વરસાદથી પ્રભાવિત પહેલી બન્ને મૅચમાં ભારતે DLS મેથડ હેઠળ અનુક્રમે ૨૫ રન અને ૮ વિકેટથી જીત મેળવી હતી
વૈભવ સૂર્યવંશી બીજી વન-ડે મૅચમાં ૨૪ બૉલમાં ૬૮ રનની શાનદાર ઇનિંગ્સ રમ્યો હતો
આજે ભારત અને સાઉથ આફ્રિકાની અન્ડર-19 વન-ડે સિરીઝની અંતિમ મૅચ રમાશે. ૨-૦થી સિરીઝ જીતનાર વૈભવ સૂર્યવંશી ઍન્ડ કંપની આજે સિરીઝમાં ક્લીન સ્વીપ કરીને આગામી વન-ડે વર્લ્ડ કપ માટે પોતાનો આત્મવિશ્વાસ વધુ મજબૂત કરવા ઊતરશે. વરસાદથી પ્રભાવિત પહેલી બન્ને મૅચમાં ભારતે DLS મેથડ હેઠળ અનુક્રમે ૨૫ રન અને ૮ વિકેટથી જીત મેળવી હતી.
સોમવારે બીજી વન-ડે મૅચમાં યજમાન સાઉથ આફ્રિકાએ ૪૯.૩ ઓવરમાં ૨૪૫/૧૦નો સ્કોર કર્યો હતો. વરસાદને કારણે ભારતીય ટીમને ૨૭ ઓવરમાં ૧૭૪ રનનો ટાર્ગેટ મળ્યો હતો. વૈભવ સૂર્યવંશીના ૬૮ રન અને અભિજ્ઞાન કુંડુના ૪૮ રનના આધારે ભારતે ૨૩.૩માં ૧૭૬/૨નો સ્કોર કરીને જીત નોંધાવી હતી.
ADVERTISEMENT
સાલ બદલ ગયા, વૈભવ નહીં બદલા
ગયા વર્ષની જેમ નવા વર્ષે પણ વૈભવ સૂર્યવંશીએ પોતાની ધમાકેદાર બૅટિંગ ચાલુ રાખી છે. યુથ વન-ડે ક્રિકેટનો યંગેસ્ટ કૅપ્ટન વૈભવ સૂર્યવંશી બીજી વન-ડે મૅચમાં ૨૪ બૉલમાં ૬૮ રનની શાનદાર ઇનિંગ્સ રમ્યો હતો. તેણે પોતાની ઇનિંગ્સના ૯૪ ટકા રન બાઉન્ડરીથી બનાવ્યા હતા. અન્ડર-19 ટીમના કૅપ્ટન તરીકેની પોતાની બીજી જ મૅચમાં વૈભવ સૂર્યવંશીએ ૧૦ સિક્સ અને ૧ ફોર ફટકારી હતી. ૨૮૩.૩૩ના સ્ટ્રાઇકરેટથી બૅટિંગ કરનાર આ ઓપનરે ૧૯ બૉલમાં હાફ-સેન્ચુરી પૂરી કરી હતી.
