ભારતીય મોસમ વિભાગના કહેવા મુજબ માર્ચ મહિનાના અંત સુધી ગરમી પાછી નહીં આવે, વરસાદી માહોલ જ રહેશે
પ્રતીકાત્મક તસવીર
ઉત્તર ભારતમાં માર્ચ મહિનાની શરૂઆતમાં ગરમીનો પ્રકોપ જોવા મળી રહ્યો હતો, પરંતુ હવે પશ્ચિમી વિક્ષોભના કારણે ભારતનાં અનેક રાજ્યોમાં વરસાદ, બરફવર્ષા અને કરાવૃષ્ટિને કારણે વધેલી ગરમી પર હાલમાં બ્રેક લાગી ગઈ છે.
ગઈ કાલે રાજસ્થાનના સીકર તથા મધ્ય પ્રદેશમાં ભોપાલ, ઇન્દોર અને ગ્વાલિયર સહિત ૩૩ જિલ્લાઓમાં આંધી ફૂંકાઈ હતી અને વરસાદ પડ્યો હતો. હરિયાણાના રેવાડીમાં ગુરુવારે વહેલી સવારે ભારે વરસાદ થતાં અનેક ઠેકાણે ચોમાસા જેવો જળભરાવ જોવા મળ્યો હતો. ઉત્તરાખંડમાં ઉત્તરકાશી, ચમોલી, રુદ્રપ્રયાગ અને પિથોરાગઢમાં ફ્રેશ બરફવર્ષા થઈ હતી.
ADVERTISEMENT
ભારતીય મોસમ વિભાગના કહેવા મુજબ હવે માર્ચ મહિનાના અંત સુધી ફરી ગરમી પાછી આવે એવી સંભાવના નથી. આજે અને આવતી કાલે પંજાબ, રાજસ્થાન, ઉત્તર પ્રદેશ, દિલ્હી, હરિયાણા સહિત ૧૯ રાજ્યોમાં ૭૦થી ૮૫ કિલોમીટર પ્રતિ કલાકની આંધી સાથે વરસાદ પડવાની પ્રબળ સંભાવના છે. આ વરસાદ અને આંધી ખેડૂતો માટે જોખમી સાબિત થઈ શકે છે.
પૂર્વીય અને મધ્ય ભારતનાં રાજ્યો બિહાર, ઝારખંડ, પશ્ચિમ બંગાળ, ઓડિશા અને છત્તીસગઢમાં ૨૩ માર્ચ સુધી ગાજવીજ સાથે હળવો-મધ્યમ વરસાદ પડવાની સંભાવના છે.
