રીલ બનાવતી વખતે ભાન ભૂલેલા સલમાન ખાનની અક્કલ મુંબ્રા પોલીસ ઠેકાણે લાવી
પોલીસ વિશે અપમાનજનક કમેન્ટ કરનાર સલમાન ખાન
મુંબ્રામાં ‘વાસ્તવ’ ફિલ્મના ડાયલૉગની કૉપી કરીને એક વ્યક્તિએ બનાવેલી રીલ વાઇરલ થઈ હતી. જોકે એ રીલમાં તેણે કહ્યું હતું કે પોલીસના સાહેબો મને સલામ કરે છે. તેના આવા બેજવાબદાર અને તુમાખીભર્યા વલણને દર્શાવતી એ રીલની મુંબ્રા પોલીસની નોંધ લીધી હતી અને ત્યાર બાદ તેની સામે કાર્યવાહી કરી તેનો માફી માગતા વિડિયોની રીલ બનાવીને સર્ક્યુલેટ કરાવી હતી.
ઇન્સ્ટાગ્રામ પર RNN ચૅનલ દ્વારા સર્ક્યુલેટ કરાયેલા એ વિડિયોમાં એ રીલ બનાવનાર સલમાન ખાન કહે છે, ‘અરે, હું મારા પોતાના જિગર પર આગળ વધ્યો છું, કોઈ મિનિસ્ટરે મને નથી બનાવ્યો. અરે, તારા પોલીસ-સ્ટેશનમાં જાઉં છું તો સાહેબ લોકો સલામ ઠોકે છે ઊભા રહીને, એ સમજાવ આને.’
ADVERTISEMENT
પોતાની ભૂલ સમજાયા બાદ માફી માગતો સલમાન ખાન
મુંબ્રા પોલીસને આ રીલ વાઇરલ થઈ હોવાની ખબર પડતાં તેમણે એ રીલ બનાવનાર સલમાન ખાનને ઝડપી લીધો હતો અને ત્યાર બાદ તેનો માફી માગતો વિડિયો બનાવડાવીને વાઇરલ કર્યો હતો. એમાં બે હાથ જોડીને માફી માગતાં સલમાન ખાન કહે છે, ‘હું એ વિડિયો માટે માફી માગું છું. હું મારી ભૂલ કબૂલ કરું છું. હવેથી હું આવો કોઈ વિડિયો નહીં બનાવું. મુંબ્રાના રહેવાસીઓને મારી વિનંતી છે કે તમે પણ આવો કોઈ વિડિયો ન બનાવતા. મારી ભૂલ થઈ. હું માફી માગું છું, મને માફ કરો.’
