ઈસ્ટર્ન એક્સપ્રેસ હાઇવે પર ચાલતા ટૂ-વ્હીલર પર ઉપરથી પડ્યું બૅનર

પાછળ બેસેલી મહિલાની આંખ અને માથામાં થઈ ઈજા, જન્મદિવસ અને અન્ય શુભેચ્છા આપવા આડેધડ લગાવવામાં આવતાં બૅનરોનો પ્રશ્ન ફરી ચર્ચામાં

થાણેમાં તીન હાથ નાકા નજીક ચાલતા ટૂ-વ્હીલર પર બૅનર પડ્યું હતું.

થાણેના ઈસ્ટર્ન એક્સપ્રેસ હાઇવે પર તીન હાથ નાકા નજીકથી પસાર થઈ રહેલી બાઇક પર અચાનક ઉપરથી બૅનર પડવાની ઘટના બની હતી. અહીં આવેલા બ્રિજ પર લગાવાયેલું કોઈ નેતાને જન્મદિવસની શુભેચ્છા આપતું બૅનર બાઇક નીચેથી પસાર થઈ રહી હતી ત્યારે પડ્યું હતું. સદ્ભાગ્યે બાઇક ચલાવનાર વ્યક્તિએ સંતુલન ગુમાવ્યું નહોતું અને બાઇક બાજુમાં ઊભી રાખી દીધી હતી એટલે કોઈ મોટી દુર્ઘટના બની નહોતી, પણ બાઇક પર પાછળ બેઠેલી મહિલાની આંખ અને માથામાં ઈજા થઈ હતી.

આખી ઘટનાનો વિડિયો સોશ્યલ મીડિયા પર વાઇરલ થઈ રહ્યો છે. લોકોએ બાઇક ચલાવનાર વ્યક્તિની સમયસૂચકતાને બિરદાવી હતી અને જો જરાક પણ ચૂક થઈ હોત અને બાઇક પડી ગઈ હોત તો મોટો અકસ્માત થઈ શક્યો હોત એવી કમેન્ટ્સ કરીને ગેરકાયદે અને આડેધડ લગાવવામાં આવતાં બૅનરો પર કડકપણે પ્રતિબંધ મૂકવાની માગણી કરી હતી.

ADVERTISEMENT

આ ઉપરાંત લોકો માટે જોખમી સાબિત થઈ શકે એ રીતે બૅનર લગાડનારા વિરુદ્ધ કાર્યવાહી કરવાની માગણી પણ નેટિઝન્સે કરી હતી. જોકે આ બાબતે ખરેખર કોઈ કાર્યવાહી થઈ કે નહીં એ સ્પષ્ટ નથી.