° °

આજનું ઇ-પેપર
Friday, 21 January, 2022


આગની જ્વાળા વચ્ચે જાનૈયાઓ ઠારતા હતા પોતાના પેટની આગ

30 November, 2021 03:02 PM IST | Mumbai | Gujarati Mid-day Correspondent

ભિવંડીમાં ફટાકડાને કારણે લગ્નના મંડપના કપડાને આગ લાગી હોવા છતાં ઘણા લોકોએ બેફિકર થઈને ‌મિજબાની માણી હતી. આ ઘટનામાં ૨૫ જેટલાં ટૂ-વ્હીલર આગમાં ખાખ થયાં

વીડિયોમાંથી લીધેલો સ્ક્રીનશૉટ

વીડિયોમાંથી લીધેલો સ્ક્રીનશૉટ

ભિવંડીના ખંડુપાડામાં આવેલા અન્સારી મૅરેજ-હૉલ નામના ઓપન ગ્રાઉન્ડમાં રવિવારે સાંજે એક લગ્ન હતાં ત્યારે બહાર ફોડવામાં આવી રહેલા ફટાકડાને કારણે આગ લાગી હતી અને અચાનક એ આગે વિકરાળ સ્વરૂપ ધારણ કરી લીધું હતું. જોકે નવાઈની વાત એ હતી એક બાજુ આગની જ્વાળા લબકારા મારી રહી હતી ત્યારે બીજી બાજુ કેટલાક લોકોના પેટનું પાણીય હલ્યું નહોતું અને તેઓ શાંતિથી લગ્નનું ભોજન આરોગતા હતા.
ભિવંડીમાં ઘણી જગ્યાએ ખુલ્લામાં આ રીતે મંડપ બાંધીને મૅરેજ-હૉલ ઊભા કરી દેવાય છે. રવિવારે અન્સારી હૉલમાં લગ્ન લેવાઈ રહ્યાં હતાં અને લગ્નની ખુશીમાં બહાર ફટાકડા ફોડાતા હતા. એ દરમ્યાન એક ફટાકડો ઊડીને મંડપના કપડા પર પડતાં એમાં આગ લાગી હતી. થોડી જ વારમાં આગ વધુ ભડકી હતી અને ત્યાં પાર્ક કરાયેલાં ૨૫ જેટલાં ટૂ-વ્હીલર એ આગમાં બળીને ખાખ થઈ ગયાં હતાં. સદ્ભાગ્યે કોઈને ઈજા નહોતી થઈ. આગની જાણ ભિવંડી ફાયરબ્રિગેડ અને થાણે ડિઝૅસ્ટર મૅનેજમેન્ટને થઈ હતી અને થોડી જ વારમાં ૪ ફાયર-એન્જિન ઘટનાસ્થળે ધસી ગયાં હતાં. બે કલાકની જહેમત બાદ આગ પર કન્ટ્રોલ કરી શકાયો હતો. અનેક જગ્યાએ પડદા લગાડીને કાચા મૅરેજ-હૉલ ઊભા કરી દેવાય છે, પણ સુરક્ષાનું કશું ધ્યાન રાખવામાં આવતું નથી એવા આક્ષેપ હાલમાં ભિવંડીવાસીઓ કરી રહ્યા છે.  

30 November, 2021 03:02 PM IST | Mumbai | Gujarati Mid-day Correspondent

અન્ય લેખો


This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK