ત્રીજા દિવસની રમતની શરૂઆતમાં ૧૧ રનમાં ત્રણ વિકેટ ગુમાવ્યા બાદ યજમાન ટીમે અંતે ૮૧ રનની લીડ મેળવી
૧૭૧ બૉલમાં ૮૭ રન ફટકારનાર બંગલાદેશનો મેહદી હસન બીજી ટેસ્ટ-સેન્ચુરીથી માત્ર ૧૩ રન દૂર છે.
સાઉથ આફ્રિકા સામેની પહેલી ટેસ્ટ મૅચના ત્રીજા દિવસે બંગલાદેશની ટીમે ૮૧ રનની લીડ મેળવી લીધી છે. દિવસની શરૂઆત ત્રણ વિકેટે ૧૦૧ રનથી કરીને યજમાન ટીમે શરૂઆતમાં ૧૧ રનમાં વધુ ત્રણ વિકેટના નુકસાન છતાં સાત વિકેટે ૨૮૩ રન ફટકાર્યા હતા. મેહદી હસને અણનમ ૮૭ રનની ઇનિંગ્સ રમીને ટીમને ઇનિંગ્સ હારમાંથી બચાવી લીધું હતું. તેણે ઝાકિર અલી( ૫૮ રન) સાથે મળીને સાતમી વિકેટ માટે ૧૩૮ રનની પાર્ટનરશિપ કરી હતી. તે આજે નઈમ હસન( ૧૬ રન) સાથે ચોથા દિવસની રમતની શરૂઆત કરશે.
ઢાકામાં વરસાદ અને ખરાબ પ્રકાશને કારણે રમત બંધ કરવામાં આવી હતી, જેને કારણે ત્રીજા દિવસે ૫૭.૫ ઓવર્સ રમાઈ હતી. આજે ચોથા દિવસની રમત ૧૫ મિનિટ વહેલી એટલે કે સવારે ૯.૪૫ વાગ્યાથી શરૂ થઈ જશે.
