Gujarati Mid-day

ઇ-પેપર

વેબસ્ટોરીઝ

વેબસ્ટોરીઝ


App banner App banner
હોમ > સ્પોર્ટ્સ સમાચાર > ક્રિકેટ > આર્ટિકલ્સ > દિલ્હીના ઑલરાઉન્ડરે ઑસ્ટ્રેલિયાને જિતાડ્યું ઇંગ્લૅન્ડ સામે

દિલ્હીના ઑલરાઉન્ડરે ઑસ્ટ્રેલિયાને જિતાડ્યું ઇંગ્લૅન્ડ સામે

Published : 22 November, 2026 09:00 AM | Modified : 22 November, 2026 09:01 AM | IST | Melbourne
Gujarati Mid-day Correspondent | feedbackgmd@mid-day.com

પહેલી T20 મૅચમાં ૩ વિકેટે કાંગારૂઓનો રોમાંચક વિજય : ભારતનો નિખિલ ચૌધરી પહેલાં બૉલથી અને પછી બૅટિંગમાં ઝળકીને બન્યો પ્લેયર ઑફ ધ મૅચ.

નિખિલ ચૌધરી

નિખિલ ચૌધરી


પહેલી T20 મૅચમાં ૩ વિકેટે કાંગારૂઓનો રોમાંચક વિજય : ભારતનો નિખિલ ચૌધરી પહેલાં બૉલથી અને પછી બૅટિંગમાં ઝળકીને બન્યો પ્લેયર ઑફ ધ મૅચ : ઇંગ્લેન્ડના ૧૮૭/૯ સામે ઑસ્ટ્રેલિયાએ સેકન્ડ-લાસ્ટ બૉલમાં ૭ વિકેટે ટાર્ગેટ પાર પાડ્યો

ભારતમાં જન્મેલા ઑલરાઉન્ડર નિખિલ ચૌધરી અને જૅક એડવર્ડ્‍સના શાનદાર પ્રદર્શનની મદદથી ઑસ્ટ્રેલિયાએ શનિવારે મેલબર્ન ક્રિકેટ ગ્રાઉન્ડ ખાતે રમાયેલી પ્રથમ T20 મૅચમાં ઇંગ્લૅન્ડ સામે ત્રણ વિકેટે રોમાંચક વિજય મેળવ્યો હતો. દિલ્હીમાં જન્મેલા નિખિલ ચૌધરીએ ઑસ્ટ્રેલિયા વતી પોતાની ચોથી જ ઇન્ટરનૅશનલ મૅચમાં પ્રથમ હાફ સેન્ચુરી ફટકારતાં ૩૮ બૉલમાં ૬૬ રન બનાવ્યા હતા, જ્યારે જૅક એડવર્ડ્‍સના અણનમ પચીસ રનની મદદથી ઑસ્ટ્રેલિયાએ ૧૮૮ રનના પડકારજનક લક્ષ્યાંકને પાર પાડ્યો હતો. અગાઉ બોલિંગમાં પણ ચમક દાખવતાં નિખિલ ચૌધરીએ બે વિકેટ ઝડપીને ઇંગ્લૅન્ડને ૧૮૭ રન સુધી સીમિત રાખવામાં મહત્ત્વની ભૂમિકા ભજવી હતી. આ જીત સાથે યજમાન ઑસ્ટ્રેલિયાએ પાંચ મૅચની સિરીઝમાં ૧-૦ની સરસાઈ મેળવી લીધી છે. શાનદાર ઑલરાઉન્ડ પ્રદર્શન બદલ નિખિલ ચૌધરીને પ્લેયર ઑફ ધ મૅચ જાહેર કરવામાં આવ્યો હતો.



ઑસ્ટ્રેલિયા સામે તાજેતરમાં વન-ડે સિરીઝ જીત્યા બાદ T20 સિરીઝમાં ઊતરેલી ઇંગ્લૅન્ડની ટીમ વતી કૅપ્ટન હૅરી બ્રૂકે ઑસ્ટ્રેલિયાના નબળા ફીલ્ડિંગ-પ્રદર્શન અને કૅચ છોડવાનો પૂરો ફાયદો ઉઠાવીને ૨૮ બૉલમાં ૬૫ રન ફટકાર્યા હતા. ટૉમ બૅન્ટને પણ બાવીસ બૉલમાં ૩૯ રનનું યોગદાન આપ્યું હતું, જ્યારે જૉર્ડન કૉક્સે ટીમને સન્માનજનક સ્કોર સુધી પહોંચાડ્યો હતો.


બીજી ઇનિંગ્સમાં ઑસ્ટ્રેલિયાએ ટીમમાં પરત ફરેલા જેક ફ્રેઝર-મૅકગર્કની વિકેટ માત્ર એક રનના સ્કોર પર ગુમાવી દીધી હતી. કૅપ્ટન મિચલ માર્શ (૩૭ રન) અને ડેબ્યુ કરનાર વિકેટકીપર-બૅટર સૅમ હાર્પર (૩૨ રન) વચ્ચે સારી ભાગીદારી થઈ હતી, પરંતુ ૬ ઓવરના અંતે ઑસ્ટ્રેલિયાનો સ્કોર બે વિકેટે ૫૩ રન હતો. આ સમયે નિખિલ ચૌધરી મેદાનમાં ઊતર્યો હતો અને તેણે બે સિક્સર તથા ૬ ફોરની મદદથી ૩૮ બૉલમાં ૬૬ રન ફટકારીને ઑસ્ટ્રેલિયાની ઇનિંગ્સ સંભાળી હતી. ૧૮મી ઓવરમાં નિખિલ ચૌધરી આઉટ થયો હોવા છતાં બોલિંગ ઑલરાઉન્ડર જૅક એડવર્ડ્‍સની આક્રમક બૅટિંગને કારણે ઑસ્ટ્રેલિયા વિજયરેખા પાર કરવામાં સફળ રહ્યું હતું.

૨૦૨૦માં ક્વીન્સલૅન્ડમાં અટવાઈ ગયો એ ટર્નિંગ પૉઇન્ટ બન્યો નિખિલ ચૌધરી માટે


નિખિલ ચૌધરી દિલ્હીમાં જન્મેલો ઑસ્ટ્રેલિયન ક્રિકેટર છે. તે કાકાને મળવા ઑસ્ટ્રેલિયા ગયો હતો, પણ માર્ચ ૨૦૨૦માં કોવિડ દરમ્યાન ક્વીન્સલૅન્ડમાં ફસાઈ ગયો હતો અને ત્યાર બાદ તેણે ત્યાં જ સ્થાયી થવાનો નિર્ણય લીધો હતો. ક્વીન્સલૅન્ડ ક્લબ ક્રિકેટમાં તેનું પ્રદર્શન ધ્યાનમાં આવ્યા બાદ ૨૦૨૩ની બિગ બૅશ લીગમાં તેને હોબાર્ટ હરિકેન્સ તરફથી રમવાની તક મળી હતી. ત્યાર પછી શેફીલ્ડ શીલ્ડમાં ટૅસ્માનિયા સાથે કરાર મેળવીને તેણે ન્યુ સાઉથ વેલ્સ સામે સેન્ચુરી પણ ફટકારી હતી. જૂન મહિનામાં બંગલાદેશ સામેની T20 સિરીઝ માટે નિખિલ ચૌધરીને પ્રથમ વખત ઑસ્ટ્રેલિયાની ટીમમાં સ્થાન મળ્યું હતું. ચટગાંવમાં તેણે T20 ડેબ્યુ કર્યું હતું અને હવે તેણે મૅચવિનિંગ હાફ સેન્ચુરી ફટકારી છે.

ઇંગ્લૅન્ડ સામેની પ્રથમ T20 મૅચમાં નિખિલ ચૌધરી બોલિંગમાં પણ અસરકારક સાબિત થયો હતો. આ લેગ-સ્પિનરે પોતાની ૪ ઓવરમાં ૨૧ રન આપીને બે વિકેટ ઝડપી હતી અને પ્રથમ ઇનિંગ્સમાં ઝડપથી રન બનાવી રહેલી ઇંગ્લૅન્ડની ટીમ પર અંકુશ મૂક્યો હતો. તેણે ઇંગ્લૅન્ડના કૅપ્ટન હૅરી બ્રૂક અને ઑલરાઉન્ડર સૅમ કરૅનની મહત્ત્વની વિકેટ ઝડપી હતી, જ્યારે જૅક એડવર્ડ્‍સે પણ ૪ ઓવરમાં ૨૭ રન આપીને બે વિકેટ મેળવી હતી.

બૅટિંગમાં એક તરફથી વિકેટ પડી રહી હતી ત્યારે નિખિલ ચૌધરીએ એક છેડો સાચવી રાખ્યો હતો. ૬ ઓવરમાં બે વિકેટે ૫૩ રનના સ્કોર પર ક્રીઝ પર આવ્યા બાદ નિખિલ ચૌધરીએ કૅપ્ટન મિચલ માર્શ સાથે ત્રીજી વિકેટ માટે ૪૩ રન અને ટિમ ડેવિડ સાથે ચોથી વિકેટ માટે ૪૮ રનની ભાગીદારી નોંધાવી હતી. જોકે ત્યાર બાદ ઑસ્ટ્રેલિયાની ટીમ લથડી પડી હતી અને ૪ વિકેટે ૧૪૮ રનથી ટીમનો સ્કોર ૭ વિકેટે ૧૬૮ રન થઈ ગયો હતો. અંતે ચેન્નઈ સુપર કિંગ્સના નવા ખેલાડી જૅક એડવર્ડ્‍સે મક્કમતાપૂર્વક ૧૧ બૉલમાં અણનમ પચીસ રન બનાવીને એક બૉલ બાકી રહેતાં ટીમને ત્રણ વિકેટે જીત અપાવી હતી.

સંક્ષિપ્ત સ્કોર

ઇંગ્લૅન્ડ ૨૦ ઓવરમાં ૯ વિકેટે ૧૮૭ રન (હૅરી બ્રૂક ૬૫, જૉર્ડન કૉક્સ ૨૭; નિખિલ ચૌધરી ૨-૨૧, જૅક એડવર્ડ્સ ૨-૨૭) vs ઑસ્ટ્રેલિયા ૧૯.૫ ઓવરમાં ૭ વિકેટે ૧૯૧ રન (નિખિલ ચૌધરી ૬૬, મિચલ માર્શ ૩૭; વિલ જૅક્સ ૨-૨૯, આદિલ રશીદ ૧-૩૦)

Whatsapp-channel Whatsapp-channel

22 November, 2026 09:01 AM IST | Melbourne | Gujarati Mid-day Correspondent

App Banner App Banner

અન્ય લેખો


This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK