નરેન્દ્ર મોદી સ્ટેડિયમમાં ૩૦૦૦ પોલીસ અને ૧૦૦૦ હોમગાર્ડ્‍સનો ચુસ્ત બંદોબસ્ત

૩ ઍ​ન્ટિ-ડ્રોન સિસ્ટમ અને ૮ BDDS ટીમ રહેશે તહેનાત : હોટેલનાં ભાડાં પહોંચ્યાં આસમાને

પ્રતીકાત્મક તસવીર

T20 વર્લ્ડ કપની ફાઇનલ મૅચ જોવા માટે દુનિયાભરમાંથી ક્રિકેટચાહકો અમદાવાદ ઊમટી રહ્યા છે ત્યારે નરેન્દ્ર મોદી સ્ટેડિયમમાં સલામતીને લઈને સઘન બંદોબસ્ત ગોઠવાયો છે અને ઍ​ન્ટિ-ડ્રોન સિસ્ટમ અને બૉમ્બ ડિટેક્શન ઍન્ડ ડિસ્પોઝલ સ્ક્વૉડ (BDDS) તહેનાત રહેશે. બીજી તરફ મોટા પાયે 

ક્રિકેટ-ફૅન્સનો ધસારો હોવાથી હોટેલોના ભાવ આસમાનને આંબી ગયા છે. નરેન્દ્ર મોદી સ્ટેડિયમમાં અને આસપાસમાં ઉચ્ચ પોલીસ-ઓફિસરો સહિત ૩૦૦૦ પોલીસ-કર્મચારીઓ તેમ જ ૧૦૦૦ હોમગાર્ડ્‍સ જવાનો ખડેપગે રહેશે. ૩ ઍન્ટિ-ડ્રોન સિસ્ટમ, ૮ BDDS ટીમ, ડૉગ-સ્ક્વૉડ સ્ટેડિયમના ખૂણેખૂણે ફરી વળશે. સ્ટેડિયમની ફરતે અને આસપાસ ૨૫૬ CCTV કૅમેરાથી નજર રાખવામાં આવશે. 

ADVERTISEMENT

ફાઇનલ મૅચમાં ભારતની ટીમ આવી હોવાથી દેશ અને દુનિયામાંથી અમદાવાદમાં મૅચ જોવા ધસારો થયો છે ત્યારે હોટેલોના રેન્ટમાં ત્રણથી ચાર ગણો ઉછાળો આવ્યો છે અને હોટેલોમાં જગ્યા મળવી મુશ્કેલ થઈ ગઈ છે. સામાન્ય રીતે ૨૦૦૦થી ૫૦૦૦ રૂપિયાના ભાડામાં મળતી હોટેલના રૂમના ભાવ ૮૦૦૦થી ૨૦,૦૦૦ રૂપિયાએ પહોંચ્યા છે તો એનાથી મોટી સ્ટાર હોટેલોમાં ભાવ ૧૫,૦૦૦થી ૮૦,૦૦૦ રૂપિયા થઈ ગયા છે.