એ‌શિયન ગેમ્સમાં ભારતીય મ‌હિલાઓની આજે બંગલાદેશ સામે સેમી-ફાઇનલ

બંગલાદેશ સામે સતત દસમી T20 જીત પર નજર, આ હરીફ સામે છેલ્લાં ૩ વર્ષથી અજેય છે ટીમ ઇ‌ન્ડિયા

ભારત મહિલા ક્રિકેટ

ડિફેન્ડિંગ ચૅમ્પિયન ભારતીય મહિલા ક્રિકેટ ટીમ આજે એશિયન ગેમ્સની સેમી-ફાઇનલમાં બંગલાદેશ સામે ટકરાશે ત્યારે એનો એકમાત્ર ઉદ્દેશ પોતાના દબદબાને જાળવી રાખીને ફાઇનલમાં પ્રવેશ કરવાનો અને એશિયન ગેમ્સમાં ભારત માટે વધુ એક મેડલ પાકો કરવાનો રહેશે. હરમનપ્રીત કૌરની આગેવાની હેઠળની ભારતીય ટીમને બંગલાદેશ સામે T20 ક્રિકેટમાં સતત દસમી જીત નોંધાવવા માટે પ્રબળ દાવેદાર માનવામાં આવી રહી છે.
ભારતે શુક્રવારે પોતાના ટાઇટલ-ડિફેન્સની શરૂઆત યજમાન જપાન સામે ૮ વિકેટે એકતરફી વિજય મેળવીને કરી હતી. ભારતીય મહિલા ટીમે જપાન દ્વારા મળેલા લક્ષ્યાંકને ૧૫ ઓવર બાકી રાખીને જ સરળતાથી પાર પાડી લીધો હતો. બીજી તરફ બંગલાદેશ અને ચીન વચ્ચેની ક્વૉર્ટર ફાઇનલ મેચ ભીના આઉટફીલ્ડના કારણે રદ થતાં સારા રૅન્કિંગના આધારે બંગલાદેશ સેમી-ફાઇનલમાં પહોંચ્યું છે.

ચમકારા

ADVERTISEMENT

બંગલાદેશ સામે સતત ૯ મેચમાં વિજય: બન્ને ટીમો વચ્ચેના આંકડા જોતાં ભારતનું પલડું ભારે રહ્યું છે. ભારતે બંગલાદેશ સામેની છેલ્લી તમામ ૯ મેચો જીતી છે.
 ભારતને બંગલાદેશ સામે T20માં છેલ્લી હાર ત્રણ વર્ષ પહેલાં મળી હતી, ત્યારથી ભારતીય ટીમ અજેય રહી છે.
 ગત સપ્તાહે એશિયા કપ દરમ્યાન પણ ભારતીય ટીમે બંગલાદેશને ૪૦ રનથી કારમી હાર આપી હતી.
 સેમી-ફાઇનલમાં વિજય મેળવતાં જ ટીમ ઇન્ડિયા ફાઇનલમાં પહોંચી જશે અને સિલ્વર મેડલ પાકો કરી લેશે, જ્યારે અંતિમ મુકાબલો ગોલ્ડ મેડલ માટે ખેલાશે.