ચૂંટણીપંચના મતદાર સેવા પોર્ટલ અથવા ECINET મોબાઇલ ઍપ્લિકેશન દ્વારા ઑનલાઇન અરજીઓ પણ સબમિટ કરી શકાય છે.
પ્રતીકાત્મક તસવીર
મહારાષ્ટ્રના ચીફ ઇલેક્શન ઑફિસરે પાત્ર મતદારોની નોંધણી અને દાવા-વાંધાઓના નિકાલ માટેનાં વિશેષ પગલાંની સિરીઝ જાહેર કરી છે જેથી કોઈ પણ પાત્ર મતદાર યાદીમાંથી બાકી ન રહી જાય અને કોઈ પણ બિનપાત્ર વ્યક્તિ એમાં સામેલ ન રહે. ચીફ ઇલેક્શન ઑફિસરની ઑફિસે ગુરુવારે જણાવ્યું હતું કે ભારતના ચૂંટણીપંચની સૂચનાઓ અનુસાર રાજ્યભરમાં મતદાર નોંધણી અધિકારીઓ દ્વારા આ પગલાંનો અમલ કરવામાં આવી રહ્યો છે.
યુવા મતદારોની નોંધણીની પ્રક્રિયા સરળ બનાવવા માટે પાંચથી ૯ ઑક્ટોબર દરમ્યાન કૉલેજો અને યુનિવર્સિટીઓમાં મતદાર નોંધણી શિબિરોનું આયોજન કરવામાં આવ્યું છે. બૂથ લેવલ ઑફિસરો (BLO) વિદ્યાર્થીઓને અરજીઓ ભરવામાં અને મતદારયાદીની સ્પેશ્યલ ઇન્ટેન્સિવ રિવિઝન (SIR) પ્રક્રિયા સંબંધિત પ્રશ્નોના નિરાકરણમાં મદદ કરી રહ્યા છે.
જે પાત્ર મતદારોનાં નામ ડ્રાફ્ટ મતદારયાદીમાં સામેલ નથી તેમને ઓળખવા માટે ઘરે-ઘરે જઈને વિશેષ અભિયાન ચલાવવામાં આવી રહ્યું છે. BLO આવા નવા મતદારોની પાત્રતાની ચકાસણી કર્યા બાદ તેમની પાસેથી ફૉર્મ 6 એકત્રિત કરી રહ્યા છે.
મુલાકાત દરમ્યાન જે પાત્ર નાગરિકો ઘરે ઉપલબ્ધ ન હોય તેમના માટે ૧૦ અને ૧૧ ઑક્ટોબરે તમામ મતદાનમથકો પર વિશેષ મતદાર નોંધણી શિબિરો યોજવામાં આવશે. એમાં વધુમાં જણાવાયું છે કે જે મતદારોએ તેમનું સામાન્ય રહેઠાણ બદલ્યું છે અને BLOની મુલાકાત દરમ્યાન જેમનાં નામ ગેરહાજર અથવા સ્થળાંતરિત વ્યક્તિઓની યાદીમાં સામેલ કરવામાં આવ્યાં છે તેઓ પણ નોંધણી માટે અરજી કરી શકે છે.
નામ સામેલ કરવા માટેની અરજીઓ દાવા અને વાંધાના સમયગાળા દરમ્યાન (જે ૧૨ ઑક્ટોબરે સમાપ્ત થાય છે) ચૂંટણી નોંધણી અધિકારી, સહાયક ચૂંટણી નોંધણી અધિકારી, BLO અથવા નિયુક્ત મતદાનમથકો પર ઑફલાઇન સબમિટ કરી શકાય છે.
ચૂંટણીપંચના મતદાર સેવા પોર્ટલ અથવા ECINET મોબાઇલ ઍપ્લિકેશન દ્વારા ઑનલાઇન અરજીઓ પણ સબમિટ કરી શકાય છે.
