Gujarati Mid-day

ઇ-પેપર

વેબસ્ટોરીઝ

વેબસ્ટોરીઝ


App banner App banner
હોમ > સમાચાર > મુંબઈ સમાચાર > આર્ટિકલ્સ > ‌મિ‌સિંગ બાળકો અને મહિલાઓને શોધવા મુંબઈ પોલીસનું બે અઠવા‌‌‌ડિયાંનું ઑપરેશન શોધ-6

‌મિ‌સિંગ બાળકો અને મહિલાઓને શોધવા મુંબઈ પોલીસનું બે અઠવા‌‌‌ડિયાંનું ઑપરેશન શોધ-6

Published : 21 November, 2026 09:17 AM | IST | Mumbai
Gujarati Mid-day Correspondent | feedbackgmd@mid-day.com

નાગરિકોનો આ નાનો સહયોગ કોઈ પરિવારના વિખૂટા પડેલા સ્વજનને પાછા મેળવવામાં અત્યંત મહત્ત્વપૂર્ણ સાબિત થશે એમ અધિકારીએ જણાવ્યું હતું.

પ્રતીકાત્મક ફાઇલ તસવીર

પ્રતીકાત્મક ફાઇલ તસવીર


મુંબઈમાંથી અપહરણ થયેલાં કે ગુમ થયેલાં ૧૮ વર્ષથી નીચેનાં છોકરા-છોકરીઓ અને ૧૮ વર્ષથી વધુ વયની ગુમ થયેલી મહિલાઓને શોધી કાઢવા માટે મુંબઈ પોલીસ દ્વારા વિશેષ ઝુંબેશ હાથ ધરવામાં આવી છે. આ વિશે માહિતી આપતાં મુંબઈ પોલીસના એક સિનિયર અધિકારીએ જણાવ્યું હતું કે ‘૨૦ નવેમ્બરથી ૩ ડિસેમ્બર દરમ્યાન સમગ્ર મુંબઈમાં ‘ઑપરેશન શોધ-6’ નામની આ ખાસ ઝુંબેશ ચલાવવામાં આવશે. આ અભિયાનનો મુખ્ય ઉદ્દેશ્ય રેકૉર્ડ પર નોંધાયેલાં વધુમાં વધુ ગુમ થયેલાં બાળકો અને મહિલાઓને શોધીને તેમને સુરક્ષિત રીતે તેમના પરિવાર સાથે મિલન કરાવવાનો છે.

આ ઝુંબેશ અંતર્ગત મુંબઈનાં દરેક પોલીસ-સ્ટેશન સ્તરે સઘન કામગીરી કરવામાં આવશે જેની વિગતો આપતાં સિનિયર પોલીસ અધિકારીએ ઉમેર્યું હતું કે ‘દરેક પોલીસ-સ્ટેશનમાં મિસિંગ કેસ નોંધનાર અને એનો રેકૉર્ડ રાખનાર વિશેષ ટીમ છેલ્લાં વર્ષોમાં ગુમ થયેલાં બાળકો વિશેની તમામ માહિતી એકત્રિત કરશે. આ ઉપરાંત, જૂના ગુમ થયેલા કેસોની ફાઇલો ફરી એક વાર ખોલવામાં આવશે અને એની ઝીણવટભરી તેમ જ વિગતવાર તપાસ હાથ ધરવામાં આવશે. આ કામગીરીમાં પોલીસ વિભાગની સાથે ગુમ થયેલી અને અપહરણ થયેલી વ્યક્તિઓ માટે કામ કરતી વિવિધ નૉન-ગવર્નમેન્ટ ઑર્ગેનાઇઝેશન (NGO) પણ જોડાશે જેથી તપાસને વધુ વેગ મળી શકે.’



મુંબઈ પોલીસે આ અભિયાનને સફળ બનાવવા માટે મુંબઈના તમામ નાગરિકોને આગળ આવીને મદદ કરવા અપીલ કરી છે. નાગરિકોને વિનંતી કરવામાં આવી છે કે જો તેમને પોતાના રહેણાક વિસ્તારમાં, રેલવે-સ્ટેશન કે બસ-સ્ટૅન્ડની આસપાસ, ધાર્મિક સ્થળો, હૉસ્પિટલો, હોટેલો કે દુકાનોમાં કોઈ શંકાસ્પદ હાલતમાં બાળકો અથવા મહિલાઓ જોવા મળે તો તરત પોલીસને જાણ કરવી. આ ઉપરાંત, રસ્તા પર ભીખ માગતાં, કચરો વીણતાં કે કોઈના ઘરે અથવા દુકાનમાં બાળમજૂરી કરતાં સગીર બાળકો નજરે પડે અથવા પાડોશમાં કોઈના ઘરે શંકાસ્પદ રીતે રહેતાં બાળકો કે મહિલાઓ જણાય તો એ વિશે પણ પોલીસને માહિતી આપવી જરૂરી છે.


શંકાસ્પદ સંજોગોમાં કેવી રીતે કરશો પોલીસને જાણ?

કોઈ પણ શંકાસ્પદ બાળક કે ગુમ થયેલી વ્યક્તિ જોવા મળે તો નાગરિકોએ તાત્કાલિક પોલીસ કન્ટ્રોલ રૂમના હેલ્પલાઇન-નંબર ૧૦૦ અથવા ચાઇલ્ડ હેલ્પલાઇન-નંબર ૧૦૯૮ પર સંપર્ક કરવો અથવા નજીકના પોલીસ-સ્ટેશનનો સંપર્ક કરીને તે વ્યક્તિને ત્યાં લઈ જવી. આ ઉપરાંત જો કોઈ સગીર બાળક શંકાસ્પદ જણાય તો નાગરિકો ભારત સરકારની વેબસાઇટ https://missionvatsalya.wcd.gov.in પર જઈને ખોયા-પાયા પોર્ટલ પર તે બાળકનો ફોટો પણ અપલોડ કરી શકે છે. નાગરિકોનો આ નાનો સહયોગ કોઈ પરિવારના વિખૂટા પડેલા સ્વજનને પાછા મેળવવામાં અત્યંત મહત્ત્વપૂર્ણ સાબિત થશે એમ અધિકારીએ જણાવ્યું હતું.


Whatsapp-channel Whatsapp-channel

21 November, 2026 09:17 AM IST | Mumbai | Gujarati Mid-day Correspondent

App Banner App Banner

અન્ય લેખો


This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK