મહાનગર ગૅસ લિમિટેડના નકલી અધિકારીની વાતોમાં આવીને છેતરાયા ડોમ્બિવલીના વેપારી, ૧૪+ લાખ રૂપિયાનો ફટકો

૨૦ મિનિટમાં ૮ ટ્રાન્ઝૅક્શનમાં વેપારીના ખાતામાંથી ૧૪,૪૬,૯૮૯ રૂપિયા ઊપડી ગયા હોવાનો મેસેજ મળતાં તેમની સાથે છેતરપિંડી થઈ હોવાનું જણાયું હતું.

પ્રતીકાત્મક તસવીર

રાજ્યમાં યુદ્ધને કારણે ગૅસ-પુરવઠા વિશે ઊભા થયેલા સંકટ વચ્ચે સાઇબર ગઠિયાઓ હવે ગૅસ-બિલના બહાને લોકો સાથે છેતરપિંડી કરી રહ્યા છે. ડોમ્બિવલી-ઈસ્ટના ગોપાલનગરમાં રહેતા ૫૮ વર્ષના કાપડના વેપારીને શનિવારે મહાનગર ગૅસ લિમિટેડ (MGL)ના અધિકારી હોવાનો દાવો કરનાર વ્યક્તિએ ઍન્ડ્રૉઇડ પૅકેજ કિટ (APK) લિન્ક મોકલીને તેના બૅન્ક-અકાઉન્ટમાંથી ૧૪,૪૬,૯૮૯ રૂપિયા ઉપાડી લીધા હતા. આ મુદ્દે તિલકનગર પોલીસે ઘટનાની ફરિયાદ નોંધી વધુ તપાસ હાથ ધરી છે. છેલ્લા ૧૦ દિવસમાં મુંબઈ, થાણે અને વસઈ-વિરારમાં આ પ્રકારના ૫૦થી વધુ લોકો સાથે ફ્રૉડ થયા છે. પોલીસે લોકોને અપીલ કરી છે કે ગૅસ-બિલ અથવા અન્ય સેવા સંબંધિત કોઈ પણ મેસેજ મળ્યા બાદ અજાણી લિન્ક પર ક્લિક ન કરવી. APK ફાઇલ ડાઉનલોડ ન કરવી અને તમામ ચુકવણી માત્ર ઑફિશ્યલ વેબસાઇટ અથવા ઑફિશ્યલ ઍપ દ્વારા જ કરવી.

શું હતો ઘટનાક્રમ?

ADVERTISEMENT

ગોપાલનગરમાં કાપડના વેપારીને શુક્રવારે બપોરે એક વ્યક્તિએ ફોન કરીને પોતાની ઓળખ MGLના અધિકારી દિનેશ જોશી તરીકે આપીને કહ્યું કે તમારા વિસ્તારમાં નવી MGL લાઇન નાખવામાં આવી રહી છે જેને માટે તમે રજિસ્ટર નથી કરાવ્યું. તમે તમારી માહિતી મોકલો. 
 ફોન કરનાર વ્યક્તિએ માહિતી ફોન પર આપવાને બદલે ડાયરેક્ટ ઍપ્લિકેશનમાં ભરવા માટે દબાણ કરી વેપારીને વૉટ્સઍપ પર APK ફાઇલ મોકલી એ ઓપન કરી એમાં માહિતી ભરવાનું કહ્યું.
 વેપારીએ વૉટ્સઍપ પર મળેલી APK ફાઇલ પોતાના ફોનમાં ખોલીને એેમાં માહિતી ભરી હતી. એ દરમ્યાન સામેની વ્યક્તિએ પાછો ફોન કરી ૧૨ રૂપિયાનું પેમેન્ટ કરવાનું કહ્યું. એ પછી વેપારીએ ડેબિટ કાર્ડથી ઑનલાઇન પેમેન્ટ કર્યું.
 એ પછીની ૨૦ મિનિટમાં ૮ ટ્રાન્ઝૅક્શનમાં વેપારીના ખાતામાંથી ૧૪,૪૬,૯૮૯ રૂપિયા ઊપડી ગયા હોવાનો મેસેજ મળતાં તેમની સાથે છેતરપિંડી થઈ હોવાનું જણાયું હતું.