‘આશિકી’થી રાતોરાત લોકપ્રિય બનેલા રાહુલ રૉયે શાહરુખ ખાનની કરીઅરને નવી ઊંચાઈ આપનારી ‘ડર’ ફિલ્મ ઠુકરાવવાનો અફસોસ વ્યક્ત કર્યો છે. યશ ચોપડાએ રાહુલને ધ્યાનમાં રાખીને આ ફિલ્મની વાર્તા લખી હતી.
રાહુલ રોય
‘આશિકી’ ફિલ્મથી ચાહકોનાં દિલ જીતનાર રાહુલ રૉયની ગણતરી એક જ ફિલ્મથી લોકપ્રિય ઍક્ટર તરીકે થવા લાગી હતી. જોકે પછી તેની ફિલ્મોને ખાસ સફળતા ન મળતાં તેની કરીઅર આગળ વધી શકી નહોતી. સફળતાના આ તબક્કામાં રાહુલે અનેક મોટી ફિલ્મોમાં કામ કરવાની ના પાડી દીધી હતી.
ADVERTISEMENT
આ ફિલ્મોમાં શાહરુખ ખાનને સ્ટાર બનાવનાર ‘ડર’નો પણ સમાવેશ થાય છે અને આ ફિલ્મમાં કામ કરવાની ના પાડવાનો રાહુલને આજે પણ અફસોસ છે.
આ સમગ્ર ઘટનાક્રમ વિશે વાત કરતાં રાહુલે કહ્યું હતું કે ‘‘આશિકી’ હિટ થયા બાદ મારી પાસે ઘણા મોટા ફિલ્મમેકર્સની ફિલ્મોની ઑફર આવી હતી. એ સમયે યશ ચોપડા પણ એક ફિલ્મની તૈયારી કરી રહ્યા હતા અને તેમણે મને ધ્યાનમાં રાખીને એની વાર્તા લખી હતી પણ મેં એ ફિલ્મમાં કામ કરવાની ના પાડી દીધી. આ પછી ખબર પડી કે એ ફિલ્મ ‘ડર’ હતી. મારા માટે જે કૅરૅક્ટર લખવામાં આવ્યું હતું એ શાહરુખે ભજવ્યું હતું. આટલી મોટી ફિલ્મની ઑફર ઠુકરાવી દીધી એનો મને આજે પણ અફસોસ થાય છે.’
