ડેન્માર્કના ફેરો ટાપુઓમાં ગ્રિન્ડાડ્રેપ નામની હજાર વર્ષ જૂની પરંપરા હેઠળ ૨૬ મેએ એક જ દિવસમાં ૭૦૬ વ્હેલ અને ડૉલ્ફિનને મારી નાખવામાં આવી હતી
વાઇરલ વિડીયોમાંથી સ્ક્રીનશૉટ
ડેન્માર્કના ફેરો ટાપુઓમાં ગ્રિન્ડાડ્રેપ નામની હજાર વર્ષ જૂની પરંપરા હેઠળ ૨૬ મેએ એક જ દિવસમાં ૭૦૬ વ્હેલ અને ડૉલ્ફિનને મારી નાખવામાં આવી હતી. આ ઘટના પછી સમુદ્રનું પાણી લોહીથી લાલ થઈ ગયું હતું અને આ તસવીરો જોઈને દુનિયાભરના લોકોમાં હાહાકાર મચી ગયો હતો. પ્રાણી અધિકાર સંગઠનોએ આ પરંપરાની આકરી ટીકા કરી છે. તેમણે કહ્યું હતું કે આ અભૂતપૂર્વ ક્રૂરતા છે અને પરંપરાના નામે આધુનિક યુગમાં અનાવશ્યક અને અમાનવીય પ્રથા છે. જોકે આ પરંપરાનો બચાવ કરનારા લોકો કહે છે કે ૧૦૦૦ વર્ષ જૂની વાઇકિંગ સંસ્કૃતિમાં ભોજનનો આ મુખ્ય સ્રોત છે. જોકે વિરોધીઓએ કહ્યું હતું કે આધુનિક યુગમાં આ પ્રકારે સામૂહિક શિકારની કોઈ જરૂર નથી.
સ્થાનિક શિકારીઓ શિકારી બોટની મદદથી આ સમુદ્રી જીવોને છીછરા પાણીમાં લઈ આવ્યા હતા અને પછી હુક, ચાકુ અને અન્ય હથિયારોથી એમનો વધ કર્યો હતો. આ માટે જરૂરી ઉપકરણો ખૂટી પડતાં ઘણી વ્હેલ અને ડૉલ્ફિન ઘણા સમય સુધી તડપતી રહી અને ધીમે-ધીમે લોહી વહી જવાના કારણે મૃત્યુ પામી હતી. ડેન્માર્કના અલગ-અલગ બે દરિયાકિનારે આવાં લોહિયાળ દૃશ્યો સર્જાયાં હતાં. શિકાર બાદ સ્થાનિક લોકોએ એમને કાપીને માંસ વહેંચી લીધું હતું.
