અમેરિકા-કૅનેડાએ કોર્ટમાં સત્તાવાર સ્વીકાર કર્યો: નિજ્જરની હત્યામાં ભારતનો હાથ નહીં

લૉસ ઍન્જલસની અદાલતમાં લૉરેન્સ બિશ્નોઈ અને ગોલ્ડી બ્રાર વિરુદ્ધના આરોપનામામાં દાવો કરવામાં આવ્યો છે કે ભારતીય જેલમાંથી મોબાઇલ દ્વારા કાવતરું ઘડાયું

હરદીપ સિંહ નિજ્જર

અમેરિકાએ કૅનેડામાં ૨૦૨૩માં થયેલી સિખ અલગાવવાદી નેતા હરદીપ સિંહ નિજ્જરની હત્યાના કેસમાં ભારતીય જેલમાં બંધ ગૅન્ગસ્ટર લૉરેન્સ બિશ્નોઈ અને તેના ઉત્તર અમેરિકાના ડેપ્યુટી સતિન્દરજિત સિંહ ઉર્ફે ગોલ્ડી બ્રાર વિરુદ્ધ સત્તાવાર રીતે ચાર્જશીટ દાખલ કરી છે. લૉસ ઍન્જલસની ફેડરલ અદાલતમાં અનસીલ કરાયેલા આરોપનામા (ઇન્ડિક્ટમેન્ટ) અનુસાર ૨૦૨૩ની ૧૮ જૂને વૅનકુવરના સરે વિસ્તારમાં આવેલા એક સિખ મંદિરની બહાર નિજ્જરની ગોળી મારીને હત્યા કરવાનો આદેશ આ બન્નેએ આપ્યો હતો. જોકે અમેરિકી સત્તાવાળાઓએ આ ચાર્જશીટમાં ભારત સરકારની કોઈ પણ પ્રકારની સંડોવણી કે ભૂમિકા હોવાનો સ્પષ્ટ ઇનકાર કર્યો છે.

જેલમાંથી ઑપરેશન ચલાવ્યું : અમેરિકાના આરોપનામામાં દાવો કરવામાં આવ્યો છે કે લૉરેન્સ બિશ્નોઈએ ભારતની જેલમાંથી જ સ્મગલ કરેલા મોબાઇલ ફોનનો ઉપયોગ કરીને આ સમગ્ર ઑપરેશનનું સંચાલન કર્યું હતું. તેણે નિજ્જરની હત્યા સરળ બનાવવા માટે સહકાવતરાખોરોને તેનો ફોટો અને વિવિધ સરનામાં પૂરાં પાડ્યાં હતાં.

ADVERTISEMENT

ગોલ્ડી બ્રારની ભૂમિકા : બિશ્નોઈના બાળપણના મિત્ર ગોલ્ડી બ્રારે અમેરિકા અને કૅનેડામાં સક્રિય લૉરેન્સ બિશ્નોઈ ઑર્ગેનાઇઝ્ડ ક્રાઇમ ગ્રુપના નેટવર્કને સંભાળીને આ હત્યાકાંડને અંજામ આપવામાં મુખ્ય ભૂમિકા ભજવી હતી.