જૂની સાડીઓમાંથી બનાવો ટ્રેન્ડી ગરબા-લુક

અત્યારે નવરાત્રિમાં ઇન્ડો-વેસ્ટર્ન આઉટફિટ્સનો ભારે ક્રેઝ છે. જૂની સિલ્ક કે જ્યૉર્જેટ સાડીઓ આ માટે બેસ્ટ ઑપ્શન છે. ચંદેરી કે પ્રિન્ટેડ સાડીમાંથી લૉન્ગ શ્રગ સિવડાવી લો. એને તમે કોઈ પણ સિમ્પલ પ્લેન ક્રૉપ ટૉપ અને / અથવા જીન્સ સાથે પેર કરી શકો છો. જ્યૉર્જેટ કે શિફોનની બાંધણી સાડીમાંથી ફ્રી-સાઇઝ કફ્તાન કુરતી બનાવી શકાય છે. એના પર મિરરવર્ક કે ગોટાપટ્ટીની લેસ લગાવીને ટ્રેડિશનલ ટચ આપી શકાય છે.

સાડીની બૉર્ડરનો રી-યુઝ

જો સાડી જૂની કે થોડી ખરાબ હોય પણ એની બૉર્ડર સારી હોય તો ઘરમાં પડેલા કોઈ પણ પ્લેન લેહંગા કે પ્લેન દુપટ્ટા પર આ બૉર્ડર લગાવડાવી લેવાથી લુક ઇન્સ્ટન્ટ એલિવેટ થઈ જશે. સાડીની હેવી બૉર્ડરનો ઉપયોગ બ્લાઉઝની સ્લીવ્ઝ, ગળાની ડિઝાઇન કે કમરપટ્ટા પર કરીને સાદા આઉટફિટને પણ બજેટમાં નવરાત્રિ માટે રેડી બનાવી શકાય છે. 

ફ્યુઝન ચણિયો

જો સાડીનું કટિંગ કર્યા વગર ઝડપી લુક તૈયાર કરવો હોય તો સાડીના બૉટમ પાર્ટનો ઉપયોગ કરીને ચણિયો બનાવી શકાય છે. સાડીને કમરની આસપાસ સરખી પ્લીટ્સ લઈને લેહંગાની જેમ ટક કરી લો. એને કમરપટ્ટા કે દોરીથી સેટ કરો. આ ચણિયા પર કોઈ પ્લેન શૉર્ટ કુરતી કે ક્રૉપ ટૉપ પહેરો. એના પર કચ્છી કે રબારી ભરતકામવાળું હેવી આભલાવર્કનું જૅકેટ પહેરવાથી એકદમ રૉયલ ગરબા લુક તૈયાર થઈ જશે.