સુસવાટા મારતા પવન સાથે મુંબઈમાં ઠેર-ઠેર ભારે ઝાપટાં પડ્યાં
મરીન ડ્રાઇવ પર મોજાંની મજા.
મુંબઈમાં ગઈ કાલે કેટલીક જગ્યાએ ધોધમાર વરસાદ પડ્યો હતો, એવી જ પરિસ્થિતિ આજે પણ રહે એવી શક્યતા હવામાન ખાતાએ દર્શાવી છે. આજે મુંબઈમાં ૫૦થી ૬૦ કિલોમીટરની ઝડપે પવન ફૂંકાશે અને કેટલીક જગ્યાએ ભારેથી અતિભારે ઝાપટાં પડી શકે એવી શક્યતા જણાતાં મુંબઈ, થાણે અને રાયગડમાં આજે ઑરેન્જ અલર્ટ જાહેર કર્યું છે. જ્યારે પાલઘર અને રત્નાગિરિમાં આજે યલો અલર્ટ જાહેર કરાયું છે. મુંબઈમાં ગઈ કાલે અંધેરી, બાંદરા, વિલે પાર્લે, દાદર, ભાંડુપ અને મુલુંડ સહિત અનેક વિસ્તારોમાં ધોધમાર વરસાદ પડ્યો હતો તો વસઈ-વિરાર, પાલઘર અને થાણેમાં પણ સાંજ પછી વરસાદે જોર પકડ્યું હતું.
મરીન ડ્રાઇવની પાળી પર ગઈ કાલે મૉન્સૂનની મજા લેવા અનેક લોકો પહોંચી ગયા હતા. એક બાજુ વરસાદ તેમને ભીંજવી રહ્યો હતો અને બીજી બાજુ અરબી સમુદ્રનાં ઊંચાં મોજાં દીવાલ સાથે ભટકાઈને પાળી પરના લોકોને ભીંજવી રસ્તા પર પથરાઈ જતાં હતાં.
ADVERTISEMENT
ભારે વરસાદના કારણે મુંબઈના કેટલાક વિસ્તારોમાં માટીવાળું પાણી સપ્લાય થઈ રહ્યું છે એથી BMCએ લોકોને પાણી ઉકાળીને પીવાની સલાહ આપી છે.
