Glenna Maxwell Retirement: ઑસ્ટ્રેલિયન ઑલ-રાઉન્ડર ગ્લેન મેક્સવેલે વનડે ક્રિકેટમાંથી નિવૃત્તિની જાહેરાત કરી; ઇમોશનલ નિવેદન વાયરલ થયું; રિટાયરમેન્ટના સમાચાર સાંભળી ફેન્સ આઘાતમાં
ગ્લેન મેક્સવેલની ફાઈલ તસવીર
ઑસ્ટ્રેલિયા (Australia)ના વિસ્ફોટક ઑલ-રાઉન્ડર ગ્લેન મેક્સવેલ (Glenn Maxwell)એ આજે એટલે કે ૨ જૂન ૨૦૨૫ ના રોજ વન ડે ઇન્ટરનેશનલ (One Day International - ODI) ક્રિકેટમાંથી નિવૃત્તિની જાહેરાત કરી છે. ૩૫ વર્ષીય મેક્સવેલે તેની ૧૩ વર્ષની ODI કારકિર્દીને અલવિદા કહી દીધું છે. તેના અચાનક નિવૃત્તિના નિર્ણયથી દરેક આશ્ચર્યચકિત છે. તેણે પોતાની નિવૃત્તિનું કારણ પણ જણાવ્યું છે. ક્રિકેટ ઓસ્ટ્રેલિયા (Cricket Australia)એ માહિતી આપી હતી કે, તેણે ૨૦૨૬માં યોજાનારા ટી૨૦ વર્લ્ડ કપ (T20 World Cup 2026)ની તૈયારી માટે ODI ફોર્મેટમાંથી નિવૃત્તિની જાહેરાત કરી છે.
ઑસ્ટ્રેલિયન ઑલ-રાઉન્ડર ગ્લેન મેક્સવેલ (Glenn Maxwell Retirement)એ વન-ડે ક્રિકેટને અલવિદા કહ્યું છે. હવે ગ્લેન મેક્સવેલે પોતાના ૧૩ વર્ષના વનડે કરિયરને અલવિદા કહી દીધું છે. વનડેમાંથી નિવૃત્તિની જાહેરાત કરતા ગ્લેન મેક્સવેલે કહ્યું કે, હવે તે ટી૨૦ આંતરરાષ્ટ્રીય ક્રિકેટ પર વધુ ધ્યાન કેન્દ્રિત કરવા માંગે છે. ખાસ કરીને ૨૦૨૬માં યોજાનાર આગામી ટી૨૦ વર્લ્ડ કપને ધ્યાનમાં રાખીને. ગ્લેન મેક્સવેલે ૨૫ ઓગસ્ટ ૨૦૧૨ના રોજ વન ડે ઇન્ટરનેશનલ (ODI)માં ડેબ્યૂ કર્યું હતું. તેણે શારજાહ (Sharjah)માં અફઘાનિસ્તાન (Afghanistan) સામે પોતાની પહેલી ODI મેચ રમી હતી, જેમાં તેણે ફક્ત ૨ રન બનાવ્યા હતા.
ADVERTISEMENT
નિવૃત્તિના પોતાના નિર્ણય વિશે વાત કરતા મેક્સવેલે કહ્યું, `મને યાદ છે કે શરૂઆતમાં મને સમય પહેલા અને અણધારી રીતે પસંદ કરવામાં આવ્યો હતો. મને ઑસ્ટ્રેલિયા માટે કેટલીક મેચો રમી હોવાનો ગર્વ છે. મેં વિચાર્યું હતું કે હું પણ આવું જ કરીશ. ત્યારથી હું ઉતાર-ચઢાવમાંથી પસાર થયો છું, જેમ કે ટીમમાંથી બહાર રહેવું, પાછા આવવું, કેટલાક વર્લ્ડ કપમાં રમવું અને કેટલીક મહાન ટીમોનો ભાગ બનવું.`
ફાઇનલ વર્ડ પોડકાસ્ટ સાથે વાત કરતા, જમણા હાથના બેટ્સમેને આગળ કહ્યું, ‘મને લાગ્યું કે હું ટીમને થોડો નિરાશ કરી રહ્યો છું કારણ કે શરીર પરિસ્થિતિઓ અનુસાર પ્રતિક્રિયા આપી રહ્યું છે. મેં (પસંદગી સમિતિ) જ્યોર્જ બેઇલી સાથે સારી વાતચીત કરી અને તેમને પૂછ્યું કે ભવિષ્ય વિશે તેમના વિચારો શું છે? અમે ૨૦૨૭ વર્લ્ડ કપ વિશે વાત કરી અને મેં તેમને કહ્યું, મને નથી લાગતું કે હું તેમાં સફળ થઈ શકીશ, હવે સમય આવી ગયો છે કે હું મારા પદના લોકો માટે આયોજન શરૂ કરું જેથી તેઓ આ પરિસ્થિતિમાં ભાગ લઈ શકે અને તેને પોતાનું બનાવી શકે.’
ગ્લેન મેક્સવેલની વનડે કારકિર્દી ૨૦૧૨માં શરૂ થઈ હતી. ૧૪૯ વનડેમાં ઑસ્ટ્રેલિયાનું પ્રતિનિધિત્વ કરતા, આ અનુભવી ખેલાડીએ ૫.૪૬ની ઇકોનોમી બોલિંગ કરતી વખતે કુલ ૩,૯૯૦ રન બનાવ્યા અને ૭૭ વિકેટ લીધી. તે ૨૦૧૫ અને ૨૦૨૩ વર્લ્ડ કપ વિજેતા ટીમોનો પણ ભાગ હતો. મેક્સવેલના નામે આ ફોર્મેટમાં ૪ સદી અને ૨૩ અડધી સદી છે. ૩૬ વર્ષીય ખેલાડીએ ૨૦૨૩ના વર્લ્ડ કપ દરમિયાન અફઘાનિસ્તાન સામે ૨૦૧ રનની અણનમ ઇનિંગ રમી હતી. આ ફોર્મેટમાં તે તેની કારકિર્દીની શ્રેષ્ઠ ઇનિંગમાંની એક હતી. તે બોલિંગમાં પણ વિરોધી બેટ્સમેન માટે મુશ્કેલીરૂપ સાબિત થયો છે. તેણે ૪ વખત ઇનિંગમાં ૪ વિકેટ લીધી હતી. ફિલ્ડિંગમાં પણ તે અજોડ રહ્યો હતો. આ ફોર્મેટમાં તેના નામે ૯૧ કેચ છે.
છેલ્લે તેણે ચેમ્પિયન્સ ટ્રોફી ૨૦૨૫ (Champions Trophy 2025)માં ભારત (India) સામેની સેમિફાઇનલમાં પોતાની છેલ્લી ODI મેચ રમી હતી. તે મેચમાં, મેક્સવેલ ૭ રન બનાવીને અક્ષર પટેલ (Axar Patel)નો શિકાર બન્યો હતો.
