ક્વૉલિફાયર-વનમાં સ્થાન મજબૂત કરવા આજે બૅન્ગલોર-હૈદરાબાદ વચ્ચે રસાકસી

સીઝનની પહેલી ટક્કરમાં બૅન્ગલોરે ૨૦૨ રનનો ટાર્ગેટ ચેઝ કરીને ૬ વિકેટે મેળવી હતી જીત, બૅન્ગલોર પાસે હૈદરાબાદમાં હૅટ-ટ્રિક જીતની તક

પૅટ કમિન્સ

IPL 2026ની ૬૭મી મૅચ આજે હૈદરાબાદના રાજીવ ગાંધી ક્રિકેટ સ્ટેડિયમમાં રમાશે. સનરાઇઝર્સ હૈદરાબાદ અને રૉયલ ચૅલેન્જર્સ બેન્ગલુરુ પોતાની અંતિમ લીગ-સ્ટેજ મૅચમાં જીત મેળવીને પૉઇન્ટ-ટેબલમાં ટૉપ-ટૂના સ્થાન પર દાવેદારી મજબૂત કરવાનો પ્રયાસ કરશે. લીગ-સ્ટેજના અંતે ટૉપ-ટૂમાં રહેનાર ટીમો વચ્ચે ક્વૉલિફાયર-વનની ટક્કર થાય છે. એમાં જીતનાર ટીમ ફાઇનલમાં અને હારનાર ટીમ ક્વૉલિફાયર-ટૂ મૅચમાં રમે છે.

આ સીઝનની પહેલી ટક્કરમાં બૅન્ગલોરે ૨૦૨ રનનો ટાર્ગેટ ચેઝ કરીને હૈદરાબાદને ૬ વિકેટે હરાવ્યું હતું. સીઝનની શાનદાર શરૂઆત કરનાર બન્ને ટીમ હાલમાં ટૉપ-થ્રીમાં સ્થાન મેળવીને પ્લેઑફની ક્વૉલિફાઇડ ટીમ છે. છેલ્લી ત્રણેય મૅચ જીતનાર બૅન્ગલોર ૧૩ મૅચમાં ૯ જીત, ૪ હારને કારણે ૧૮ પૉઇન્ટ ધરાવે છે. છેલ્લી ૧૦ મૅચમાંથી ૭ મૅચ જીતનાર હૈદરાબાદ ૧૩ મૅચમાં ૮ જીત, પાંચ હારને કારણે ૧૬ પૉઇન્ટ સાથે ટૉચની ટીમોમાંથી એક છે.

ADVERTISEMENT

હૈદરાબાદના હોમગ્રાઉન્ડ પર બૅન્ગલોર ૧૨ મૅચમાંથી ૪ મૅચ જીત્યું છે અને ૮ મૅચમાં હાર્યું છે. સનરાઈઝર્સ હૈદરાબાદ સામે આ મેદાન પર બૅન્ગલોરની ૯ ટક્કર થઈ છે. એમાંથી પાંચ મૅચ હૈદરાબાદે જીતી છે અને અંતિમ બે ટક્કર સહિત ૪ મૅચ બૅન્ગલોરે જીતી છે. હોમ-ટીમ સામે આજે બૅન્ગલોર હૅટ-ટ્રિક જીત મેળવવાનો પ્રયાસ કરશે.

સનરાઇઝર્સ હૈદરાબાદને પોતાના આ હોમગ્રાઉન્ડ પર ૬૯ મૅચમાં ૪૨ જીત અને ૨૬ હાર મળી છે. એક મૅચ નો-રિઝલ્ટ પણ રહી છે. વર્તમાન સીઝનની ૬ મૅચમાં હૈદરાબાદને અહીં કલકત્તા અને લખનઉ સામે જ હાર મળી છે અને બાકીની ૪ મૅચમાં આ ટીમે દિલ્હી, ચેન્નઈ, રાજસ્થાન અને પંજાબને હાર આપી હતી.