ગરબો તારી વાંકી રે પાઘલડીનું ફુમતું રે... આશા ભોસલેએ ગાયો છે

જે ગરબા પર નવરાત્રિમાં ખેલૈયાઓ મન મૂકીને ઘૂમે છે એ ગરબો તારી વાંકી રે પાઘલડીનું ફુમતું રે... આશા ભોસલેએ ગાયો છે : આશા ભોસલેએ અગણિત ગુજરાતી ભજન, ગીતો અને ગરબા ગાઈને ગુજરાતી સંસ્કૃતિને એક મુકામ પર લઈ જવાની સાથે કરાવી છે મોજ

આશા ભોસલેની ફાઇલ તસવીર

દુનિયાભરમાં જ્યાં પણ નવરાત્રિના ગરબા યોજાય છે ત્યાં ‘તારી વાંકી રે પાઘલડીનું ફુમતું રે’ ગરબો અવશ્ય વાગે જ અને ખેલૈયાઓ એના પર ઝૂમી ઊઠે છે. આ ગરબો ગુજરાતી ફિલ્મ ‘વીર માંગડાવાળો’માં આશા ભોસલેએ ગાયો હતો. માત્ર આ ગરબાની જ વાત નથી, પરંતુ આશા ભોસલેએ ગુજરાતીમાં ભજન, ગીતો અને ગરબા ગાઈને સૌકોઈને મોજ કરાવી છે.

આશા ભોસલેએ ‘દૂધે તે ભરી તલાવડી’ સહિતના ગરબા ઉપરાંત ‘છેલાજી રે મારી હાટુ પાટણથી પટોળા’ જેવાં ગીતો પણ બખૂબી ગાયાં છે. આ ઉપરાંત ‘માડી તારુ કંકુ ખર્યું ને સૂરજ ઊગ્યો’ અને ‘રામ તમે સીતાજીની તોલે ના આવો’ જેવાં ભજન ગાઈને આશા ભોસલેએ સંગીતના રસિયાઓમાં તેમની અમિટ છાપ છોડી છે. આ બન્ને ભજનો આજે પણ એટલાં જ સંભળાય છે અને આવનારા સમયમાં પણ એ સંભળાતાં જ રહેશે. આશા ભોસલે અગણિત ગુજરાતી ભજન, ગીતો અને ગરબા ગાઈને ગુજરાતી સંસ્કૃતિને એક મુકામ પર લઈ ગયાં છે.

ADVERTISEMENT

આ પણ ગાયાં છે આશાતાઈએ

છાનું રે છપનું કૈં થાય નહીં
મારી ગાગરડીની કોર
તારા ફળિયામાં પગ નહીં મેલું
મારે રે તે સૂપડે
મા પાવા તે ગઢથી
શેરી વળાવીને સજ્જ કરું
ગજે શેરી ને પોલ
મિતવા પૂછે મારું મન
નજરુનાં બાણ મને વાગી જાય છે 
ખમ્મા મારા નંદજીના લાલ
એક પાટણ શેરની નાર પદમણી