા હતા કે કોઈ માહિતી આપનાર જ નથી તો અમારે અમારાં સગાંને ક્યાં શોધવા, તેમનું સ્ટેટસ તો અમને કોઈ જણાવો, કોઈ સ્પષ્ટતા કરતું જ નથી તો અમે ક્યાં જઈએ? અમારી માનસિક હાલત શું છે એ કેમ કોઈને ખબર ન પડતી હોય?
સિવિલ હૉસ્પિટલની પાછળના ભાગે આ દુર્ઘટના બનતાં ભોગ બનનારાઓને સિવિલ હૉસ્પિટલ લઈ જતી ઍમ્બ્યુલન્સની સાયરનોથી આખા વિસ્તારમાં ગમગીની ફેલાઈ ગઈ હતી. ઘટના જે સ્થળે બની એ તરફ જતા બે રસ્તા પર ઍમ્બ્યુલન્સ, મેડિકલ-વૅન, ફાયર-ફાઇટર સહિતનો કાફલો ખડકાઈ ગયો હતો.
ADVERTISEMENT
પ્લેનનો અકસ્માત એટલો પ્રચંડ હતો કે એનો કાટમાળ દૂર-દૂર સુધી ફંગોળાઈ ગયો હતો. પ્લેનના પાંખિયાનો કાટમાળ તો છેક ઘોડાકૅમ્પ રોડ પર પડ્યો હતો. પાંખિયું એટલું મોટું હતું કે એને જોઈને લોકો હેબતાઈ ગયા હતા.
