‘રામાયણ’નું સત્તાવાર ટ્રેલર રિલીઝ થતા પહેલાં તેનો એક ભાગ સોશિયલ મીડિયા પર લીક થયો છે. નવી દિલ્હીની ખાસ ઇવેન્ટમાં મોબાઇલથી રેકોર્ડ કરાયેલો વીડિયો વાયરલ થતાં મેકર્સે કાનૂની કાર્યવાહી શરૂ કરી છે અને ચાહકોને 24 જુલાઈએ આવનારા સત્તાવાર ટ્રેલર જોવા અપીલ કરી
શનિવારે દિલ્હીમાં ભારત મંડપમ ખાતે યોજાયેલી સ્પેશ્યલ ઇવેન્ટમાં ટીમ ‘રામાયણ’.
નિતેશ તિવારીના ડિરેક્શનમાં બની રહેલી ફિલ્મ ‘રામાયણ’નું ટ્રેલર સત્તાવાર રીતે રિલીઝ થાય એ પહેલાં જ પાઇરસીનો શિકાર બન્યું છે. તાજેતરમાં ફિલ્મની નવી દિલ્હીમાં યોજાયેલી વિશેષ ઇવેન્ટ દરમ્યાન કોઈએ મોબાઇલમાં રેકૉર્ડ કરેલો અંદાજે ૧ મિનિટ ૨૮ સેકન્ડનો વિડિયો સોશ્યલ મીડિયા પર વાઇરલ થઈ ગયો છે. આ ફુટેજમાં ભગવાન શ્રી રામના સ્વરૂપમાં રણબીર કપૂરની એન્ટ્રી અને પિતા દશરથના વચનનું પાલન કરતાં દૃશ્યોની ઝલક જોવા મળી રહી છે.
આ ઘટના બાદ ફિલ્મના નિર્માતા નમિત મલ્હોત્રા અને ફિલ્મની કાનૂની ટીમે કડક વલણ અપનાવીને ઇન્ટરનેટ પરથી આ લીક થયેલી ક્લિપને દૂર કરવાની કાર્યવાહી શરૂ કરી છે. રેડિટનાં અનેક પેજ પરથી આ વિડિયો હટાવી દેવામાં આવ્યો છે, જોકે એેને સંપૂર્ણપણે દૂર કરવામાં હજુ પણ મુશ્કેલી પડી રહી છે.
ફિલ્મના મેકર્સે આ સંજોગોમાં ચાહકોને અપીલ કરી છે કે તેઓ આવી ગેરકાયદે લીક થયેલી ક્લિપો ન જુએ અને ૨૪ જુલાઈએ રોજ રિલીઝ થનારા સત્તાવાર ટ્રેલરની રાહ જુએ.
