વિમેન્સ T20 વર્લ્ડ કપનો સૌથી મોટો સ્કોર કરીને યજમાન ઇંગ્લૅન્ડે શ્રીલંકા સામે વિજયી પ્રારંભ કર્યો

વિમેન્સ T2O વર્લ્ડ કપ 2026ની પહેલી મૅચમાં શ્રીલંકા સામે ૮૭ રનની જીત સાથે યજમાન ઇંગ્લૅન્ડ ટીમે વિજયી પ્રારંભ કર્યો છે. અંગ્રેજ ટીમે ઓપનર ડૅની વાયટ-હૉજની સેન્ચુરીની મદદથી માત્ર એક વિકેટ ગુમાવીને ૨૧૯ રન કર્યા હતા. જવાબમાં શ્રીલંકા ૨૦ ઓવરમાં ૧૩૨ રને ઑલઆઉટ થઈને વિમેન્સ T2O વર્લ્ડ કપમાં આ હરીફ સામે સતત ચોથી મૅચ હાર્યું હતું. 

૨૧૯ રનનો સ્કોર એ વિમેન્સ T2O વર્લ્ડ કપનો સૌથી મોટો ટીમ-સ્કોર બન્યો હતો. ઇંગ્લૅન્ડે પોતાનો જ સૌથી મોટા સ્કોરનો રેકૉર્ડ તોડ્યો હતો. અગાઉ આ ટીમે છેલ્લા વર્લ્ડ કપમાં પાકિસ્તાન સામે ૨૧૩/૫નો મોટો સ્કોર કર્યો હતો. 

ઓપનર ડૅની વાયટ-હૉજે ૧૩ ફોર અને એક સિક્સની મદદથી ૬૨ બૉલમાં અણનમ ૧૦૫ રન કર્યા હતા. તેની સાથી ઓપનર ઍમી જોન્સે ૩૮ બૉલમાં ૫૩ રન અને કૅપ્ટન નેટ સિવર-બ્રન્ટે બાવીસ બૉલમાં અણનમ ૪૬ રનનું યોગદાન આપ્યું હતું. 

૨૩ દિવસ પહેલાં જન્મેલી દીકરીને સમર્પિત કરી સેન્ચુરી

ડૅની વાયટ-હૉજની સમલૈગિંક પાર્ટનર અને ફુટબૉલ એજન્ટ જૉર્જી હૉજે ૨૦ મેના દિવસે દીકરીને જન્મ આપ્યો હતો. ડૅની વાયટ-હૉજે બેબી રમાડવાનો સંકેત કરીને પોતાની સેન્ચુરી દીકરીને સમર્પિત કરી હતી. બન્નેએ વર્ષ ૨૦૨૪ની ૧૦ જૂને લગ્ન કર્યાં હતાં. વિમેન્સ T2O વર્લ્ડ કપમાં આ સાતમી સેન્ચુરી હતી અને અંગ્રેજ ટીમ દ્વારા ફટકરવામાં આવેલી બીજી સદી હતી.