સપ્ટેમ્બરમાં જ રિલાયન્સ ઇન્ડસ્ટ્રીઝે આ જ પ્રોજેક્ટમાં એક ડુપ્લેક્સ ૭૫.૧ કરોડમાં ખરીદ્યો હોવાનું રજિસ્ટ્રેશન ઑફિસમાં નોંધાયું છે.
રાધાકિશન દમાણી
મુંબઈની અલ્ટ્રા-લક્ઝરી રિયલ એસ્ટેટ માર્કેટ ફરી ચર્ચામાં છે. ‘ડી-માર્ટ’ના સ્થાપક રાધાકિશન દમાણીની એક કંપનીએ તેનો વરલીની ઑબેરૉય 360 વેસ્ટનો ફ્લૅટ મહિનાના ૨૮.૫ લાખે ભાડે આપ્યો છે. આ રેન્ટલી ડીલ મુંબઈની સૌથી મોંઘી રેન્ટલ ડીલમાંની એક હોવાનું કહેવાઈ રહ્યું છે. પ્રૉપર્ટી રજિસ્ટ્રેશનના દસ્તાવેજોના આધારે આ માહિતી બહાર આવી છે. ડૉ. ઍની બેસન્ટ રોડ પર આવેલા ઑબેરૉય 360 વેસ્ટની ‘બી’ વિંગના ૧૯મા માળે આ ફ્લૅટ આવેલો છે. ૬૮૩૧ સ્ક્વૅર ફુટના આ અપાર્ટમેન્ટ સાથે ચાર કાર-પાર્કિંગની સુવિધા પણ આપવામાં આવી છે.
ફ્લૅટના લીઝનો આ કૉન્ટ્રૅક્ટ ૨૮ સપ્ટેમ્બરે કરવામાં આવ્યો હતો. ૩ વર્ષનું ઍગ્રીમેન્ટ કરવામાં આવ્યું છે. શરૂઆતમાં ફ્લૅટનું માસિક ભાડું ૨૮.૫ લાખ રૂપિયા રહેશે એટલે કે ત્રણ વર્ષમાં ૧૦ કરોડ ફક્ત ભાડા તરીકે ચૂકવાશે. વળી બીજી મહત્ત્વની વાત એ કે સિક્યૉરિટી ડિપોઝિટ તરીકે પણ ૧.૭૧ કરોડ રૂપિયા લેવામાં આવ્યા છે. આ ફ્લૅટ IVL ધુનસેરી પેટ્રોકેમ ઇન્ડસ્ટ્રીઝ પ્રાઇવેટ લિમિટેડે ભાડે લીધો છે. સપ્ટેમ્બરમાં જ રિલાયન્સ ઇન્ડસ્ટ્રીઝે આ જ પ્રોજેક્ટમાં એક ડુપ્લેક્સ ૭૫.૧ કરોડમાં ખરીદ્યો હોવાનું રજિસ્ટ્રેશન ઑફિસમાં નોંધાયું છે.
