આવારાપન 2 બની ઇમરાન હાશ્મીની કરીઅરની સૌથી વધારે કમાણી કરનારી ફિલ્મ

ઇમરાન હાશ્મીની ‘આવારાપન 2’એ બૉક્સ-ઑફિસ પર શાનદાર કમાણી કરીને તેની અત્યાર સુધીની સૌથી વધુ કમાણી કરનારી ફિલ્મનો ખિતાબ મેળવ્યો છે. ફિલ્મે પહેલા વીક-એન્ડમાં ભારતમાં ₹૮૪.૩૧ કરોડની નેટ કમાણી કરી છે.

ઈમરાન હાશ્મી

ઇમરાન હાશ્મીની ફિલ્મ ‘આવારાપન’ વર્ષ ૨૦૦૭માં રિલીઝ થઈ હતી. બૉક્સ-ઑફિસ પર આ ફિલ્મ ખાસ સફળ નહોતી થઈ. જોકે આ ફિલ્મની સીક્વલ ‘આવારાપન 2’એ બૉક્સ-ઑફિસ પર સારો દેખાવ કર્યો છે. આ ફિલ્મ ઇમરાનની સૌથી વધારે કમાણી કરનાર ફિલ્મ બની ગઈ છે. આ ફિલ્મે પહેલા વીક-એન્ડમાં ભારતમાં બૉક્સ-ઑફિસ પર નેટ ૮૪.૩૧ કરોડ રૂપિયા જેટલી કમાણી કરી છે.
અત્યાર સુધી ઇમરાનની સૌથી વધુ કમાણી કરનારી ફિલ્મોમાં ‘ધ ડર્ટી પિક્ચર’નું નામ સામેલ હતું. જોકે ‘આવારાપન 2’એ માત્ર ત્રણ દિવસની કમાણીમાં ‘ધ ડર્ટી પિક્ચર’ના લાઇફટાઇમ કલેક્શનને પાછળ છોડી દીધું છે. ઇમરાનની ટોચની પાંચ કમાણી કરનારી ફિલ્મોમાં ‘ધ ડર્ટી પિકચર’ ઉપરાંત ‘બાદશાહો’, ‘રાઝ 3’, ‘વન્સ અપોન અ ટાઇમ ઇન મુંબઈ’, ‘મર્ડર 2’ અને ‘જન્નત 2’નો પણ સમાવેશ થતો હતો.

૨૭ નવેમ્બરે રિલીઝ થશે ઇમરાન હાશ્મીની ગનમાસ્ટર G9

ADVERTISEMENT

ઇમરાન હાશ્મીએ મોટા પડદા પર ધમાકેદાર કમબૅક કર્યું છે. તેની ફિલ્મ ‘આવારાપન 2’ને મળેલી સફળતા પછી હવે તેની નવી ઍક્શન થ્રિલર ફિલ્મ ‘ગનમાસ્ટર G9’ની 
રિલીઝ-ડેટ પણ જાહેર થઈ ગઈ છે. આ ફિલ્મ ૨૭ નવેમ્બરે રિલીઝ થશે. ‘ગનમાસ્ટર G9’નું ડિરેક્શન આદિત્ય દત્ત કરી રહ્યો છે. આ ફિલ્મ સાથે ઇમરાન હાશ્મી, નિર્દેશક આદિત્ય દત્ત અને સંગીતકાર હિમેશ રેશમિયાની ત્રિપુટી લગભગ બે દાયકા બાદ ફરી એકસાથે આવી રહી છે. આ પહેલાં તેમણે ‘આશિક બનાયા આપને’ અને ‘દિલ દિયા હૈ’માં સાથે કામ કર્યું હતું. ‘ગનમાસ્ટર G9’માં ઇમરાન હાશ્મી સાથે જેનિલિયા દેશમુખ અને અપારશક્તિ ખુરાના લીડ રોલમાં જોવા મળશે.

બૉક્સ-ઑફિસ પર આવારાપન 2ની કમાણી
શુક્રવાર    ૨૩.૪૦ કરોડ રૂપિયા
શનિવાર    ૩૪.૦૯ કરોડ રૂપિયા
રવિવાર    ૨૬.૮૨ કરોડ રૂપિયા