કન્સ્ટ્રક્શન કંપનીના નામે ૧૧૧ કરોડ રૂપિયાનો ડિમાન્ડ ડ્રાફ્ટ ઇશ્યુ કરવા માટે PWDના અધિકારીના નામે નકલી રિક્વેસ્ટ-લેટર રજૂ કર્યો, પણ બૅન્ક-મૅનેજરે રૂબરૂ તપાસમાં પકડી પાડ્યા
બૅન્કમાં રજૂ કરવામાં આવેલો બનાવટી રિક્વેસ્ટ-લેટર.
મહારાષ્ટ્રના પાલઘર જિલ્લાના વિક્રમગડના નગરપંચાયતના પ્રમુખની થાણેમાંથી ધરપકડ કરવામાં આવી હતી. તેમના પર બનાવટી દસ્તાવેજો પર ૧૧૧ કરોડ રૂપિયાની ઉચાપત કરવાનો આરોપ મુકાયો છે. પબ્લિક બૅન્કના એક ઑફિસરે આ વિશે પોલીસને જાણ કર્યા બાદ આ કાર્યવાહી કરવામાં આવી હતી. આ કેસમાં નગરપંચાયતના પ્રમુખ સાથે અન્ય એક વ્યક્તિની પણ ધરપકડ કરવામાં આવી હતી.
એક અધિકારીએ આપેલી માહિતી પ્રમાણે ૭ નવેમ્બરે પબ્લિક વર્ક્સ ડિપાર્ટમેન્ટ (PWD) તરફથી એક કન્સ્ટ્રક્શન કંપનીના નામે ૧૧૧.૬૩ કરોડ રૂપિયાનો ડિમાન્ડ ડ્રાફ્ટ ઇશ્યુ કરવા માટે એક રિક્વેસ્ટ-લેટર સ્ટેટ બૅન્ક ઑફ ઇન્ડિયા (SBI)ની લોકલ બ્રાન્ચમાં રજૂ કરવામાં આવ્યો હતો. આ લેટરની સઘન તપાસ કરતાં બૅન્કના સ્ટાફને અનેક વિસંગતિઓ જણાઈ આવી હતી. લેટરમાં PWDના એક્ઝિક્યુટિવ એન્જિનિયર અને અકાઉન્ટન્ટની સહી હતી, પણ બૅન્ક-મૅનેજરે જ્યારે જાતે PWDમાં જઈને એક્ઝિક્યુટિવ એન્જિનિયરની રૂબરૂ મુલાકાત લીધી ત્યારે આ સમગ્ર કાવતરું ખુલ્લું પડી ગયું હતું.
