RBI MPC Meeting: ભારતીય રિઝર્વ બેંકની નાણાકીય નીતિ સમિતિની દ્વિ-માસિક સમીક્ષા બેઠક શુક્રવારે સમાપ્ત થઈ; આ બેઠકમાં સૌથી મહત્વપૂર્ણ નિર્ણય રેપો રેટનો હતો; RBIએ તેમાં ૫૦ બેસિસ પોઈન્ટનો ઘટાડો કર્યો છે; જાણો આ નિર્ણયથી તમારી લોન કેટલી સસ્તી થશે
પ્રતીકાત્મક ફાઇલ તસવીર
રિઝર્વ બેંક ઓફ ઈન્ડિયા (Reserve Bank of India - RBI)ની મોનેટરી પોલિસી કમિટી (Monetary Policy Committee - MPC)એ આજે એક મોટો નિર્ણય લીધો છે. લોન લેનારાઓ અને લોન લેવાનું વિચારી રહેલા લોકો માટે રાહતના સમાચાર છે. ભારતીય રિઝર્વ બેંકે તેની નાણાકીય નીતિ સમીક્ષા (RBI Monetary Policy)માં રેપો રેટમાં ૫૦ બેસિસ પોઈન્ટનો ઘટાડો કર્યો છે. આ બજારની અપેક્ષાઓ કરતાં વધુ છે. રેપો રેટ ૬%થી ઘટીને ૫.૫૦% થઈ ગયો છે. રિઝર્વ બેંકના ગવર્નર સંજય મલ્હોત્રા (Sanjay Malhotra)એ આ જાહેરાત કરી.
રિઝર્વ બેંક ઓફ ઈન્ડિયાના ગવર્નર સંજય મલ્હોત્રાએ રેપો રેટમાં ૫૦ બેસિસ પોઈન્ટ એટલે કે ૦.૫૦% ઘટાડો કરવાની જાહેરાત કરી છે. આ વર્ષે આ સતત ત્રીજી વખત છે જ્યારે RBIએ રેપો રેટ ઘટાડ્યો છે. હવે રેપો રેટ ઘટીને ૫.૫૦% થઈ ગયો છે. વર્ષ ૨૦૨૫ની શરૂઆતથી અત્યાર સુધીમાં કુલ ૧૦૦ બેસિસ પોઈન્ટનો ઘટાડો કરવામાં આવ્યો છે. ફેબ્રુઆરીમાં ૦.૨૫% અને એપ્રિલમાં ૦.૨૫% ઘટાડા પછી, જૂનમાં આ સૌથી મોટો ઘટાડો માનવામાં આવે છે.
ADVERTISEMENT
પોલિસી રેટમાં આ સતત ત્રીજો ઘટાડો છે. આની સીધી અસર હોમ લોનના EMI પર પડે છે, કારણ કે હોમ લોનના દર રેપો રેટ સાથે જોડાયેલા હોય છે. અગાઉ, ફેબ્રુઆરી અને એપ્રિલની નાણાકીય નીતિ સમીક્ષામાં, RBI એ રેપો રેટમાં ૨૫-૨૫ બેસિસ પોઈન્ટનો ઘટાડો કર્યો હતો. જ્યારે આ પહેલા, પાંચ વર્ષ સુધી રેપો રેટમાં કોઈ ઘટાડો થયો ન હતો.
નોંધનીય છે કે, નીચા વ્યાજ દરો માત્ર ઘરો અને કારના વેચાણ પર સકારાત્મક અસર કરતા નથી, પરંતુ તે સમગ્ર અર્થતંત્રમાં પ્રવાહિતા વધારીને વૃદ્ધિ પણ પૂરી પાડે છે.
RBI એ કેશ રિઝર્વ રેશિયો (Cash Reserve Ratio - CRR)માં પણ ૧૦૦ બેસિસ પોઈન્ટનો ઘટાડો કરીને તેને ૩% કર્યો છે. પહેલા આ દર ૪% હતો. આ રકમ બેંકોએ હંમેશા પોતાની પાસે રોકડમાં રાખવી પડે છે. આ ઘટાડાથી બેંકો પાસે લોન આપવા માટે વધુ પૈસા ઉપલબ્ધ થશે.
RBI એ SDF પણ ઘટાડીને ૫.૨૫ કર્યો છે. બેંક રેટ પણ ઘટાડીને ૫.૭૫% કરવામાં આવ્યો છે. આનાથી RBI પાસેથી લોન લેવામાં બેંકોને પણ રાહત મળશે. RBI ગવર્નરે કહ્યું કે, ફુગાવાનો દર ૪%થી નીચે રહે છે અને GDP વૃદ્ધિ પણ સંતોષકારક છે. દર ઘટાડવાના નિર્ણયથી બજારમાં વપરાશ વધશે, જે અર્થતંત્રને વધુ ગતિ આપશે.
ગવર્નર સંજય મલ્હોત્રાએ એમ પણ કહ્યું કે, નાણાકીય વર્ષ ૨૦૨૬ માટે ફુગાવાનો અંદાજ અગાઉના ૪%થી ઘટાડીને ૩.૭% કરવામાં આવ્યો છે. તેમણે કહ્યું કે, છૂટક ફુગાવો ઝડપથી ઘટ્યો છે અને એપ્રિલમાં તે ઘટીને ૩.૧૬% થયો છે, જે છેલ્લા છ વર્ષમાં સૌથી નીચો સ્તર છે.
તમને જણાવી દઈએ કે, કેન્દ્રીય બેંકના રેપો રેટમાં ઘટાડાના આ નિર્ણય પછી, કાર અને હોમ લોન સહિત તમામ પ્રકારની લોન સસ્તી થશે. RBI ગવર્નર સંજય મલ્હોત્રાએ રેપો રેટમાં ઘટાડો કરતા કહ્યું કે, તેમના આ પગલાથી દેશમાં રોકાણકારોને પુષ્કળ તકો મળશે. વૈશ્વિક વિકાસની ધીમી ગતિ વચ્ચે ભારતીય અર્થતંત્ર મજબૂત બનશે. ઉપરાંત, સ્થાનિક માંગ વધુ મજબૂત બનશે.
