Mumbai Rain Updates: આજે પણ શહેરમાં મુશળધાર વરસાદ પડી રહ્યો છે ત્યારે હવામાન વિભાગે મુંબઈ, થાણે, પાલઘર અને રાયગઢ જિલ્લાઓ માટે `રેડ એલર્ટ` જાહેર કર્યું છે; શહેરમાં અનેક ઠેકાણે જળબંબાકારની સ્થિતિ થઈ છે; તેમજ વાહનવ્યવહાર અને રેલ વ્યવહાર પર પણ અસર થઈ છે
તસવીર સૌજન્યઃ પીટીઆઇ
મુંબઈ (Mumbai) અને તેની આસપાસના વિસ્તારોમાં રાતભર પડેલા ભારે વરસાદને (Mumbai Rains) કારણે ગુરૂવારે સવારે સમગ્ર શહેર પાણી-પાણી થઈ ગયું હતું. વરસાદની ગંભીર સ્થિતિને જોતાં ભારતીય હવામાન વિભાગ (India Meteorological Department)એ મુંબઈ, થાણે (Thane), પાલઘર (Palghar) અને રાયગઢ (Raigadh) જિલ્લાઓ માટે `રેડ એલર્ટ` (Mumbai Red Alert) જારી કર્યું છે.
શહેરના અનેક નીચાણવાળા વિસ્તારો (Mumbai Rain Updates) જેવા કે અંધેરી, કિંગ્સ સર્કલ, ગાંધી માર્કેટ, એસઆઇઇએસ કોલેજ અને સાયનમાં ભારે જળબંબાકાર જોવા મળ્યો હતો, જેના લીધે સવારના વ્યસ્ત સમયે વાહનવ્યવહારને વ્યાપક અસર થઈ હતી. હવામાન વિભાગ (IMD)ના જણાવ્યા અનુસાર, મુંબઈ શહેરમાં સરેરાશ ૧૩૪ મીમી, પૂર્વીય ઉપનગરોમાં ૧૬૪ મીમી અને પશ્ચિમી ઉપનગરોમાં ૧૪૯ મીમી વરસાદ નોંધાયો છે.
ADVERTISEMENT
હવામાન વિભાગ દ્વારા `રેડ એલર્ટ` અને અગમચેતીની સલાહ
હવામાન વિભાગે ૨ જુલાઈના રોજ શહેરના છૂટાછવાયા સ્થળોએ અત્યંત ભારે વરસાદ અને તેજ પવન ફૂંકાવાની આગાહી કરી છે. ગુરૂવારે સવારે ૭:૪૫ વાગ્યે જારી કરાયેલા બુલેટિનમાં આગામી કલાકો માટે એલર્ટને અપગ્રેડ કરીને `રેડ વોર્નિંગ` કરવામાં આવી હતી. તંત્ર દ્વારા નાગરિકોને બિનજરૂરી પ્રવાસ ટાળવા અને જરૂરી સાવચેતી રાખવા કડક સૂચના આપવામાં આવી છે.
સાંતાક્રુઝ અને જુહુમાં રાતભર સૌથી વધુ વરસાદ
આંકડાઓ મુજબ, ૧ જુલાઈના સવારે ૮:૩૦ થી ૨ જુલાઈના વહેલી સવારે ૫:૩૦ વાગ્યા સુધીમાં મુંબઈની વેધશાળાઓમાં સાંતાક્રુઝ ખાતે સૌથી વધુ ૧૬૫.૯ મીમી વરસાદ નોંધાયો છે. આ ઉપરાંત જુહુમાં ૧૬૪.૫ મીમી, વિક્રોલીમાં ૧૬૩ મીમી, રામ મંદિરમાં ૧૫૭ મીમી, બાંદ્રામાં ૧૪૧.૫ મીમી અને વિદ્યાવિહારમાં ૧૩૨ મીમી વરસાદ પડ્યો છે. દક્ષિણ મુંબઈ અને અન્ય ભાગોમાં સાયન ખાતે ૧૧૫ મીમી, ચેમ્બુરમાં ૯૯.૫ મીમી અને કુલાબામાં ૯૯ મીમી વરસાદ નોંધાયો છે.
#WATCH | Maharashtra | Severe waterlogging witnessed in parts of Mumbai following heavy rainfall in the city.
— ANI (@ANI) July 2, 2026
(Visuals from Kings Circle and Gandhi Market areas) pic.twitter.com/Dlq3nNsTUh
પૂર્વીય ઉપનગરો વરસાદથી તરબતર
બૃહન્મુંબઈ મ્યુનિસિપલ કોર્પોરેશન (Brihanmumbai Municipal Corporation)ના ડેટા અનુસાર, પૂર્વીય ઉપનગરોમાં આ રાઉન્ડમાં સૌથી વધુ વરસાદ પડ્યો છે. મુલુન્ડની મિત્તલ નગર મ્યુનિસિપલ સ્કૂલ વિસ્તારમાં ૨૧૮.૬ મીમી વરસાદ ઝીંકાયો છે. તે પછી એસ વોર્ડ ઓફિસ (ભાંડુપ) માં ૨૧૨ મીમી, પાસપોલી પવઈ મ્યુનિસિપલ સ્કૂલમાં ૨૦૮.૪ મીમી, ગાવનપાડા ફાયર સ્ટેશનમાં ૨૦૫.૮ મીમી અને માનખુર્દ ફાયર સ્ટેશન પર ૨૦૦ મીમી વરસાદ નોંધાયો છે.
પશ્ચિમી ઉપનગરો અને મૂળ શહેરની સ્થિતિ
પશ્ચિમી ઉપનગરોમાં સાંતાક્રુઝના એસડબલ્યુએમ વર્કશોપ ખાતે ૨૧૬ મીમી, નરિયલ વાડી સ્કૂલમાં ૨૧૪.૪ મીમી અને અંધેરી ફાયર સ્ટેશન પર ૨૦૪ મીમી વરસાદ નોંધાયો છે. આ સિવાય કુપર હોસ્પિટલ વિસ્તારમાં ૧૯૩.૨ મીમી વરસાદ પડ્યો છે.
મૂળ મુંબઈ શહેરની વાત કરીએ તો, જી-સાઉથ વોર્ડ ઓફિસ (એલફિન્સ્ટન) વિસ્તારમાં સૌથી વધુ ૧૮૭.૮ મીમી વરસાદ નોંધાયો છે. એફ-સાઉથ વોર્ડ ઓફિસ (પરેલ) માં ૧૭૯ મીમી, એફ-નોર્થ વોર્ડ ઓફિસ (માટુંગા) માં ૧૭૫ મીમી અને વડાલાની બી. નાડકર્ણી પાર્ક મ્યુનિસિપલ સ્કૂલ ખાતે ૧૭૩.૬ મીમી વરસાદ નોંધાયો છે. સતત વરસી રહેલા વરસાદને કારણે મ્યુનિસિપલ કોર્પોરેશન અને ડિઝાસ્ટર મેનેજમેન્ટની ટીમો પૂરગ્રસ્ત વિસ્તારોમાં સતત નજર રાખી રહી છે.
