માનખુર્દમાં ફ્લાયઓવરના કામ માટે મુકાયેલું પાયા ખોદવાનું મશીન અચાનક ધસી પડ્યું
કૉન્સ્ટેબલ સંતોષ ચવાણ અને તેના પર પડેલું પાઇલિંગ મશીન
માનખુર્દ વિસ્તારમાં ફ્લાયઓવરની એક કન્સ્ટ્રક્શન-સાઇટ પર પાઇલિંગ રિગ (પાયા ખોદવાનું મશીન) અચાનક રસ્તા પર પડી ગયું હતું. ભારેખમ મશીન ત્યાંથી બાઇક પર પસાર થઈ રહેલા પોલીસ-કૉન્સ્ટેબલ પર પડતાં તેનું ઘટનાસ્થળે જ મૃત્યુ થયું હતું. આ ઘટનાને પગલે કૉન્ટ્રૅક્ટરની બેદરકારી સામે રોષ ફાટી નીકળ્યો છે.
પોલીસે આપેલી માહિતી મુજબ મંગળવારે રાત્રે નેહરુનગર પોલીસ-સ્ટેશનનો કૉન્સ્ટેબલ સંતોષ ચવાણ બાઇક પર ઘરે જઈ રહ્યો હતો. સાયન-પનવેલ હાઇવે પર માનખુર્દ પાસે ફ્લાયઓવરનું કામ ચાલી રહ્યું હતું, જ્યાં અચાનક એક વિશાળ પાઇલિંગ મશીન પલટી ખાઈ ગયું હતું અને કૉન્સ્ટેબલ એની નીચે દબાઈ ગયો હતો. ગંભીર રીતે ઘવાયેલા કૉન્સ્ટેબલને તાત્કાલિક નજીકની હૉસ્પિટલ લઈ જવામાં આવ્યો હતો, પરંતુ ડૉક્ટરોએ તેને મૃત જાહેર કર્યો હતો.
ADVERTISEMENT
પ્રાથમિક અનુમાન મુજબ મશીન ઢાળ પર રાખવામાં આવ્યું હોવાને કારણે આ અકસ્માત સર્જાયો હોઈ શકે છે. માનખુર્દ પોલીસે આ મામલે કૉન્ટ્રૅક્ટર અને સાઇટ સુપરવાઇઝર વિરુદ્ધ બેદરકારીનો ગુનો નોંધ્યો છે. તપાસ દરમ્યાન સુરક્ષાના નિયમોનું પાલન કરવામાં આવ્યું હતું કે નહીં એની પણ ચકાસણી કરવામાં આવશે.
૧૫ એપ્રિલે બાંદરા-કુર્લા કૉમ્પ્લેક્સમાં મેટ્રોની કામગીરી દરમ્યાન ક્રેન પલટી જવાનો બનાવ બન્યો હતો અને ફેબ્રુઆરી મહિનામાં મુલુંડ વિસ્તારમાં મેટ્રો લાઇનનો સ્લૅબ પડવાથી એક વ્યક્તિનું મોત થયું હતું. વારંવાર બનતી આવી ઘટનાઓએ શહેરમાં ચાલી રહેલા વિકાસકાર્યોમાં સુરક્ષા-વ્યવસ્થા સામે મોટા સવાલો ઊભા કર્યા છે.
