પેટ્રોલ-ડીઝલના વધતા ભાવોને કારણે સ્કૂલ-બસની ફીમાં વધારો તોળાઈ રહ્યો છે ત્યારે એને ખાળવા આવા વિકલ્પોનો વિચાર પણ થઈ રહ્યો છે
પ્રતીકાત્મક તસવીર
પેટ્રોલ અને ડીઝલની કિંમતમાં એક જ અઠવાડિયાની અંદર બીજી વખત વધારો થયો છે એને કારણે દૂધ, બ્રેડ અને શાકભાજી એમ એક પછી એક બધી વસ્તુના ભાવ વધી રહ્યા છે ત્યારે પેરન્ટ્સના માથે પણ સ્કૂલ-બસની ફીમાં વધારાનું સંકટ તોળાઈ રહ્યું છે. ઉનાળાનું વેકેશન પૂરું થવા આવ્યું છે અને જૂનમાં સ્કૂલો શરૂ થશે. એવામાં રાજ્યની સ્કૂલો દ્વારા બસ-ફીમાં વધારો કરવામાં આવે એવી શક્યતા વ્યક્ત કરવામાં આવી રહી છે.
આ વિશે માહિતી આપતા મુંબઈ સ્કૂલબસ અસોસિએશનના અધ્યક્ષ અનિલ ગર્ગે જણાવ્યું હતું કે ‘ઈંધણના ભાવ પર દર અઠવાડિયે નજર રાખવી પડે છે એવી પરિસ્થિતિ છે ત્યારે ફીમાં કેટલો વધારો થશે એ તો કહી ન શકાય, પરંતુ જો પેટ્રોલ-ડીઝલના દર પાંચ રૂપિયા કરતાં વધુ વધારાય તો એ પ્રમાણે ફીમાં વધારો કરવામાં આવશે.’
ADVERTISEMENT
ઉલ્લેખનીય છે કે પહેલાં પેટ્રોલ-ડીઝલના દરમાં સરેરાશ ૩ રૂપિયાનો અને ત્યાર પછી બુધવારે સરેરાશ ૯૦ પૈસાનો વધારો કરવામાં આવ્યો હતો. સ્કૂલ-બસની ફીમાં વધારો ન થાય એ માટે સ્કૂલ ઑથોરિટીઝ અને અસોસિએશન દ્વારા તમામ વિકલ્પો ધ્યાનમાં લેવાઈ રહ્યા હોવાનું જણાવતાં અનિલ ગર્ગે કહ્યું હતું કે ઑફલાઇન-ઑનલાઇન ક્લાસિસ રાખવા, સવાર અને બપોર એમ બે શિફ્ટને બદલે સ્કૂલનો સમય એક જ વખતનો રાખવો એ વિશે પણ વિચાર ચાલી રહ્યો છે. બસના ડ્રાઇવરોને કોરોના વખતની જેમ જ આવી પરિસ્થિતિમાં પણ પગાર મળી રહે એની ખાતરી કરવા અસોસિએશન તત્પર હોવાનું પણ અનિલ ગર્ગે જણાવ્યું હતું.
સિંઘાનિયા સ્કૂલ્સનાં ડિરેક્ટર રેવતી શ્રીનિવાસને જણાવ્યું હતું કે ‘અમે એપ્રિલ મહિનાથી જ સ્કૂલ-બસની ફીમાં વધારાનો બોજો પેરન્ટ્સ પર ન આવે એ માટે હાઇબ્રિડ સ્કૂલિંગ, ઑનલાઇન સિસ્ટમ જેવા વિકલ્પો વિશે વિચારી રહ્યા છીએ.’
વાલીઓ પણ ચિંતામાં
પેરન્ટ્સ ટીચર્સ અસોસિએશન (PTA) યુનાઇટેડ ફોરમ ઍન્ડ એજ્યુકેશનિસ્ટનાં પ્રેસિડન્ટ અરુંધતી ચવાણે કહ્યું હતું કે ‘પેરન્ટ્સને પહેલેથી જ ઘણી બાબતની ચિંતા છે એટલે સ્કૂલ-બસની ફીમાં વધારા માટે પણ ગંભીરતાથી વિચારવું પડશે. હજી ફક્ત ફીમાં વધારાની વાત થઈ રહી છે એટલે આગળ શું થાય છે એ જોવું રહ્યું.’
- અદિતિ અલુરકર
