થાણે-વેસ્ટમાં કાપુરબાવડી બ્રિજ પાસે એક માલવાહક ટ્રકનો અકસ્માત થયો હતો જેને કારણે ટ્રાફિકને ભારે અસર થઈ હતી
કાપુરબાવડી બ્રિજ પાસે ટ્રકનો થયેલો અકસ્માત.
થાણે-વેસ્ટમાં કાપુરબાવડી બ્રિજ પાસે એક માલવાહક ટ્રકનો અકસ્માત થયો હતો જેને કારણે ટ્રાફિકને ભારે અસર થઈ હતી. ગઈ કાલે સવારે સાત વાગ્યે ઘોડબંદરથી થાણે તરફ આવી રહેલી ટ્રકના ડ્રાઇવરે ટ્રક પરનો કાબૂ ગુમાવતાં ટ્રક બ્રિજ પરના ડિવાઇડર સાથે જોરદાર અથડાઈ હતી. આ ટ્રક રાજસ્થાનથી ચૂનાનો પાવડર ભરીને ઘોડબંદર માર્ગે મહાડ તરફ જઈ રહી હતી. સદ્ભાગ્યે આ ઘટનામાં કોઈને પણ ઈજા કે જાનહાનિ થઈ ન હતી. આ અકસ્માતને કારણે ઘોડબંદર-થાણે રોડ પર કાપુરબાવડી બ્રિજ નજીક આશરે ૩ કલાક સુધી ભારે ટ્રાફિક જૅમ સર્જાયો હતો. પોલીસ અને ફાયરબ્રિગેડના જવાનોએ ક્રેનની મદદથી અકસ્માતગ્રસ્ત ટ્રકને રસ્તાની એક તરફ ખસેડીને વાહનવ્યવહાર ફરી પૂર્વવત્ કરાવ્યો હતો.
ટૂ-વ્હીલરના પ્રવેશ પર પ્રતિબંધ હોવા છતાં અટલ સેતુ પર પૂરપાટ દોડી બાઇક, એ પણ રૉન્ગ સાઇડ પર
ADVERTISEMENT
અટલ સેતુ પર પૂરપાટ ઝડપે રૉન્ગ સાઇડમાં બાઇક દોડાવનારા બે જણનો વિડિયો ઇન્ટરનેટ પર વાઇરલ થયો છે. અટલ સેતુ પર ટૂ-વ્હીલર પર સંપૂર્ણપણે પ્રતિબંધ છે ત્યારે નિયમોનું ઉલ્લંઘન કરીને કઈ રીતે બાઇક પ્રવેશી એવો સવાલ પુછાઈ રહ્યો છે. વિડિયો વાઇરલ થયા બાદ અટલ સેતુ પર સુરક્ષા વિશે પણ પ્રશ્ન ઊભો થયો છે. બાઇકની નંબર-પ્લેટ પણ ન દેખાય એ રીતે પાછળ બેસનારા યુવકે ઢાંકી દીધી હતી. આશરે ૧૦૦ કિલોમીટરથી વધુની ઝડપે બાઇક દોડાવવામાં આવી હતી. બાઇક પર બેઠેલા બન્ને જણમાંથી એકેયે હેલ્મેટ નહોતી પહેરી.
