મુશ્તાક ખાનને લગભગ પાંચ વર્ષ પહેલાં કૅન્સર હોવાનું નિદાન થયું હતું. સારવાર બાદ તેઓ સાજા થઈ ગયા હતા; જોકે, તાજેતરમાં રોગ ફરી વળ્યો અને ત્યારબાદ તેમનું સ્વાસ્થ્ય સતત કથળતું ગયું. તેમને ગંભીર હાલતમાં મુંબઈની નાણાવટી હૉસ્પિટલમાં દાખલ કરવામાં આવ્યા હતા.
મુશ્તાક ખાન
હિન્દી ફિલ્મોમાં સહાયક અને કૉમેડી રોલ માટે જાણીતા અભિનેતા મુશ્તાક ખાનનું ગુરુવાર, 24 સપ્ટેમ્બરના રોજ નિધન થયું છે. તેઓ 56 વર્ષના હતા. તેઓ છેલ્લા પાંચ વર્ષથી કૅન્સર સામે લડી રહ્યા હતા. તાજેતરમાં સ્વાસ્થ્ય બગડવાને કારણે તેમને મુંબઈની નાણાવટી હૉસ્પિટલમાં દાખલ કરવામાં આવ્યા હતા, જ્યાં તેઓ લગભગ 15 દિવસથી સારવાર લઈ રહ્યા હતા. `ફૅડરેશન ઓફ વેસ્ટર્ન ઇન્ડિયા સિને એમ્પ્લોઈઝ` (FWICE) ના પ્રમુખ બી. એન. તિવારીએ મુશ્તાક ખાનના નિધનની પુષ્ટિ કરી. તેમણે કહ્યું, "તેમનું નિધન એક કલાક કરતાં પણ ઓછા સમય પહેલાં થયું છે. તેઓ ઘણા દિવસોથી બીમાર હતા. હું તેમના પરિવારનો સંપર્ક કરવાનો પ્રયાસ કરી રહ્યો છું." અભિનેતાના બિઝનેસ પાર્ટનર શિવમે પણ આ સમાચારની પુષ્ટિ કરી હતી. તેમના અંતિમ સંસ્કાર શુક્રવાર, 25 સપ્ટેમ્બરના રોજ મુંબઈમાં કરવામાં આવશે.
પાંચ વર્ષથી કૅન્સરથી પીડિત હતા
ADVERTISEMENT
મુશ્તાક ખાનને લગભગ પાંચ વર્ષ પહેલાં કૅન્સર હોવાનું નિદાન થયું હતું. સારવાર બાદ તેઓ સાજા થઈ ગયા હતા; જોકે, તાજેતરમાં રોગ ફરી વળ્યો અને ત્યારબાદ તેમનું સ્વાસ્થ્ય સતત કથળતું ગયું. તેમને ગંભીર હાલતમાં મુંબઈની નાણાવટી હૉસ્પિટલમાં દાખલ કરવામાં આવ્યા હતા અને તબીબી દેખરેખ હેઠળ સારવાર ચાલી રહી હતી. સારવાર દરમિયાન ગુરુવારે તેમનું અવસાન થયું.
View this post on Instagram
‘વૅલકમ’ સહિત અનેક ફિલ્મોમાં યાદગાર કામ કર્યું
મુશ્તાક ખાને 1980માં ફિલ્મ `આલ્બર્ટ પિન્ટો કો ગુસ્સા ક્યું આતા હૈ`થી પોતાની અભિનય કારકિર્દીની શરૂઆત કરી હતી. ત્રણ દાયકાથી વધુની કારકિર્દી દરમિયાન તેમણે અનેક હિન્દી ફિલ્મોમાં કામ કર્યું. તેઓ `વૅલકમ`, `ગદર: એક પ્રેમ કથા`, `જુડવાં નંબર 1`, `આશિકી`, `દિલ હૈ કે માનતા નહીં`, `મુઝસે શાદી કરોગી` અને `હમ હૈં રાહી પ્યાર કે` જેવી ફિલ્મોમાં જોવા મળ્યા હતા. મુશ્તાક ખાન ખાસ કરીને તેમની સહાયક અને કૉમેડી ભૂમિકાઓ માટે જાણીતા હતા. પ્રેક્ષકોએ `વૅલકમ`માં તેમના અભિનયને ખૂબ પસંદ કર્યો હતો; તેમની કૉમિક ટાઈમિંગ અને ડાયલોગ બોલવાની અનોખી સ્ટાઈલ તેમની ઓળખ બની ગઈ હતી.
થિયેટરથી સફરની શરૂઆત કરી
મધ્યપ્રદેશના વતની એવા મુશ્તાક ખાને થિયેટરથી પોતાની અભિનય કારકિર્દી શરૂ કરી હતી. ત્યારબાદ 1990ના દાયકામાં તેઓ બૉલિવૂડમાં આવ્યા. ફિલ્મોની સાથે સાથે તેમણે ટેલિવિઝન અને થિયેટરમાં પણ કામ કર્યું. તેમની લાંબી કારકિર્દી દરમિયાન, તેમણે અનેક ફિલ્મો અને ટીવી પ્રોજેક્ટ્સમાં સહાયક ભૂમિકાઓ ભજવી હતી. તેમના અવસાનથી તેમના પરિવાર, મિત્રો અને ફિલ્મ ઉદ્યોગના સહકર્મીઓ શોકાતુર થયા છે.
સોશિયલ મીડિયા પર લોકોએ આપી શ્રદ્ધાંજલિ
"બૉલિવુડના પીઢ અભિનેતા મુશ્તાક ખાનનું નિધન થયું છે. તેમના અવસાનથી ભારતીય ફિલ્મ જગતને મોટી ખોટ પડી છે. અનેક દાયકાઓ સુધી ફિલ્મો અને ટેલિવિઝનમાં આપેલી તેમની શાનદાર અભિનયની કામગીરી માટે તેમને હંમેશા યાદ રાખવામાં આવશે. ઈશ્વર તેમના આત્માને શાંતિ આપે," એમ તેમના ચાહકો અને ફિલ્મ જગતના કલાકારો તેમને શ્રદ્ધાંજલિ આપી રહ્યા છે.
