° °

આજનું ઇ-પેપર
Monday, 27 September, 2021


દિલીપકુમારની ફેવરિટ રેસ્ટોરાં કૉપર ચીમનીમાં લંચ

05 August, 2021 01:45 PM IST | Mumbai | Sanjay Goradia

પચાસથી વધારે વર્ષથી ચાલતી વરલીની કૉપર ચીમનીની હવે તો અઢળક બ્રાન્ચ છે અને સ્વાદ પણ લગભગ સરખો. છતાંય યુસુફસાબની ફેવરિટ રેસ્ટોરાંમાં બેસીને લંચ લેવાની મજા કંઈક જુદી જ છે

કોપર ચીમની જાઓ તો આબે-હયાત સૂપ જરૂર મગાવજો.

કોપર ચીમની જાઓ તો આબે-હયાત સૂપ જરૂર મગાવજો.

કૉપર ચીમની. મુંબઈની જૂજ રેસ્ટોરાં એવી હશે જેમના વિશે દરેક બીજો મુંબઈકર જાણતો હોય. કૉપર ચીમની એવી જ રેસ્ટોરાં છે. બહુ પૉપ્યુલર અને ઑલમોસ્ટ બધાએ એનું નામ સાંભળ્યું હોય. લગભગ છેલ્લાં પચાસ વર્ષથી આ રેસ્ટોરાં છે. એના માલિકનું નામ જે. કે. કપૂર છે. પંજાબી ઓનર હોવાને લીધે કૉપર ચીમનીએ અમુક પંજાબી આઇટમોમાં ઑથેન્ટિક ટેસ્ટ જાળવી રાખ્યો છે. વરલીમાં આવેલી કૉપર ચીમની એ પહેલી રેસ્ટોરાં અને એ પછી કાલા ઘોડા, બાંદરા-કુર્લા કૉમ્પ્લેક્સ, બાંદરા-વેસ્ટ, જુહુ એમ ઘણી જગ્યાએ થઈ ગઈ તો પવઈમાં ડિલિવરી કિલચન પણ બનાવ્યું. જોકે હું માનું છું કે જો તમારે સાચો સ્વાદ માણવો હોય તો હંમેશાં ઓરિજિનલ કે પછી પહેલી બ્રાન્ચમાં જવું. માનું પણ છું અને આ જ નિયમ પાળું પણ છું અને એટલે જ હમણાં અમે બધા મિત્રો કૉપર ચીમનીની વરલીવાળી રેસ્ટોરાંમાં લંચ માટે ગયા. આ રેસ્ટોરાંમાં એન્ટર થાઓ કે તમને ડાબી બાજુ દિલીપકુમારના ઘણા ફોટોગ્રાફ્સ જોવા મળે. એનું કારણ એ છે કે દિલીપકુમારની આ ફેવરિટ રેસ્ટોરાં હતી. 
કૉપર ચીમનીમાં અમે સૌથી પહેલાં આબે-હયાત સૂપ મગાવ્યો. શું સૂપ હતો, અદ્ભુત સાહેબ. વેજિટેબલ ક્રશ કરી એમાં ફ્રેશ કોકોનટ મિલ્ક, અડધા કૂક થયેલા લીલા વટાણા અને ઉપરથી હળદરનો સ્વાદ. હળદરને લીધે સૂપનો આખો ટેસ્ટ બદલાઈ ગયો તો અડધા કૂક થયેલા વટાણાને કારણે એ બાફનો સ્વાદ પણ ગળામાં અનુભવાતો હતો. સાચે જ મજા પડી ગઈ. હું કહીશ કે એક વાર કૉપર ચીમનીમાં આ આબે-હયાતનો સ્વાદ લેજો જ લેજો. સૂપ સાથે ક્રન્ચિનેસ માટે અમે ક્રિસ્પી રૂમાલી રોટી મગાવી હતી. ક્રિસ્પી રૂમાલી રોટી, ઉપર બટર અને એના પર ચિલી પાઉડરનો છંટકાવ. એની સાથે કાંદા-ટમેટાંનું સૅલડ અને એમાં લીલાં મરચાંના ટુકડા તો સાથે દહીં નાખીને બનાવેલી ગ્રીન ચટણી. જોકે એ કંઈ ન લીધું હોય અને ક્રિસ્પી રૂમાલી રોટી તથા સૂપના કૉમ્બિનેશનને જ ન્યાય આપ્યો હોય તો પણ જલસો પડી જાય.
હવે વાત મેઇન કોર્સની. અમે મગાવ્યું તો ઘણું, પણ આપણે વાત એની જ કરીશું જે ચર્ચાને યોગ્ય છે. 
સબ્ઝીમાં અમે મગાવી લસુની કૉર્ન પાલક સબ્ઝી. ક્રશ કરેલા પાલકના બેઝના આ શાકમાં લસણનો વઘાર હતો અને એમાં રહેલા મકાઈના દાણા ક્રન્ચિનેસ આપતા હતા. સબ્ઝીની ઉપર ફ્રાઇડ લસણના ઝીણા ટુકડાનું ગાર્નિશિંગ સબ્ઝીનું સૌંદર્ય વધારવાનું કામ કરતું તો ટેસ્ટને પણ વેંત ઊંચે લઈ જવાનું કામ કરતું હતું. દાળ અમે મગાવી હતી દાલ મહારાજા. સાચું કહું તો આ એનું નામ માત્ર છે. બાકી છે પેલી આપણી દાલ મખ્ખની. બ્લૅક દાળ જે બધી પંજાબી રેસ્ટોરાંમાં મળતી હોય છે. પણ હા, ટેસ્ટ એનો સુપર્બ હતો એની ના નહીં. આ કાળી દાળની એક ખાસિયત કહું તમને. પંજાબીઓના ઘરે જે દાળ બને છે એ રેસ્ટોરાંમાં મળે છે એટલી ઘાટી નથી હોતી, આપણી તુવેરની દાળ જેવી થોડી પાણી જેવી હોય અને એનો ટેસ્ટ પણ અલગ હોય છે. જો તમારે એ ઘરઘરાઉ દાલ મખ્ખનીનો ટેસ્ટ કરવો હોય તો તમને સાયનના કોલીવાડામાં આવેલી મિની પંજાબ રેસ્ટોરાંમાં મળશે. એ સિવાય મને તો બીજે ક્યાંય ચાખવા નથી મળી.
બ્રેડ પૉર્શનમાં બધાએ પોતપોતાની રીતે જે જોઈતું હતું એ મગાવ્યું હતું, પણ એ બધામાં આલા દરજ્જાનું જો કંઈ હતું તો એ ગાર્લિક નાન. એની ખાસિયત એ છે કે એમાં માત્ર નાનની ઉપર જ ગાર્લિક વાપરવામાં નથી આવતું, પણ નાનનો લોટ બંધાયો હોય ત્યારે એમાં જે પાણી વપરાય છે એ પણ ગાર્લિક પલાળી રાખેલું પાણી હોય છે. લોટ બંધાયા પછી પણ એમાં ગાર્લિકના ઝીણા ટુકડા નાખવામાં આવે અને નાન તૈયાર થઈ ગયા પછી પણ ગાર્લિક છાંટવામાં આવે. એને લીધે ગાર્લિક મોઢામાં આવે ત્યારે જ નહીં, નાન ખાતી વખતે પણ ગાર્લિકની આછી ખુશ્બૂ અને સ્વાદ તમને આવ્યા કરે. મજા ક્યાં છે ખબર છે તમને? આટલું ગાર્લિક વાંચવામાં તમને અતિરેક લાગી શકે, પણ સ્વાદમાં ક્યાંય ગાર્લિકનો અતિરેક નથી અને નાન ખાધા પછી ડકારમાં પણ ક્યાંય એની વાસ નથી આવતી.
ડિઝર્ટમાં પટિયાલા કુલ્ફીનો સ્વાદ માણવા જેવો છે. પટિયાલા કુલ્ફી હૅન્ડમેડ પ્રોસેસથી બની હતી એ એના સ્વાદ પરથી ખબર પડતી હતી. આમ પણ કુલ્ફી એને જ કહેવાય જે દેશી સંચામાં 
તૈયાર થાય. જોકે આજકાલ આ નિયમ બહુ ઓછા પાળે છે, પણ કૉપર ચીમની હજી એને વળગી રહી છે એ સારી વાત છે.
હવે વાત કરી લઈએ બિલની. નૅચરલી, અમારું બિલ તો સંયુક્ત આવ્યું હતું, પણ જો તમે આ બધું મગાવો તો એક વ્યક્તિના ઍવરેજ ૯૦૦થી ૧૦૦૦ રૂપિયાનું બિલ કાઉન્ટ કરી શકો.

05 August, 2021 01:45 PM IST | Mumbai | Sanjay Goradia

અન્ય લેખો

ફૂડ એન્ડ રેસિપીઝ

ઑથેન્ટિક રૉ-મટીરિયલની ઑથેન્ટિક વેજ સૅન્ડવિચ

વેજિટેબલ સૅન્ડવિચમાં કાંદા,બીટ અને ગાજર અને એવુંબધું તો હવે ઉમેરાતું થયું; પણ પહેલાં તો એમાં માત્ર બટાટા, ટમેટાં અને કાકડી જ નાખતા. કહેવાય છે કે જો તમારે સાચો ટેસ્ટ માણવો હોય તો એમ જ વેજ સૅન્ડવિચ ખાવી જોઈએ

16 September, 2021 05:38 IST | Mumbai | Sanjay Goradia
ફૂડ એન્ડ રેસિપીઝ

પેટપૂજા કરો કિંગ સ્ટાઇલ

મરાઠા અને રાજસ્થાની છાંટ ધરાવતા માળવાનારાજવી ખાણાની લહેજત માણવી હોય તો ઑપ્શન છે બાંદરાનું ચારોલી ક્લાઉડ કિચન. રાજાશાહી ખાણાની વિશેષતા શું હોય એ વિશે ઇન્દોરના રાજવી ખાનદાનમાં ઊછરેલાં હોમ શેફ અનુરાધા જોશી મધોરા સાથે લંચગોષ્ઠિ માંડી. વાંચો એનો અનુભવ

16 September, 2021 06:23 IST | Mumbai | Sejal Patel
ફૂડ એન્ડ રેસિપીઝ

ગળ્યા પૂડલા ભાવતા હોય તો આ પૅનકેક પણ ટ્રાય કરી શકાય

થોડા સમય પહેલાં ધ બેકર્સ ડઝન દ્વારા માર્કેટમાં મુકાયેલું પૅનકેક પ્રીમિકસ કેવું છે એની અમે ટ્રાય કરી. અમારી અપેક્ષાઓ પર તો એ ખરું ઊતર્યું છે. ઇચ્છો તો તમે પણ ટ્રાય કરો આ અમેરિકન નાસ્તો

14 September, 2021 07:01 IST | Mumbai | Jigisha Jain

This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK