જપાનના હનેડા ઍરપોર્ટ પર ટૉઇલેટ ટ્રબલ

ટર્મિનલ 2માં ૭૦ ટકા શૌચાલય પાણીના અભાવે બંધ થઈ જવાથી ભારે અફડાતફડી

ઍરપોર્ટ ઑપરેટરના પ્રવક્તાએ પ્લમ્બિંગ-સમસ્યાની જાણકારી આપી

વિશ્વનાં સૌથી વ્યસ્ત ઍરપોર્ટ્સમાંના એક એવા ટોક્યોના હનેડા ઍરપોર્ટ પર શુક્રવારે અંધાધૂંધી જોવા મળી હતી, કારણ કે પાણીના પમ્પમાં ઇલેક્ટ્રિક ખામી સર્જાઈ હતી અને ટર્મિનલ 2નાં લગભગ ૭૦ ટકા શૌચાલયે કામ કરવાનું બંધ કરી દીધું હતું. ૧૧ કલાક સુધી ચાલેલી આ સમસ્યાને કારણે મુસાફરોને ટૉઇલેટનો ઉપયોગ કરવા માટે લાંબી રાહ જોવી પડી હતી અને અસુવિધાનો સામનો કરવો પડ્યો હતો. કેટલાક તો જાતે શૌચાલય સાફ પણ કરી રહ્યા હતા. સોશ્યલ મીડિયામાં આ વિશે ભારે ફરિયાદો જોવા મળી હતી. 

ઍરપોર્ટ ઑપરેટરના પ્રવક્તાએ પ્લમ્બિંગ-સમસ્યાની જાણકારી આપીને કહ્યું હતું કે ‘સુવિધાઓને પાણી પહોંચાડતા પમ્પમાં ઇલેક્ટ્રિક પ્રૉબ્લેમને કારણે સમસ્યા ઊભી થઈ હતી. અમારા સ્ટાફે ઉપયોગ પછી શૌચાલય ધોવા માટે ડોલનો ઉપયોગ કર્યો હતો.’