મિડલ ઇસ્ટના તણાવની અસર યશની ફિલ્મ પર! ટોક્સિકની રિલીઝ ડેટ લંબાવાઈ

‘Toxic’ released postponed: યશની ફિલ્મ ‘ટોક્સિક: અ ફેરી ટેલ ફોર ગ્રોન અપ્સ’ની રિલીઝ હવે ૪ જૂન ૨૦૨૬ સુધી મુલતવી રખાઈ; મધ્ય પૂર્વમાં વધતા તણાવ અને પ્રાદેશિક અસ્થિરતાને કારણે લેવાયો મહત્વનો નિર્ણય; ટ્રેલર લોન્ચ અને પહેલું ગીત `તબાહી` પણ મુલતવી રાખ્યું

`ટોક્સિક: અ ફેરી ટેલ ફોર ગ્રોન અપ્સ`માં યશ

રોકિંગ સ્ટાર યશ (Yash)ની બહુપ્રતિક્ષિત એક્શન ડ્રામા ફિલ્મ `ટોક્સિક: અ ફેરી ટેલ ફોર ગ્રોન અપ્સ` (Toxic: A Fairy Tale for Grown Ups)ની રિલીઝ હવે મુલતવી રાખવામાં આવી છે. આ ફિલ્મ પહેલા ૧૯ માર્ચ, ૨૦૨૬ના રોજ વિશ્વભરના સિનેમાઘરોમાં રિલીઝ થવાની હતી, પરંતુ મધ્ય પૂર્વ (Middle East crisis)માં ચાલી રહેલા તણાવ અને પ્રાદેશિક અસ્થિરતાને કારણે, નિર્માતાઓએ તેની રિલીઝ મુલતવી રાખવાનો નિર્ણય લીધો છે. મેકર્સે સત્તાવાર રીતે જાહેરાત કરી છે કે, આ ફિલ્મ હવે ૪ જૂન, ૨૦૨૬ના રોજ વૈશ્વિક સ્તરે રિલીઝ થશે.

ટોક્સિકની રિલીઝ ડેટ આગળ ધકેલાઈ

ADVERTISEMENT

કેવીએન પ્રોડક્શન્સ (KVN Productions) અને મોન્સ્ટર માઇન્ડ ક્રિએશન્સ (Monster Mind Creations)એ આજે તેમની ખૂબ જ અપેક્ષિત એક્શન ડ્રામા ફિલ્મ, `ટોક્સિક: અ ફેરી ટેલ ફોર ગ્રોન અપ્સ` માટે નવી વૈશ્વિક થિયેટર રિલીઝ તારીખની જાહેરાત કરી. મૂળ રૂપે ૧૯ માર્ચ, ૨૦૨૬ના રોજ વિશ્વભરમાં રિલીઝ થવાનું હતું, પરંતુ મધ્ય પૂર્વમાં ચાલી રહેલા તણાવ અને પ્રાદેશિક અસ્થિરતાને કારણે આ ફિલ્મ (‘Toxic’ released postponed) હવે ત્રણ મહિના પછી ૪ જૂન, ૨૦૨૬ના રોજ રિલીઝ થશે.

ગલ્ફ દેશોની પરિસ્થિતિને ધ્યાનમાં રાખીને લેવાયો નિર્ણય

આ નિર્ણય તેના મુખ્ય વિતરણ ભાગીદાર, ફાર્સ ફિલ્મ્સ સાથે પરામર્શ કર્યા પછી લેવામાં આવ્યો હતો. ગલ્ફ દેશોમાં સિનેમા કામગીરી પર અસરને ધ્યાનમાં રાખીને, નિર્માતાઓએ પરિસ્થિતિનું નજીકથી નિરીક્ષણ કર્યા પછી આ પગલું ભર્યું. નોંધનીય છે કે રાષ્ટ્રીય મીડિયા સાથે ફિલ્મનું ભવ્ય ટ્રેલર લોન્ચ ૮ માર્ચે બેંગલુરુ (Bengaluru)માં સુનિશ્ચિત કરવામાં આવ્યું હતું, અને સમગ્ર પ્રમોશનલ શેડ્યૂલ ૧૯ માર્ચની રિલીઝને ધ્યાનમાં રાખીને અંતિમ સ્વરૂપ આપવામાં આવ્યું હતું.

મ્યુઝિક વિડિયોને હોલ્ડ પર રાખ્યો

ફિલ્મનું પહેલું ગીત, ‘તબાહી’ ૨ માર્ચે રિલીઝ થવાનું હતું. પરંતુ વર્તમાન પરિસ્થિતિઓને ધ્યાનમાં રાખીને, નિર્માતાઓએ મ્યુઝિક વિડિયોને હોલ્ડ પર રાખવાનો અને પ્રમોશનને થોડા સમય માટે સ્થગિત કરવાનો નિર્ણય લીધો છે.

નિર્માતાઓ તરફથી સત્તાવાર નિવેદન

નિર્માતાઓ તરફથી સત્તાવાર નિવેદનમાં કહેવામાં આવ્યું છે કે, ‘ટોક્સિક: અ ફેરી ટેલ ફોર ગ્રોન અપ્સ` એ એક ફિલ્મ છે જે અમે વૈશ્વિક પ્રેક્ષકોને ધ્યાનમાં રાખીને બનાવી છે. કન્નડ અને અંગ્રેજીમાં શૂટ કરાયેલ આ ફિલ્મ ભારત અને વિશ્વભરના પ્રેક્ષકો સાથે જોડાવાના વિશ્વાસ સાથે બનાવવામાં આવી હતી. વર્ષોની સખત મહેનત પછી અમે ૧૯ માર્ચે આ ફિલ્મ તમારી સાથે શેર કરવા માટે ઉત્સાહિત છીએ. જો કે, વર્તમાન અનિશ્ચિતતા, ખાસ કરીને મધ્ય પૂર્વમાં, મહત્તમ પ્રેક્ષકો સુધી પહોંચવાના અમારા ઉદ્દેશ્યને અસર કરી રહી છે. અમારા ભાગીદારો અને પ્રેક્ષકોના શ્રેષ્ઠ હિતમાં કાળજીપૂર્વક વિચારણા કર્યા પછી, અમે રિલીઝ મુલતવી રાખવાનો મુશ્કેલ પરંતુ જરૂરી નિર્ણય લીધો છે. અમે તમારી ધીરજ અને સમર્થન માટે ખૂબ આભારી છીએ અને તમારા સતત પ્રેમની રાહ જોઈ રહ્યા છીએ.’

ફિલ્મ હવે ૪ જૂન, ૨૦૨૬ના રોજ વિશ્વભરના થિયેટરોમાં અંગ્રેજી અને ભારતીય ભાષાઓમાં રિલીઝ થશે.

યશ અને કિયારાની જોડી મચાવશે ધૂમ

`ટોક્સિક: અ ફેરી ટેલ ફોર ગ્રોન અપ્સ`માં યશ સાથે નયનતારા (Nayanthara), કિયારા અડવાણી (Kiara Advani), હુમા કુરેશી (Huma Qureshi), રુક્મિણી વસંત (Rukmini Vasanth) અને તારા સુતારિયા (Tara Sutaria) છે. વાર્તા યશ દ્વારા લખવામાં આવી છે અને ગીતુ મોહનદાસ (Geetu Mohandas) દ્વારા ફિલ્મ દિગ્દર્શિત કરવામાં આવી છે. આ ફિલ્મનું શૂટિંગ કન્નડ અને અંગ્રેજીમાં એકસાથે કરવામાં આવ્યું છે. જેમાં હિન્દી, તમિલ, તેલુગુ અને મલયાલમમાં ડબ વર્ઝન પણ તૈયાર કરવામાં આવી રહ્યા છે.