અહીં શીખો ત્રણ સ્ટાઇલની હૉટ ચૉકલેટ
ત્રણ સ્ટાઇલની હૉટ ચૉકલેટ
માર્શમૅલો સાથે હૉટ ચૉકલેટ
સામગ્રી: ૨ કપ દૂધ, ૨ ચમચી કોકો પાઉડર, ૨ ચમચી ખાંડ, ૧ ચમચી કૉર્નફ્લોર, ચપટી કાળાં મરી અથવા ચપટી તજનો પાઉડર, માર્શમૅલોના ટુકડા.
ADVERTISEMENT
બનાવવાની રીત : સૌથી પહેલાં મધ્યમ આંચ પર દૂધને ઉકાળો. બીજા વાસણમાં કોકો પાઉડર, ખાંડ અને કૉર્નફ્લોરને થોડા ઠંડા દૂધમાં સારી રીતે ભેળવી ગાંઠ ન રહે એ રીતે પેસ્ટ બનાવો. ઊકળતા દૂધમાં આ પેસ્ટ ધીમે-ધીમે ઉમેરો અને હલાવતા રહો. ૨-૩ મિનિટ ઉકાળો જેથી એ જાડું અને ક્રીમી થાય. છેલ્લે કપમાં માર્શમૅલો ટુકડા અને ક્રીમ ઉમેરો. ગાર્નિંશિંગ માટે કોકો પાઉડર છાંટો.
નૅચરલ હૉટ ચૉકલેટ
સામગ્રી : ૩ કપ દૂધ (પૂર્ણ ચરબીવાળું), ૧૦૦ ગ્રામ ડાર્ક ચૉકલેટના ટુકડા, અડધી ચમચી ખાંડ, અડધી ચમચી વૅનિલા એસેન્સ, ચપટી કાળાં મરી પાઉડર.
રીત: દૂધને ગરમ કરી ઉકાળો. હવે એમાં ચૉકલેટના ટુકડાઓ ઉમેરો અને ધીમે-ધીમે હલાવતા રહો અને પીગળવા દ્યો. પછી એમાં ખાંડ અને વૅનિલા એસેન્સ નાખો. વધારે ફીણ કરવા એક મિનિટ માટે બ્લેન્ડરથી હલાવો અને તરત સર્વ કરો.
મસાલા સાથે ગુજરાતી સ્ટાઇલ હૉટ ચૉકલેટ
સામગ્રી: ૨ કપ દૂધ, ૧ ચમચી કોકો પાઉડર, ૫૦ ગ્રામ ડાર્ક ચૉકલેટ (છીણેલું), પા ચમચી તજનો પાઉડર, ૩-૪ નંગ લવિંગ, પા ચમચી સૂંઠ પાઉડર, ૧ ચમચી કૉર્નફ્લોર, અડધી ચમચી ખાંડ, એલચી પાઉડર પ્રમાણસર.
રીત: દૂધમાં તજ, લવિંગ અને સૂંઠ ઉમેરી ધીમા તાપે ઉકાળો (૧ મિનિટ). કોકો અને ચૉકલેટ ઉમેરો. હલાવતા રહો અને પીગળાવો. બીજા વાસણમાં કૉર્નફ્લોર દૂધમાં ભેળવીને પેસ્ટ બનાવો અને ઉમેરો. ખાંડ નાખીને ૧-૨ મિનિટ જાડું થાય ત્યાં સુધી ઉકાળો. ગૅસ બંધ કરી એલચી પાઉડર છાંટો. ઉપર ક્રીમ, તમાલપત્રનાં પત્તાં અને લવિંગ મૂકો. સર્વ કરતી વખતે માર્શમૅલો ઉમેરો.
