કિંજલ બુચને તેમના સામાજિક કાર્ય માટે આંતરરાષ્ટ્રીય ક્રિકેટ પરિષદ, મહિલા સંગઠનો અને ક્યુપરટિનો ચેમ્બર ઑફ કોમર્સ તરફથી સ્ટાર ઍવોર્ડ્સ મળ્યા. તેમને યુએસ કૉંગ્રેસમૅન, શહેરના મેયર અને સિટી કાઉન્સિલ તરફથી સન્માન અને ઔપચારિક ઘોષણાઓ પણ મળી છે.
CCAના સ્થાપક હેમંત એ. બુચ અને કો-ફાઉન્ડર કિંજલ બુચ
કૅલિફોર્નિયા ક્રિકેટ ઍકેડેમી (CCA) એ જાહેરાત કરી છે કે તેના સ્થાપક હેમંત એ. બુચ અને કો-ફાઉન્ડર કિંજલ બુચને 2026 ક્રિકેટ હૉલ ઑફ ફેમ ક્લાસ માટે નામાંકિત કરવામાં આવ્યા છે. આ નામાંકન યુનાઇટેડ સ્ટેટ્સમાં ક્રિકેટના વિકાસમાં તેમના લાંબા અને મહત્ત્વપૂર્ણ યોગદાનને માન્યતા આપે છે.
હેમંત અનિલકાંત બુચના યોગદાન વિશે
ADVERTISEMENT
હેમંત અનિલકાંત બુચને યુનાઇટેડ સ્ટેટ્સમાં યુવા ક્રિકેટ વિકાસમાં અગ્રણી વ્યક્તિ માનવામાં આવે છે. તેમણે લગભગ 40 વર્ષથી ક્રિકેટનું આયોજન અને તેને મજબૂત બનાવવાનું કરવાનું કામ કર્યું છે. તેમની સફર 1987 માં શરૂ થઈ હતી, જ્યારે તેઓ એક વિદેશી વિદ્યાર્થી તરીકે સેન જૉસ સ્ટેટ યુનિવર્સિટીમાં આવ્યા હતા. ત્યાં, તેમણે એથ્લેટિક ડિરેક્ટરને સ્પાર્ટન્સ ક્રિકેટ ક્લબની સ્થાપના કરવા અને કૅલિફોર્નિયા યુનિવર્સિટીમાં પ્રથમ સમર્પિત ક્રિકેટ મેદાન બનાવવા માટે સમજાવ્યા. આ કૉલેજ ક્રિકેટ માટે એક ઐતિહાસિક પગલું હતું. 2003 માં, હેમંત અને તેમની પત્ની, કિંજલ બુચે, કૅલિફોર્નિયા ક્રિકેટ ઍકેડેમીની સહ-સ્થાપના કરી. તે એક બિન-લાભકારી સંસ્થા છે જે પાયાના સ્તરે ક્રિકેટ આગળ વધારવા માટે કામ કરે છે. શરૂઆતમાં, ફક્ત 23 વિદ્યાર્થીઓ જૂના બેઝબોૉ મેદાન પર પ્રેક્ટિસ કરતા હતા. આજે, તે યુનાઇટેડ સ્ટેટ્સમાં અગ્રણી યુવા ક્રિકેટ ઍકેડેમીઓમાંની એક છે. હાલમાં, CCA કૅલિફોર્નિયાના નવ શહેરોમાં કાર્યરત છે અને દર વર્ષે 600 થી વધુ છોકરાઓ અને છોકરીઓને તાલીમ આપે છે. ઍકેડેમીમાં સાત ક્રિકેટ મેદાન, ચૌદ બૅટિંગ કેજ અને સાન્ટા ક્લેરામાં યુવાનો માટે આંતરરાષ્ટ્રીય સ્તરની ટર્ફ સુવિધા છે. હેમંત બુચે આ સુવિધાઓ માટે વર્ષોથી દસ લાખ ડૉલરથી વધુ એકત્ર કર્યા. જ્યારે યુનાઇટેડ સ્ટેટ્સમાં યુવા ક્રિકેટ માટે યોગ્ય માળખાનો અભાવ હતો, ત્યારે હેમંત બુચે 2005 માં શરૂ થતી રાષ્ટ્રીય યુવા ટુર્નામેન્ટનું આયોજન અને પ્રાયોજકતા કરી હતી. તેઓ ઘણીવાર ખેલાડીઓ માટે હૉટેલ અને ભોજનનો ખર્ચ ઉઠાવતા હતા જેથી પ્રતિભાશાળી ખેલાડીઓ ભાગ લઈ શકે. તેમના પ્રયાસોથી 200 થી વધુ યુવા અમેરિકન ક્રિકેટરોને ખીલવામાં મદદ મળી છે, જેમાં કેટલાક આંતરરાષ્ટ્રીય સ્તરે પહોંચ્યા છે. તેમણે છોકરાઓ અને છોકરીઓને સ્પર્ધાત્મક વાતાવરણ પૂરું પાડવા માટે ઘણા આંતરરાષ્ટ્રીય પ્રવાસોનું પણ આયોજન કર્યું હતું. હેમંત બુચે 12 વર્ષ સુધી યુએસએ ક્રિકેટના પશ્ચિમ ક્ષેત્રના અધ્યક્ષ તરીકે સેવા આપી હતી. આ સમય દરમિયાન, તેમણે પ્રદેશની સૌથી મોટી ઇન્ટરલીગ ટુર્નામેન્ટ શરૂ કરી, પસંદગી પ્રક્રિયાને સુવ્યવસ્થિત કરી અને પ્રાદેશિક સંચાલન માર્ગદર્શિકા લાગુ કરી. તેમણે કૅલિફોર્નિયાના ધારાસભ્યો સાથે કામ કરીને ક્રિકેટને હાઇ સ્કૂલ રમત તરીકે માન્યતા આપવામાં પણ ભૂમિકા ભજવી. તેમને 2006 માં ICC વોલેન્ટિયર ઑફ ધ યર ઍવોર્ડ મળ્યો, અને તેમની ઍકેડેમીને અમેરિકા ક્ષેત્રમાં યુવા વિકાસમાં શ્રેષ્ઠતા માટે સન્માનિત કરવામાં આવી. યુએસએ ક્રિકેટ ઍકેડેમીના સ્થાપક અને ક્રિકેટ હૉલ ઑફ ફેમર અશોક પી. પટેલ દ્વારા હેમંત બુચને ક્રિકેટ હૉલ ઑફ ફેમ માટે નામાંકિત કરવામાં આવ્યા હતા.
CCA માં કિંજલ હેમંત બુચનું યોગદાન
કિંજલ હેમંત બુચ 1990 માં યુનાઇટેડ સ્ટેટ્સ આવ્યા હતા અને ત્યારથી તેઓ સોશિયલ ઍક્ટિવિટી અને યુવા વિકાસ કાર્યક્રમોમાં સામેલ છે. તેમનું માનવું છે કે બાળકોના સર્વાંગી વિકાસ માટે રમતગમત, કલા અને શિક્ષણ આવશ્યક છે. તેમણે 30 વર્ષથી વધુ સમયથી યુવાનો માટે માળખાગત અને સમાવિષ્ટ કાર્યક્રમો પર કામ કર્યું છે. 2003 માં કૅલિફોર્નિયા ક્રિકેટ ઍકેડેમીના સહ-સ્થાપક તરીકે, તેમણે ઍકેડેમીને દેશના અગ્રણી યુવા ક્રિકેટ સંગઠનોમાંના એક બનાવવામાં મુખ્ય ભૂમિકા ભજવી હતી. તેમણે માળખાગત વિકાસ, રાષ્ટ્રીય ચૅમ્પિયનશિપનું આયોજન અને આંતરરાષ્ટ્રીય પ્રવાસો માટે લાખો ડૉલર એકત્ર કરવામાં યોગદાન આપ્યું. તેમના નેતૃત્વ હેઠળ, ઘણા મોટા સમુદાય પ્રોજેક્ટ્સ સફળતાપૂર્વક પૂર્ણ થયા. આંતરરાષ્ટ્રીય ક્રિકેટ પરિષદ અને યુએસએ ક્રિકેટ દ્વારા રચાયેલી વિકાસ સમિતિમાં તેમની નિમણૂક કરવામાં આવી હતી. છેલ્લા છ વર્ષથી, તેઓ પશ્ચિમ ક્ષેત્ર યુએસએ ક્રિકેટ હબ ડિરેક્ટર તરીકે ચૂંટાયેલા પ્રતિનિધિ છે. તેમણે યુવા ક્રિકેટ માટે સંગઠિત અને પ્રક્રિયા-આધારિત સિસ્ટમ લાગુ કરવામાં ભૂમિકા ભજવી હતી. તેઓ મોટા પાયે ટુર્નામેન્ટ અને લીગ શેડ્યૂલ વિકસાવવામાં તેમના આયોજન માટે જાણીતા છે. 2023 માં, તેમણે યુનાઇટેડ કિંગડમમાં યુવાન છોકરીઓનો પ્રથમ ક્રિકેટ પ્રવાસનું આયોજન કર્યું, જેનાથી તેમને કાઉન્ટી-સ્તરની સ્પર્ધાઓમાં ભાગ લેવાની તક મળી. તેમણે નફા વિના છોકરીઓ માટે રાષ્ટ્રીય અને આંતરરાષ્ટ્રીય તકો પણ પૂરી પાડી છે. તેમણે બે વર્ષની વય છૂટછાટનો નિયમ પણ લાગુ કર્યો, જેનાથી છોકરીઓને છોકરાઓની ટુર્નામેન્ટમાં રમવાની મંજૂરી મળી, જેનાથી તેમને સમાન તકો મળી. સ્પોર્ટ્સ ઉપરાંત, તેઓએ યુવા ખેલાડીઓને તેમની ક્રિએટિવિટી દર્શાવવામાં મદદ કરવા માટે ઓનલાઈન ક્રિકેટ મૅગેઝિન અને ટેકનોલોજી પ્રોજેક્ટ્સ પણ શરૂ કર્યા. કિંજલ બુચને તેમના સામાજિક કાર્ય માટે આંતરરાષ્ટ્રીય ક્રિકેટ પરિષદ, મહિલા સંગઠનો અને ક્યુપરટિનો ચેમ્બર ઑફ કોમર્સ તરફથી સ્ટાર ઍવોર્ડ્સ મળ્યા. તેમને યુએસ કૉંગ્રેસમૅન, શહેરના મેયર અને સિટી કાઉન્સિલ તરફથી સન્માન અને ઔપચારિક ઘોષણાઓ પણ મળી છે. કિંજલ બુચને ભૂતપૂર્વ ભારતીય ટૅસ્ટ ખેલાડી અને ક્રિકેટ હૉલ ઑફ ફેમર જ્યોત્સના પટેલ દ્વારા ક્રિકેટ હૉલ ઑફ ફેમ માટે નામાંકિત કરવામાં આવ્યા હતા.
2026 માટે નૉમિનેટ
કૅલિફોર્નિયા ક્રિકેટ ઍકેડેમી દ્વારા હેમંત એ. બુચ અને કિંજલ બુચને 2026 ક્રિકેટ હૉલ ઑફ ફેમમાં નામાંકન બદલ અભિનંદન આપવા આવ્યા છે. ઍકેડેમી દ્વારા તેના સ્વયંસેવકો, ખેલાડીઓ, પરિવારો, કોચ, પ્રાયોજકો, સ્થાપક સભ્યો, ભૂતપૂર્વ વિદ્યાર્થીઓ, શાળા જિલ્લાઓ, વિવિધ શહેરો, વરિષ્ઠ લીગ અને સમર્થકોનો પણ આભાર માને છે જેમણે આ સફરમાં તેમને ટેકો આપ્યો છે. આ નામાંકનને યુનાઇટેડ સ્ટેટ્સમાં યુવા ક્રિકેટના વિકાસમાં તેમના લાંબા અને સતત યોગદાનની સત્તાવાર માન્યતા માનવામાં આવે છે.
